Conrad Maldives Rangali Island(Tui sung Hotel)

Conrad Maldives Rangali Island pen maldian beach, Rangalifinolhu tuikulh(Indian Ocean) a om hotel ahi hi.A kibawl zawh kumnga pha ta hi.A omna mun pen sea level pan in 4.9 metres in thuk suk hi.Man(glass) bek tawh a ki um, tui nuaia hotel om masa pen ahi hi. A kibawl zawh kumnga pha ta hi.A tung in neekna dawnna mun(restaurant) bek hi in a sawtciang giah theiha hotel ngeina hong hi ta hi.A tung ding mite sea plane bek tawh pai thei ding uh hi.

Hih Hotel ah spa(ki mekna),ocean view baths, Philippe Starck fittings, private sun decks, espresso machines and Bulgari bathroom goodies,scuba diving, snorkeling safaris, windsurfing, game fishing leh catamaran sailing etc. te om hi.Khatvei in mikhual tampi tung thei lo ahihmanin a tung nuam ten ni 15 advice in book kholh kuul hi.Tun man zong tam tuak veve ei, zan khat ah US$815 pan kipan hi.Luxury villa mun bang zankhat $1950 tak hi.

upa kiteeng thakte honeymoon pai nangin hoih mah mah hi.Maan(glass) bek bek tawh ki um ahihmanin tui sunga ganhing tuam tuam parrot fish, sting rays, blue-striped snapper, leh breathtaking moray eels te limtakin ki en thei ding hi.Mit tai mah mah ding cihna hi mai hi.A hotel leh a kiim leh kiang pen romantic mah mah ahihmanin nupa thak tampi ten honeymoon zang uh hi.

Neek leh dawn zong limtuak mah mah mai hi.Zing ann (breakfast) a lim mah mah ki ngah ding hi.Sun ann(lunch) pen nisimin 12:30PM ciang ki ne dinga nitak ann(dinner) bel 6:30PM ciang kine ding hi.Nitak ann neek ciang meh nam 23 teel ding om hi.Nitak ann neekna mun tang(khuavak) lua ahihmanin sunglass bulh ding hoih hi.

Zu zuakna bar tuam tuam zong om pah ahihmanin zu dawn ding a nam tuam tuam ki ngah ding hi

 Khapi tunga kah masa pen Neil Armstrong si

 

 

Leitung mihing lakah khapi tung a kah masa pen Neil Armstrong 25.8.2012(Saturday) in sit a hi.Amah pen US astronaut min thang khat hi a, a sihin kum 82 pha hi.A birthday August 5, ma deuh in a lung ki aat hi. Cardiovascular thawh ki sai a si hi in a sihna mun bel kigen lo hi.

Neil Armstrong kum 1950 a Korean War hong om ciangin Purdue University pan tawpin 78 combat missions ah Naval aviator sem hi.Ki dona a man ciangin vanleeng hawl siam mah mah ta in X-15 Rocket nangawn hawl thei ta hi. Apollo 11 tawh July 20, 1969 in khapi tungah va kah thei hi.Kha leitang a sik masa pen hi pah hi.Tua hun lai in America leh Russia k idem dem uh hi.Khapi tung a vat un ciangin President John F. Kennedy tupna a lawhcingsak hi.Khapi tungah a va kah laitak un kum 38 pha ta hi.A lawmte nih Buzz Aldrin leh Mike Collins in zong va zui hi.Khapi tungah nai thum sung va om uh hi.Samples la in experiment bawl uh a lim zong kila uh hi.Kum 1969 leh 1972 kikal in American mi 12 khapi tungah kah uh hi.

Apollo 11 moon mission pen ama adingin a flight nunung hong suak hi.Tua khapi tungah a kah khit ciangin Armstrong zum(office) lam ah tut a hi.NASAa advanced research and technology department ah deputy associate administrator for aeronautics sem hi.Tua nasep tawpsan kik in University of Cincinnati ah professor of engineering sem kik hi.

Armstrong in a innkuanpih; a zi, a tate, a unaute leh a tute tampi tak nusia hi.Amah pen American mi etteh huai khat hi.A nasepna ah mi cihtak ahi hi.Gam leh nam adingin Navy fighter pilot, test pilot leh astronaut nasem hi.

Space Hotel Masa pen 2016kum ciang kihon ding

MAKS 2011 Airshow pan in Space hotel pod bawl ding ngaihsutna Russia ten hong nei uh hi. Lei pan in vansang huih lakah a zin a vaak om den ahihmanin Russian aerospace firm Orbital Technologies ten space hotel bawl uh hi. Hih mun pen nopci mah mah in leitung pan tai 250 pha in rocket tawh ni nih sung kileeng ding hi.Hih Hotel bawl nangin $ 60 million val tham bei ding hi.Hih Hotel pen kum 2016 cianga hon dingin kigeel hi.

Hih Hotel pen mi cidam space a research a bawl nuamte tun theih nang ngaihsutna hi cih Orbital Technologies’ CEO Sergei Kostenko in gen. Hih Hotel a tung dingte kisin khawlhna om masa phot ding hi.Khathum sung special training kah phawt kuul ding hi.Daileenna leh zunthakna ah tui kizanglo dinga huih kizang zawsop ding hi.Huih tawh ki flush ziau lel ding hi.Tui zatsa te zatkik theih in kibawl(recycled) ding hi.Ahizongin ki filter dinga a namsia leh ning bang lungno te kipai ding hi.

Hih hotel ah cabin room tawh kithuah li om ding hi.Mikhual sagih bek kitung thei ding hi.Tua mikhual a zin dingte space crew ten zui ngiat ding hi.Khuadakna kibawl a tua pan in tourist destination dang pana muhkhak ngeiloh a etlawmte kimu thei ding hi.Planet dangte kikal a om a hihmanin ni khat sungin nisuak leh nitum sawm leh guk vei kimu thei ding hi.Mi khualte sleeping bag sungah ih mu ding hi.Tua pen zipp kithuah in aki khak ziau thei cihdan hi.Tua lupna bag pen a tung leh a phei deih zawk teel theih ahi hi.Neek leh dawn lam zong lim tuak lel mai, pateh leh be khawng ki meh ding hi.Niangtui vot, tui siangtho leh thei tui zong kingah ding hi.Zudawn bel kiphallo ding hi.Ahizongin sumbei ding bel tam tuak.Kaal khat sung taam leeng $ 1 million khawng bei ding hi.

Russia te pen space lamah a madawk mah mah khat ahi uh hi. Chief Designer Sergei Korolev makaihna nuaiah USSR pen orbit a mihing pai masa pen ahi uh hi. Sputnik bang Russia ten minthan pih mah mah uh hi.

