LAI SIANGTHO
( Holy Bible )
Kha Siangtho vangliatna tawh a ki gelh Pasian thute kikholna laibu pen Lai Siangtho kici hi. Mikang kam in Holy Bible kici a, Greek kampan a ki lasawn a hi hi.a khiatna in Siangtho Laibu cih na a hi hi. A.D 390 masiah Lai Siangtho a bu in ki nei nailo a, Pawlpi-in kambek tawh a thu in hilh hi. A.D 390 ciangin Topa Jesu thu kigelhna laidal laibute khempeuh kikai khawm a, tua teng sung pan Bu 27 kiteel khia hi . Topa Jesu hun masiah a, Laizialte' sungpan Bu 46 Kha Siangtho panpih na tawh teng khia uh hi.
Catholic Canon
Lai Siangtho a lui le a khak gawm bu (73) te pen, A.D 393 kumin Hyppo kikhopna le, A.D 397 kumin Carthage khua thu kikupna pan in Catholic pawlpi-in kipsak hi. Tua hun lai tak in RC a hilo Christian pawldang om nailo hi. Christian a ki cih nak leh RC te hi pah hi. A.D 1546 kum Trent Kikhoppi panin hong kipsak beh lai hi. Tua a hih manin hih Lai Siangtho sungah a ki hel lote, Apocrypha kici hi.Nuzui te tawh a kizom Pawlpi-in a san' Laibu (73) te anuai a bangin ki khen hi.
{ 1 } Procanonical
{ 2 } Deuterocanonical
{ 3 } New Testament cih bangin ki khen hi.
1. Procanonical
Procanonical cih kammal in Canon masa pen a hi hi. Hihte Lai Siangtho bului hi a,( 39 ) pha hi. Hebrew kam tawh kigelh Lai Siangtho lui bute a hi hi. Jew mite,Christian Catholic te leh Protestant a tam zawte in Kha Siangtho Huhna tawh ki at hi ci-in sang uh hi.
2. Deuterocanonical
Deuterocanonical te pen Lai Siangtho lui bu (7) te a hi hi. Pawldangte'n a mangngilh uh Lai Siangtho bute in;
1/ Tobit
2/ Judith
3/ Wisdom
4/ Ben Sirach { Ecclesiasticus }
5/ Barush
6/ 1 Maccabees
7/ 2 Maccabees
Hih teng ban ah Daniel bu sungah, alian 12 ciangbek nei uh a, 13 leh 14 te nilkhia uh hi. Deuterocanonical pen Canon nihna cihna hi a, Hebrew laibu lui sungah kihel loin Greek laibu lui " Septuagint Version " a kici laibu sungpan a kila khia a hi hi. Greek pau ' a kizatna a teeng Judah mite'n hih Lai Siangtho lui Bu 45 te , Christian Catholic te mah bangin zang uh hi.
Protestant te inLai Siangtho bului (39) bek nei uh hi. Bu (7) deihlo uh hi. Tuate Apocrypha ci uh a, a hih hangin Catholic te'n a hih leh , Lai Siangtho laibu manpha ci uh hi.
Tuaban ah Greek text Lai Siangtho bute' sungah ;;
[ 1 ] Letter of Jerimiah
[ 2 ] Prayer of Azariah
[ 3 ] The Song of the Three Young Men.
[ 4 ] Susanna
[ 5 ] Bel and the Dragon
[ 6 ] 1Esdras
[ 7 ] 2Esdras
[ 8 ] Prayer of Manasseh
Cih thu lute zong kihel lai hi. Tuate zong Protestant-te'n la lo uh hi.
3. New Testament - Lai Siangtho thak
Lai Siangtho thak sungah Laubu ( 27 ) om a, Christian Catholic Pawlpi le Protestant a tam zawte'n Pasian' Kha Siangtho huu tawh a ki-at ci-in Lai Siangtho bu-in nei uh hi.
Catholic Apocrypha
A ki-at lai tampi lakah Lai Siangtho dinga kilawm le a kilawmlo a ki teel khia banah a kiteel lote zong tampi nei lai hi.
Lai Siangtho bului ' Apocrypha
Lai Siangtho lui ding a a kiteel lo laibute ( Lai Siangtho lui Pocrypha ) pen Enoch le Jubiless-te in a at laibute leh Petriarch 12 te'n thukhunna Pholocrates-te' kiangah Arsteas' Laikhakte, Maccabees a lian 3 leh 4 , Esdras a lian 2,3 le 4 , Baruch a lian 2 le 3 te, Solomon Salante, Moses van kahna thute a hi hi. Hih pen Catholic ' Apocrypha kici hi. A min neite' gelh hi lo a, a kivawh tawm a hi hi. Protestant-te in hih laibu te Pseudoepigrapha ci uh hi.
Catholic Lai Siangtho thak' Apocrypha
Lai Siangtho thak khit hun ciangin zong Apocrypha om ve ve hi. Tuate pen Hebrew mite' thupha laibu , St. Peter at thupha laibute, Egypt mite' at thupha laibute, Nungzuipi 12 te at thupha laibute, St. Matthew min kivawh thupha laibute, St. Thomas gelh thupha laibute, Arabic