--

Niagara Tuizen(Niagara Falls)

Niagara Falls pen tuizeu a sang mah mah US leh Canada gamgi a om ahi hi.Niagara kici pen tualai muna a teeng masa Indian Iroquois te’ pau Onguiaahra’ pana kilasawn hi in tuipi gek(strait) cihna ahi hi.Hih Niagara Fall pen mun thum ah luangkhia hi. Tuate Horseshoe Falls, American Falls leh Bridal Falls ciin min tuam tuam ki vawh hi.

Niagara Falls ava mukhia masa pen Samuel De Champlain ahi hi.Kum 1604 kiima Cana leh a kiim ah a vak lain vat awn kha zen zen hi.Mi pawlkhatin bel kum 1677 a Belgian Missionary, Louis Hennepin muhkhiat dan in gen uh hi.A ki muhkhiat khitciang a painuam mi om toto hi.Kum zalom 18 na kiim teng bangin neekzonna cingzo ding zah in tourist tam hi. Kum 1848 in Charles Ellet’s Niagara Suspension Bridge kici lei kidawh hi.Ahizongin puahphat zek kuul ahihmanin kum 18555 in engineer minthang John Roebling ii’ geelna tawh a hoihzaw leithak kidawh hi.A min zong kikhek in ‘John Augustus Roebling’s Niaga Falls Suspension Bridge’ kici hi. American Civil War khitciang meileng paisak dan ding ngaihsun uh hi.A ma a sing leh suang zatna te sik tawh ki khek hi.Meileeng pai theih nanga kibawl khitciang a min zong ‘Whirlpool Rapids Bridge’ kici ta hi.Tu dongin US leh Canada kikawmna lampi khat hi.

US leh Canada ten Power bawl nangin limzat mah mah uh hi.US ten Robert Moses Niagara Power Plant leh Leweiston Pump Generating Plant koih uh hi.Canada ten zong Sir Adam Beck 1& 2 bulh tuak hi. Niagara Falls in Power a paik khiat theih zah pen 4.4.Gigawatts hi zen hi.Hih in tenna inn 3.8 million kiim tangsak zo hi.Hih tuizeu pen tourist a hup theih theih nangin ki puah toto lai ding hi. Zan ciangin Xenon lights kici taangsak uh hi.Kum simin tourist 13 million kiim in pha den uh hi.

Niagara Falls ah mi tuam tuam in a muhnop ding a tuam tuam lak uh hi.Tua a muhnop a lak zel te laka minthang khat Jean Francois ‘Blondin’ Gravelet ahi hi.Aman kum 1859 in tuizeu tungah sikhau golpi khat zan(kang) in a tungtawn in pai hi.Tua sikkhau tunga pai en dingin US leh Canada lam pan mi tul tampi pai zel uh hi.Khatvei vei bang a mit tuam in khat vei vei mi pua kawmsa in pai thei zen hi.Hih dan mi muhnop ding alak pawlkhat bangin bel sihlawh hiau sam uh ai ve.

Leitungah tuicinn a tung takpi mah maw?

Piancilna 6:8 kiim tengah leitung mihingte a mawh man un amau gawt nangin Pasian in tuicin tungsak hi.Noah te innkuan leh ganhing khempeuh a kawpkim in Noah tembaw ah tuangin in suakta thei uh hi.Tua pen leitungah mihing leh ganhing a ci man lohna ding deihna ahi hi.kha sawm val tui khangin tua khit ciang noah tembaw Ararat mual ah khawl ci hi.Hih pen Lai Siangtho in a hong hilh dan ahi hi.

Lai Siangtho a umlo ten bel tua a tam mah mah tui pen kawi lamah luangkhia mawk hiam.Tuihu(vapour) suak hi leh zong guah mah a hong zu kik veve ding hi mawk hi.Tua ahihmanin hih bang om thei lo hi ci uh hi.Lai Siangtho a kigelh pen 8-6BC kiim a Israel leh Judea gama kigelh danin kingaihsun hi.Ahizongin tuciin tun tawh kisai ciaptehna a ki mu thei upa pen Mesopotamia lam pan ki mu vet se hi.Tua pen Sumerian ten lasawn in Babylonian te tangthu ‘ Epic of Gilgamesh’ BC3 na kiim in gelh uh hi. ‘ Epic of Gilgamesh” kici pen leitunga thu kigelh a upa(lui) pen pawl ahi hi.Tungman pek tunga Sumerian pau tawh kigelh ahi hi.Hih ah Pasian in leitung tuitawh a suksiatna panin Gilgamesh-a hotkhiat dan kigelh hi.

Tui ciin tun tawh kisai Central America lam a Mayans ten zong tangthu na nei uh hi.Tua tangthu ah Pasian leitung mite tungah heh ahihmanin leitung ah tuiciin tungsak hi.Ahizongin Pasian a lungkimsak “Tapi” leh a innkuante honkhia hi cih kigelh.Persian te tangthu Vendidad’ah leitung tuiciin tunna pana suakta ‘Deukalion’ ahi hi.India te tangthu ah “Manu”kici hi.Leitung minam tuam tuam ten hih tawh kisai tangthu nei uh hi.Chinese, Incas(Peru) leh north American Natives ten zong hih dan tangthu nei uh hi.

Tui ciin tunna tangthu kigelhna khempeuh ah tuiciin tun hang pen mihingte mawhna hang ahi hi. Mihing ten Pasian thu mang lo uh ahihmanin Pasian in that mai mai nuam in lei thak din nuam hi.Lai siangtho a Noah leh Persian te tangthu a Yima ten bel pasian kiang pan theihsakna ngah uh hi.Greek te tangthu ah bel Zeus in leitung suksiat sawm ahihmanin a tapa Deukalion hilhkhol hi. Babylonian te tangthu ah a Pasian unh Ea in Utnapishtim hilh khawl hi.Aman Gilmesh hilh sawn hi.India te tangthu ah Pasiante Ngasa bangin kilaak in Manu kiangah va hilh khol uh hi.

Tuiciin tunna tawh kisai tangthu khempeuh ah a suakta te kihotkhiatna tembaw ahi hi.Laisiangtho ah zong Noah in tembaw na bawl hi. Deukalion leh a zi Pyrrha ten bel bawm tui a lawm thei bawl uh hi. Native North Americans te tangthu ah singkung pan tembaw bawl uh a suahtak lawh uh hi. Tui hong khan dan pen tangthu tuam tuam ah kibang kim lo hi.Lai siangtho ah sun 40 leh zan 40 guahzu ciin kigelh hi. Epic of Gilgamesh ah bel ni 7 sung bek guah zu hih tuak. Persian tangthu ‘Vendidad’ ah guah leh vuuk tuiin tuiciin tungsak kici hi.Tangthu tuam tuam ah aki honkhia te tuanna tembaw mual dawnah ki-nga cih ki mu hi.

Scientist tampi ten guahzu bek tawh leitung tui in tuum zo lo ding ci uh hi.Tua manin Lai Siangtho a tuiciin tung zong pawlkhatin um lo liang uh hi.Nam tuam tuam te tangthu pana kilasawn lel hi dinga ummawh bang om zen uh hi.Mi nam tuam tuam ten tuicinn tunna tangthu nei ahihmanin khatvei ciang leitung a tamzaw tui in vuk thei ding hi ci-a a ngaihsun pawl lah om zel uh hi.Tua te ngaihsutna ah Ice Age hun nunung lam kum 8,000-14,000 kiim ciang Climate hong kikhek vat dinga vuukte tui dinga tua nisat luat mana vuktui pana tuihu(vapour) in guahzu kiksak ding ahihmanin leitungah siatna a piangsak thei zah dongin tui tam dingin um mawh uh hi.Hih dan ngaihsutna pen ‘Climatic – change theory’ kici hi.

[Knowledge] U Thant tuikulh

[Knowledge] U Thant tuikulh

Labels: Fotos, Knowledge, Zolai Version

Click: Burmese Version


Hih a lim aa ii muh tuikulh no pen, Kawlgam mi te' angtang pih mahmah khat ahi, U thant cih min ki pia in ki tap sak hi.
Newyork khuapi, Manhattan aa om ahihi. Kician tak in gen ni ci leng, UN zumpi gei aa om hi in, UN Headquarter leh Gantry Plaza State pak huanpi ki kal aa East gunpi ah om ahihi.
A taktak in bel, hih tuikulh pen, a mathu, a ngeina aa ong om hi lo in, mihing te' bawltawm ahihi. 1907 beikuan lam in, German te US atung sumbawl lianpi ahi William STeinway ii bawltawm ahihi.
A tung in pen, gunpi gal khat leh khat kaan tan na, tuinuai lampi bawl ding a sawm uh ahihi. Tua kawm in, hih tuikulh no zong a bawl suak vet uh ahihi. Tua ahih man in, hih tuikul no ah, tui lam tawh ahi zong, tuinuai pan ahi zongh, ki pai thei sak uh hi. Hih tuikulh no pen 1977 ciang in, UN aa mipil Sir Chinmoy ii makaih na tawh kipsak na ki nei hi. Sir Chinmoy pen, UN ah gen.secretary in vaipuak la in U Thank tawh a ki maingap mahmah khat ahihi. A mah mah in, U Thant tuikulh ci in, a min a vawh ahihi. Tua ma in pen Belmont tuikulh kici hi. A zai na pen pi 100x200' kiim bek om ding in, leitung aa tuikulh lamdang 10 sung ah khat in ki hel sak uh hi. America ah tuikulh neu penpen cih in zongh ciapteh na ngah hi. Newyork Times magazine ah 1999 kum in, 30 century ciang a mang kha thei ding tuikulh ci in zongh ki gelh ngei hi. Hih tuikulh ah, vasa tuamtuam leh tui paan te kaai in, a et lawm dan pen tuampha diak hi.

[Knowledge] Bill Gates in khangno te tung a gen thu

[Knowledge] Bill Gates in khangno te tung a gen thu

Labels: Kammal hoih, Knowledge, Thucin thutang, Zolai Version

Bill Gates In Khangnote A Deihsak Thuhilhna Kammalte


    July8,2010 ni-in Bill Gates hauhna US$58.420316 billion in leitung
aa minthang Forbes magazine in ciamteh hi. Bill Gates hauhna minute
thum sungin US$50,000 in khangman tazen hi. A sum neih khempeuh dollar
peek khatin kigual leh leitung panin khapi dong giatvei tung ding hi.
Dollar peekhat vive in kiciang to ding hileh tai(mile)2,690 in sang
ding hi. Amah bek leitung gam khat in kiseh hileh gamhau kisimna ah a
76-na hiding hi.

** Bill Gates in leitung mun tuamtuam a zinna peuhah khangnote thu nam
sawm leh khat tawh thuhilhna neiden hi. Tua thu nam sawm leh
khatte-in:

     (1) Nuntak baihlo hi- tua hangin hanciam in.
(2)Leitung in nang hong khuallo ding hi, leitungah nopsakna na ngah
nadingin bang hiam khat mah lawhcing masa phot in.
(3)High School ah sangkah kawmin kum khatin US$60,000 na lawh khia
ngei kei ding hi. Mawtaw na neihna ding leh tua zah sum na neih
nadingin na thalawh masak kul hi.
(4)Na siapa genhak na sak leh ama siapa na muh dong ngak phot in.
(5)Burger moh bawl aa sumzon kithalawh ding zumna in ngaihsun ken, na
pi le pute’n tua bang aa nasemte hampha nasa uh hi.
(6)Na lawhcin kei leh na nu le pate hang hilo hi, tua hangin phunphun
kenla, na hih khialhnate panin sinin kibawlphat sawm in.
(7)Na pianma in na nu le pate na cimman(boring) khawllo uh hi. Inn na
neikhinzo, neek le dawn a lim nono hong pia zo, laisimna ding sum leh
paii hong pia zo ahih manun nang’ ngaihsutna sangin na pilzaw uh hi.
Na nu le pate cinlohna nagen ma-in nang’ cinlohna kimu masa-in
lunggeel pha in.
(8)Na sangkahna ah mi lawhcing leh mi lawhsam na mu ding hi. Ataktakin
cileng, sangnaupangte  adingin laisim lai zawhloh ding omlo hi. Na
siate nangawnin na zawh teitei nadingin hong hanciampih  ding uh hi.
Ahizongin, leitung nuntakna tua tawh na kibang lo hi.
(9)TV, Video aa na muhte a taktak hilo ahih lam mangngilh ken! Leitung
nuntakna ah mite niangtui sai-ah holimin tutu manlo uh hi. Nasep ding
zongin a muh uh teh tumanlo-in sem uh hi.
(10)Nang leh nang na kitheihcian kei leh midangte’n hong buaipih manlo
ding hi. Tua bang dingin hun na ngahnop hangin na nasepna company te’n
hun hong pialo ding uh hi. Na hun neih sunsun manpha takin zangh in.
(11)Mi tawh ki khawlkhawl khollo amau bekbek aa thungaihsunsunte
simmawh kha kei in. Na dam leh amaute nuai-ah na nasem kha ding hi.
Company na neih ma-in nang zong amaute bangin thu ngaihsunsunmi  na
hih ding kisam masa hi.

         Thunaak: Internet& Jm Paupu(D.Miss) Sermon via Bob Tuang

[Mimal tangthu] Kam Hau

[Mimal tangthu] Kam Hau

Labels: Mimal tangthu, Tangthu

Khanthuam’ tapa 6 te lak panin a upa pen Kamhau a hi hi. Lamzaang khua-ah kum 5 sung hausa na a sep khit ciangin, Tedim khua-ah teng nuam a hih manin Ramthlo hausa Tlangtirh’ kiangah, “Gal hat sa hat khat peuh ka tuah leh hong huh inla, kum 3 simin sial za bo khatta hong pia ning,” ci-in huhna a nget ciangin Tlangtirh lungkimin, a sang hi. Tua hun laitakin Tedim khua-ah Guite-te na teng khin zo uh a, ahih hangin gal leh sa hat lua a hih manin na teng tul zolo uh hi.

Zogam

Tua bang a huhna anget khit 1804 kum pawl ciangin Kamhau in Lamzaang khua panin Tedim khua satin na teng hi. Inn leh lo zong kician nei man nailo-in, Zo leh Thahdote in na sim pahpah a hih manin Lamzaang khua-ah ciahkik hi. Tua ciangin Kamhau leh Khoilamte in, Falam gam Ngaltu khua a ateng Maanggin zol uh a, 1810 kumin Tedim khua-ah hong teng kik uh hi. Midangte in Tedim hong bel uh a, inn 30 bang pha-in Kamhau in hausa semin Manggin leh Khoilamte in upa na a sem uh hi. Mi hong khang semsemin a sawt lo-in Tedim khua inn tampi hong pha hi. Tua ciangin gam lei lei ukna-ah mipil tampi kisam a hih manin, thu kikuppih dingin Mualbem khua Hauhtuang’ tapa Pauvum sap ding a sawm hi.

Ni khat Pauvum zol dingin Mualbem khua-ah Kamhau va pai a, Pauvum tual a lam kimlai va sam khia-in, “Tedimah hong teng inla kei’ nuai-ah upa hong sem in, kumsimin inn khat panin tha khat kong kai sak ding a, inn mun lo gam na deihdeihna kong pia ding hi.” ci-in a zol ciangin Pauvum zong lungkimin na zui a, Kamhau in a kamciamna bangin pia hi.

Tua bangin Kamhau in thu khempeuh keima thu hi cilo-in, Hatlangte, Kamdong’ tapa Maanggin leh Dimpi khua panin Tedim hong teng Hatzawte Khoilam tawh thu kikumin vai hong hawmkhawm uh hi. Gal vai sa vai peuh mah Maanggin vaihawm sakin, thu leh la peuhmah Khoilam vaihawmsak hi. Hih mi teng 3 tawh kikopin hong vaihawm ciangin Kamhau zong a hauhna a liatna hong khang semsem hi. A thu a la hong hoih hong pha a hih manin, khuakim khua pam in belin Tedim khua inn 300 hong pha ziau hi. Kamhau khang hunin mun tuamtuam panin mi tuamtuam in hong bel uh ahih manin, pau leh ham hong ki helzau gawp a, a sawt ciangin tu laitak a ih zat Tedim pau hong piangkhia hi. Tua bangin Kamhau leh a seppih upa teng 3 hong minthang mahmahin, Vaipheite in hih bangin la khat na phuah uh hi:-

(a) Sinthu soi ding Tualawn’ pa aw, do cih tulut Amthang’ pa aw,

(b)    Docih tulut Amthang’ pa aw, vannuai tulsial a tunna Zatual pa aw,

Na ci hi. (Tualawn’ pa Khoilam, Amthang’pa Maanggin, Zatual’pa Kamhaute a cihna a hi hi.)

Tedim khua inn 300 hong phak ciangun a nuai a bangin minam zui-in veng tuamtuamah hong teng uh hi.

1. Bonuai veng:    Tu laitak a galkap tualpi nuai nitumna lam teng hi a,Pauvum leh Teizaang mi pawlkhat teng uh hi. Galkap Tualpi pen Khuacin’ inn mun a hi hi.

2. Botung veng: Khuacin’ inn tungsiah nitumna lam teng hi a Zatual

leh Teizaang mi pawl khat teng uh hi.

3. Vaiphei veng: Bonuai veng pan a khang lam nisuahna lam teng hi a,

Vaiphei miteng teng uh hi.

4. Sekzaang veng ; Sakollam Ngennung lamka panin leilu lam teng hi a

Guite miteng teng uh hi.

5. Khuangzaang: Col. Dal Zakam’ inn dung to teng hi a, Thahdo mi

teng teng uh hi.

1. Kamhau’ zi neihna:

Kamhau leh Tedim khua nungak melhoih mahmah Cinnngul ki teng uh hi. Kamhau in zi a neihin hausa hi nailo hi. Tedim khua panin Phuaizaang khua-ah Ciinngul a pi khat laitakin meiiluum in mopite a nungah zui litlit hi, kici liang hi. Ciinngul ih cih pen Guite’ tanu hi a, mopite meiiluum in a zuih ciangin, Guite khua leh tui in lamdang sa-in patau uh a,(Bang hang hiam cih leh Sukte gal leh sa a hong hat ciangin a nial ngam loh manin a tensak uh a hi hi.) Guite’ vangletna teng Ciinngul in paikhiat pihin Sukte puak hi kha ding hi, ci-in ngaihsun uh a, “Tu-in ni dang sangin ih vaang kiam zaw kha ding hi,” ci-in pautau mahmah uh hi.

Mualbem khua hausa Khanthuam hong sih ciangin, a ta neu pen Zapau in, a pa’ gam’ hong luah hi. A ta upen Kamhau in pawi hangte leh apa’ hangin, Tedimah Hausa hong sem hi. A sunghte Guite tawh kido lo napi simmawh bawlin khel gamtat hi. Gamgi khen ding hi hang, ci-in Guite inn khuam bul cin tektekah gi khen sese hi. Guite hausapa lungkim lo-in khasia mahmah hi mah ta leh, Maangpi tawh kisiat ding lah kihta a hih manin khasia-in mal lam zuanin tai hi. Hih bangin Guite’ pem khiatna khua leh gamte Kamhau in luah to zel hi. Kamhau’ ukna khua leh gamte Kamhaute kici a, Mualbem Zapau’ ukna gam leh khuate Sukte hong kici hi. Kamhau pen neih leh lam sum leh paai a hauh banah tapa 6 nei a tuate in:-

(1)   Zatual, (2). Thuamlian, (3). Lianthang, (4). Thang Khawpau, (5). Haupum, (6). Khuacinte a hi hi. Khuacin in tapa nei lo-in khangmang hi.

Sukte beh ngeina pen nauzaw innluah hi a, Khanthuam in a tapa upen Kamhau Lamzaangah inn a tuansak lai-in, inn tuansa gawhin, tua ni-in Khanthuam in hih la na phuak hi.

(a) Taang ni bang ka sat laitakin vonmaang gua bang tuangsak ing.

(b)      Vonmaang gua bang tuangsak ing, damtui gam bang maangsak ing.

2. Kamhau’neih na minthangte:

Kahau pen a hauhna a liatna hong khan semsem banah, khamtung gam a sum minthang kici khempeuh a ngah zawh nadingin hong hanciam hi. Sum minthang a ngahte panin Langza’Dak minthang nei-in, Tonkai’ dak bu zong sial 100-in lei hi. Ngalngam’ tuithawl hu 1, Thangho’ phihtu kuangpi 1, hih teng nei hi. Thangpum kitatna takok lam 9, Mualpite’ zamkaang minthang leh, Khamtung gam a sum minthang a ki gen khempeuh lakah Guite nuai suk dak minthang leh Maangvungte khut sung a Paitepa’ zamno mai simloh, Kamhau’ khut sung tung khin hi. Sawmsiing khi minthang zong deih mahmah a hih manin angah zawh nadingin hih bangin thu hong ngaihsun a, Maang song’ kiangah, “Na tupa leh ka tanu ki teng sak leng ih zukuang ih sa kuang hong kinai  ding a, nuam mahmah ding a hih manin, sunghta putu suak leng hoih na sa uh hiam,?” ci-in zasak hi. Maangsongte zong Ukpi khat sungh a nei ding ci-in  nuamin thukim pah uh hi, “Tua a hih leh, Zuthawl-in bang hong pia ding ka hi uh hiam?” ci-in a dot sak tak ciangin Kamhau in, “Hih tegel’ kiten nading lawmlawm Sawmsiing khi minthang hong pia le ucin kilawm sa ing,” ci-in gen hi. Maangsongte zong Kamhau’ tanu zi-in ngah ding ci-in lawp takin Sawmsiing khi minthang zuthawlin hong pia pah uh hi. Tua ciangin Kamhau in zong a tanu Zaniang a mo dingun pia pah hi. A kha ding 3 tawh gamngai dong khasak hi. Mo khate ciah kik ding hong sawm ciangin Zaniang zong a lawmpa tawh omkhawm nai lopi-in a innah hong ciah kik mawk hi. Apasalte in a pi kik uh hangin ut nawnlo-in hong kikhen uh hi. Tua Sawmsiing khi minthang a ngah theih nading a Kamhau’ ngian a hih lam a lawmte in a phawk khalo a hi hi. Zuthawl pen mo man lah hilo, kisikkik theih lah hilo a hihmanin, a deihdeih sawmsiing khi minthang a ngah suak hi. Zuthawl kipia lakah tua sang a tam manzaw zuthawl omlo ding hi. Tua hunin sawmsiing khi tang khat in sial 10 bang man hi. Kamhau in khamtung gam a sum minthang khempeuh ngahin  a minthang semsem hi.

3. Kam Hau’ Upadi:

Kamhau in  Tedim gam leh Tonzaang gam khua 135 sung uk a, a ukna gam zai-in mi tampi ong pha a hih manin thu vaihawm ding hong tam semsem hi. A gam sung hoih tak a a uk theih nadingin, thukhun hoih tak a bawl ding ngaihsun a,  hih a nuai a mi teng tawh kikumin vaihawmna nei uh hi.

1. Kamhau                         Ukpipa                         (Sukte              )

2. Pauvuum                        Upa lian pen                (Sukte              )

3. Maanggin                        Gal leh sa vaihawm    (Hatlang           )

4. Khoilam                          Thu leh la vaihawm     (Hatzaw           )

5. Kimthuam                      Upa vaihawm              (Zillom )

6. Telkhaat                         Upa vaihawm              (Hatzaw           )

7. Pau-am                          Upa vaihawm              (Samte                        )

8. Cinkim                            Upa vaihawm              (Samte                        )

Hih mi teng tawh Kamhau in galvai savai, thusia lasia, a om ciangin, mai lam kalsuanna-ah gam sung mite hoih takin a uk theih nading leh gam khangto, gam kilem,a suah nadingin thukhun hoih takin hong bawl hi. Tua thukhun pen A.D 1848 panin hongki zang to a, “KAMHAU’ UPADI” kici hi. Maangkang kumpi in hong uk ciangin, gam leh lei tawh kituak Upadi a hih manin, pawl khat zangin Pawl khatte tu hun dongin ki zang to suak hi.

Tua thukhunte a lungsim vuah ciamteh uh a mangngilhlo uh hi. Pum zamang in ukpi hong sep ciangin Gamngai upa Pau Cinlian leh Tonzaang sang siapi Sia Seinte’ huhna tawh  1972 kum ciangin hih thukhunte laibu-in hong bawlkhia hi. Hih Upadi sungah ukpipa Hau Cinkhup in a hun tawh kizui-in pawl khat behlap hi. Kamhau Upadi sungah khen 25 leh khenneu 143-in khenin zolai leh kawllai-in ki gelh hi. Tua khenpite in:-

(1)    Thu neite’ zuih ding lampi                   (13) Gamkang thu

(2)    Thuneite’ zuih ding ngeina                  (14) Zehpikna

(3)    Logam thu                                          (15) Guktakna thu

(4)    Singkung leh guah thu                        (16) Thu imcip thu

(5)    Thangsiahna                                       (17) Mindaisakna thu

(6)    Ganhing annekna thu                         (18 ) Nupa kimakna thu

(7)    Khutkhialhna thu                                 (19) Zi ki sutna thu

(8)    Tungsiah thu nialna                            (20) Numei buanna thu

(9)  Misuamna thu                                     (21) Innluahna thu

(10)  Ganhiang suamna thu                       (22) Zi tam neite innluahna

(11) Mi haitatna thu                                    (23) Sum leitawina thu

(12) Tungsiah thunialna thu                       (24) Saliang man tanna thu

Hih thu teng tawh gam hong uk ciangin gam sungah kilemna omin gam hong khangto mahmah hi.

Zomi te France pai na (1917-1918 kum)

[Thu ciapteh] Zomi te France pai na (1917-1918 kum)

Labels: Thu ciapteh

PIANCIT PAINA THU (1917-1918)

Leitung galpi khatna 1914 Kumin piang a, tua gal kidona-ah Englandte tampi si-in Kham dangka Pound 900 Million val bei hi. England leh France kipawlin, France gamah a kisim laitakun Englandte in amau’ huhna gam tengah huhna mah ngen kawikawi uh hi. Tua hunin Ih Kawl gam England Kumpi in hong uk khin a hih manin, Kawl gamah zong huhna hong ngen kik uh hi. Sukte gam, Kamhau’ gam, Sihzaang’ gam tengah huhna ngen dingin Mawlaik panin Deputy Commissioner D.D.F.O.Lowler 1917 January nipi masa sungin Tedim hong tung hi. 

Hih Ukpi 3 sung tengah ki kaikhawmin, gal huh ding gen hi. Amasa-in Ukpite in nanial uh hi. A hi zongin F.O Lowler in, 1891 June 23, ni a Thangpi a kibawl, kiciamna bulphuhin huhna hong nget ciangin, Ukpite in nanial ngam nawnlo uh hi. Hau Cinkhup makai-in Ukpite in amau’ uk sung ciatah mi kaihkhop sakin, Sukte gam panin mi 250, Kamhau’ gam panin, mi 700, Sihzaang gam panin, mi 83, a gawm mi 1033 ngah sak uh hi. A kingen zah sangin a tam zaw ngah sak uh hi.

Gal huh ding a apai mite Tedimah kha 3 sung nasep sinsak phot uh hi. Kha 3 sung a man khit uh ciangin inn lamah kha lang sung ciah khuan pia uh hi. 1917 May 15 ni-in gal huh ding mi 1033-te Tedimah kituah uh a, France gal mai a na sem dingin, Tedim khua panin anuai a bangin pai uh hi.

1917 May 27	Zingsang nai 10:00 Tedim panin Dimlo-ah giak uh hi.
1917May 28,	Dimlo panin Thangpi-ah giak hi.
1917May 30,	Tulsuk panin Kawlpi-ah giak hi.
1917 May 31,	Kawlpi panin Gunkhawm tunginGunkhawm pan in tum theih a tuamtaum tawh na muak uh hi.
1917 June 1,	Gunkhawm panin Tembaw tawh Myanyan June ni 4 ni-in         Tung uh a zan thum tam uh hi.
1917 June 8,	Myanyan panin Yangon tung uh hi. Sya Po tha in zing an nekpihin France pai ding teng, zatep bu nih, Khakkhi puan ak khat tek, pheituam khat, puanak tungsilh khat mainul khat leh sunsiah phel khat tek pia uh hi.
1917 June 9,	Zogam panin a ki kha sukte tawh mangpha kikhakin, Yangon pan Tembaw tawh ding khia uh hi. 1917 June 13,Nitak nai 5:00 India Khuapi Culcutta tung uh a, Kei-zaangte Khoigin a kam    sung meima-inZato kahin Zato panin si hi. A luang mei tawh hal ding deihlo uh a hih manin, Vung Zakham maikai-in Khuapi  tai 15 a ki gamlatna-ah vui uh hi.
1917June 24,	Nitak nai 5:00 Culcutta pan Meileng tawh Bombay pai hi.
1917June 28,	Nitak nai 6:00-ah Bombay khua tungin Zato-ah ki ensak  uh a, khua vot thuak zolo mi 15 ciah sak uh hi.
1917June 29,	Nitak nai 3:00 Sente’ Tembaw tuangin Bombay pan ding khia uh hi. Arabia tuipi tungah ni 13 sung paisuak uh hi.
1917 July 14,	Nitak nai 5:00-in Eden huan tung uh a Inn sung lutpah                                                         theilo uh hi. Nai.7:00Pm, ciang lut thei. uh hi.
1917 July 17,	Eden pan Tembaw ni 4 sung pai uh a, Izipt gam Suez canal zuan uh hi. 1917 ni 21 ni-in, Suez tung uh a, Tua kikal sehnel gam bekbek a hi hi. Suez canal pen Englandte’vanleng phualpi hi a, a galvanlengte uh muhnop sa mahmah uh hi.
1917 July 26,	Nitak nai 6:00 Suez Khuapi panin Meileng tawh pai uh hi
1917 July 27,	Zingsang 8:00 Egypt gam Alexandria khuapi tung uh a, nitak lamin Tembaw tawh paisuakin Italy gam Toronto khuapi tungin nisat mahmah na mun hi a, amau’ suan tawm singkung bek po hi. Sing ham mahmah hi. Tui nisa-ah lumsak masa-in tua khit ciangin meitungah suang pan uh hi. Sing kung tungah Toktol tam mahmah ahih manin, Toktol khua ci-in ciamteh uh hi.
1917August ni 6 ni-in	Toronto khua panin meileng tawh ni 8 sung pai-in, Moh leh niantui bekbek tawh vakin nuamsa mahmah uh hi.
1917August14	ni France Khuapi Marselles a tun uh ciangin, Khasum Rs. 50/- Oversea Allowvance Rs. 100/- sang sak uh hi. Sukte leh Sihzaang mi teng, No.61 Labour Corp min pia-in, Kamhau’ mi No. 62 Labour Corp min pia a, Capt, Rund-all in uk hi.
1917 Aug 24,	Marselles khua panin meileng tawh ding ding khia kikin, England leh Germanyte’ kikapna mun Bikot camp 1917 August 27 ni-in tung uh hi. Tua lai-ah nasep laitakin, Tonzaangte Neng Zalang in khutlet bomb khat puakkhamsak kha a hih manin, mi 6 liamin tuate Zato pension kipia hi.

Bikot camp panin Brazil-ah ki tuah kik uh a, tua campah a om sungun sun leh zanin thauging bekbek kawlmim kanpuak ging bangin tai 100 huam sung, thautang san ziahzuah ci-in lim gen mahmah uh hi. Piancit paite pen galkap hilo-in vansiate khawmtuah, galte’ zat ding thauvui thautang annek tui dawn, a suah a sang leh a kisam bangbang asem uh a hi hi. Tua bangin a lauhuai galmai samai-ah lungleng khuangai-in a om sungun, a ki hehnepna-un, Alexandria khua a a om sung vua, Gualkhate tawh tuipek a kidemna uh khawng, Arabia tuipi tung a nawk lai vua, amuh uh ngasa inn ciacia a phate kikumin holim mahmah uh hi.

Alexandria a om sungun Gualkhate tawh tuipek kidem uh a, Gualkha galkap 9, Zato kipuak a hih manin, tuipek ding kikham hi. Arabia tuipi kantanin, tui hualte nasia lua mahmah ahih manin, Motor kham bangin khamin an ne zolo tui dawn zolo-in a om laitakun inn ciacia, saipi ciacia a pha ngasa (Whale) gual khat ciangin tul val bang a pha ding tai 2 sung bang, nisuahna pan nitumna lam manawhin a tai hanhan ngasa a muh uh ciangin lamdang sa-in muhnop sa mahmah uh hi.

Bikot khua a om lai-un ana seppih uh midangte tawh, lungnop nadingin bawlung kidem zel uh hi. Tua kidemna-ah na zo uh a hih manin, Piancitte in lamdang sa-in a pahtawina uh Lian Zakham in a nuai abangin la na phuak hi.

(a) Piantui a zal mi zatam te’n, kua’ vontawi bel hiam ci e,

(b) Kua’ vontawi ci’n khau bang sut ing, puvon ngo sal bang lange,

Hih bangin ihpu ihpate ahunhun amunmunah, midangte’ sangin a hatnate uh na lakkhia uh a, mite’ zahtak leh pahtwi-in na om uh hi. Bikot campah a om sungun, England galkap suah theih nadingin British Parliament-ah ngen uh a, England Kumpi in ih pu ihpate, galhan dan, galsiam dan thei khin uh a hih manun, piak dingin thu zasak uh hi. Tua hun laitakin Tonzaangte Khup Zadal in, kampau khialhna khat tawh kimanin, a suahtak khit ciangin buksau natna khat tawh si hi. Tua pa pen England galkapte in thupi takin zahtakna tak tawh vui uh hi. 1917 December kha-in, England Prime Minister leh galkap maang pawl khatte Brazil camp-ah pai uh a, Tonzaangte Gin vum leh a lawmte pawl khat in, zahtakna na pialo kha uh a hih manin kha 3 sung thong kiasak hi.

2. London paina:

Brazil campa na semte khen 78, pha uh a, tua sung panin No. 61 leh No. 62, Labour corpte’ hanciamna leh nasep siamna minthang mahmah a hih manin, Kumpi King george V. in, “Ki mu nuam ing,” ci a hih manin, a kimu dingin corp 2 sung panin ki teng khia uh hi. Tuate Kumpipa tawh kimu dingin, 1918 Marc ni 9 ni-in ding khia-in, ni 10,ni-in, Boulogue khua pan Tembaw tawh English Channel kantanin pai uh a, nitak nai 4-in England Tembaw khawlna tung uh hi. Tua panin Meileng tawh pai-in, nitak nai 9-in London meileng khawlna tung uh hi. Tua lai-ah Uliante in na dawn uh a, Indiate’ tunna inn khat (9^th Floor) tung sak uh hi.

Tua inn deipi sungah Prime Minister leh Minister dangte in na muak uh hi. Zingsang nai 11, ciangin kumpipa tawh kimu ding leh, galkap puan silh ding vaikhak uh a, khut kilenin kikhen uh hi. England Kumpi in a khangkhangin atenna Buckingham place-ah Kumpi King george v. tawh kimu ding a pai teng:-

1.                   Mawlaik Deputy Commissioner F.O. Fowler

2.                   Subidar  Mangpum                                              ( Khuasak            )

3.                   Interpreter Thawng Zakai                         (Muizawl           )

4.                   Company Commender.Songtheu              (Tualzaang       )

5.                   Interpreter.Thuampau                                         (Khawsak         )

6.                   Company Commander. Vungh Zakham              (Tonzaang         )

7.                   Company commander. Kam Zanang                  (Tuipi                )

8.                   Company Commander. Hau Zanang                   (Heilei               )

9.                   Platoon Comander. Hang Khawcin               (Tuitawh            )

10.               Platoon Commander. Thiaukam                                  (Kaptel              )

11.               Sergeant. Vialzen                                              (Vangteh          )

3. Kumpipa tawh kimuhna:

1918 March 11 zingsang nai 8,-in,Uliante in a zintunna uh panin Motor tawh la-in Kumpipa tawh Kumpipa’ innah paipih uh hi. Khamtawh kizut a sau mahmah Saha 4 leh sailu 2 a kisuanna Kumpipa’ zin dona inn dei sungah kigualin, Kumpipa’ hong pai ding ngak uh hi. Zingsang nai 9-in Kumpipa a galkap puan tawh kizemin huihluai tawh hong tuak sukin, 3 vei zahtakna a piak khit uh ciangin khut kilenin a nuai a bangin kumpipa in thu hong gen hi.

4. Kumpipa’ thu gente:

“Hih zahtak a agamla, Zo gam Tedim panin, gal huh ding a hong pai Labour corp 61 leh 62 sung panin, galmai nasepna khempeuhah deihsakna tak tawh, hanciamin paubanna omlo-in, hoihtakin zo cih ka za hi. Ka lungdamna bangmah tawh kiteh theilo-in ka lungdam hi. Leitung hunah, England Kumpi’ thu neihna a bei matengin, England mi khat ka om lai tengun, Zomi, Tedim mi peuhmah gilkial dangtakin hong puksisak lo ding hi ung. Na gentheihna mun khempeuh vuah England Kumpi in hongkem ding hi ung.” Ci-in thu a gen khit ciangin, “Note tawh sau veipi ka om nop hangin, ka nasepna tamin hun ngahlo ka hihmanin, ka dah mahmah hi. London khua-ah na om sungun, na lamdang tuamtuamte Ministerte in hong lak kawikawi ding hi,” ci-in thu a gen khit ciangin, khut kilenin kikhen uh hi.

Tua khit ciangin Zo mi Tedim mite, Kumpipa lim kisuanna inn dei sungah, man (Photo) kizaih uh hi. Minister khat in makaihin kumpipa’ inn sung panin nidang lai a, mawhnei kumpi Nu’ kithahna nalamdang tuamtuamte etpih kawikawi hi. Kumpipa inn tai 2 huam bang zai hi. Inn tungah dial mun 16-ah kikhai a, Nidang lai London khua meikatna leh, zinlinna te lim sungah ensak uh hi. Kumpi inn sungah naupang kum 12 gual a pha mi 150-te in, Kumpipa’ lungnopna dingin, nisimin Benkhaza (Music) tumin lam zel uh hi, ci-in ki gen hi.

1918 March 12, ni-in Parliament kikhopna-ah kahsak uh hi. A pai ma-un Kumpipa Zum khan vel masa uh hi. Parliament kikhopna inn sung a lut uh ciangun, mipite in zahtakna pia-in ding uh hi. Kikhopna a man uh ciangin, Kawlgam Governorpa in, a innah moh leh  niangtui tawh vak hi. Tua lai a nasep sin Kawl mi 13-te tawh, kiho khawmin nitak ciangin Cenima etpih uh hi. 1918 march 13, zingsang an nek khit ciangin,  ganhing khawina (Zoo) en uh hi. A ciah uh ciangin Whiter leh whiteson companyte in, Singgahtui tawh vak hi.

1918 March14 ni-in, England Kumpi a sem ngei khempeuh leh, vaihawm ulian khempeuhte’ laizangah, Kumpi King george V. 4-te’ innkuan lim omna etpih uh hi. Tua mun a cing galkap khat, Songtheu in milim sa-in a khamul a lawnsak kha hi. Tua lai pen milim lah mihing kisa, mihing lah milim kisa thei hi, ci-in gen uh hi. Nitak lam ciangin, Kham leh ngun ki bawlna sik namkim leh van tuamtaum kibawlna munte en uh hi. 1918 March 15 nitak an nek khit ciangin, London khua nawl a om vanleng bawlna mun etpih uh hi.

1918 march 16 ni-in India Governorpa in an vak a, An a nek khit uh ciangin Roll company leh Whiteson Companyte in sam leuleu uh hi. Nek theih dawntheih tuamtuam tawh zindo uh hi. Roll Company inntung a sang pen munah, bawlung tualpi om a, tua panin London khua sung kimu thei hi. Roll Company inn laizangah inn tung leh inntual kikal, khuampi khat om a, a kim kot mel tuamtuam nei singpek tawh kizem hi. Sabuai bangin ki umcip hi. Tua khuam pen a tawntungin kipei den a, van leite in khuam kipei den tunga sabuai sungah sum khia leh vante a mau’ gei sabuai-ah hong pai lel hi, ci-in gen uh hi. Lampi gei vanzuaknate-ah, a van man zah ding sum kikhia-in, Switch ki mek leh a leinop van pusuak hi. 1918 March 20 ni-in ciah kik ding gelna a om hangin, Germany galkap a kiman tul 300-te puakna-in Tembaw teng kizang ahih manin, ciah theilo uh hi.

1918 March 22, ni-in London pan ciahkhia-in, Brazil camp a tun uh ciangin, England galkap lut theihna ding lai tunga, galkap a suak nuamte galkap dan sin dingin Lyons camp-ah kisuan uh hi. Tuate pai khiat ni zanin, thautang koihna innpi bomb in kha a, tua munah ki om ngam nawnlo-in mundangah kitai hi. Galtaina mun panin, England galkap a suak nuam lote inn lamah ciahsak hi. England galkap suak a, Lyons camp a galkap sinte a nuai abangin za kipia hi:-

1.Capt F.O Fowler               – Colonel

2. Gordon                             – Lt. Colonel

3. Warald                             – Major

4. Ohtakhin                          -Captain

5. Thawng Zakai                -Captain            -Muizawl

6. Thuampau                        – Captain -Khuasak

7.Vung Zakham             – Leutanant            -Tonzaang

8. Songtheu              – Leutanant            – Kaptel

9. Kam Zamang             – Lieutanant            -Tuipi

10. Kimvungh             -Lieutanant            – Lamzaang

11. Do Cinlian              -Lieutanant            – Haupi

12. Cinkhai                            -2^nd,Lieutanant -Tuitum

13. Lian Zathang             -Lieutanant            – Laitui

14. Pau Cinlian              -Lieutanant            – Gamngai

15. Pau Zacin                        -Subidar            – Suangzaang

Atung a bangin za tuamtuamte a piak banah, Sergeant, Corporal akipan za tuamtuam a ngah tampi ki om hi.  Tuate Lyons camp-ah nipi 3 sung galkap dan a sin sak laitakin Zo gam panin laikhak ki ngah a, Kuki Thahdo leh Hakha gal kisimna hangin lo ki kho theilo cih thu a zak ciangun, Zo gam ciah kik ding a khuan ngen uh a, 1918 July kha-in hong ciahin August kha-in Tedim hong tung uh hi. Piancit gamah Kum khat leh kha 6 sung na sem uh a, galmai leh natna tawh hong sihsante longal, Mangkaang Kumpi in minphatna PAHTAWINA LAI (Certificate) khat ciat pia uh hi.

CERTIFICATE

This is Certificate is given to ——————-who enrolled voluntarily as a mate in the Burma labour Corp and worked in france for the British Government during the great war. He worked loyally and well in all; weather by night as well as by day and every advance and often dangerous condition and willingly and cheerfully bare his share of the burdens of the day. This fact should ever be remembered to his credit by those who have any dealings with him and may all officials deal with him and his family in the liberal for him on which the place his service at the disposed of the empire in its hour of stress may he and his family never be forgotten.

Sd/-

F.O Fowler  (Capt)

Burma Commission

Piancit pai Labour Corps a nasemte lungzuan khuangaihna tuamtuam kawm kalah mi 23 te in hong nusia uh hi. Tuate in:-

1. Ngulngin               4.            10            .1917

2. Thangeng             25.            12.         1917

3. Tutlangh               29.            10.         1917

4. Tuangpum            9.            12.         1917

5. Vialdam                9.            12.         1917

6. Ginneng               31.            10.         1917

7. Vumdai                26.            10.         1917

8. Kamang               28.            10.         1017

9. Ngokam               9.             10.         1917

10. Tualkim                     4.           9.          1917

11. Lunkap                 7.            12.         1917

12. Khoigin                 6.            6.         1017

13. Khup Zadal      15.        10.                    1917

14. Lang Zakhen    12.          2.                     1917

15. Suanthawng     29.        1.          1918

16. Zuanpum          28.       12.                    1918

17. Ngindam               7.         3.         1918

18. Siatlut                  9.              3.         1918

19. Kamngul             27.        4.          1918

20. Paupum             29.        1.          1918

21. Sonneng               7.       11.        1918

22. Kaingin                23.      10.          1918

23. Maha peng        21.      12.         1918

Hih atung a asite Piancit gam galpi masa (1^st World war) hun sung a, a site’ hanah kivui-in, hancingte in limtakin cing uh hi, ci-in ki gen hi.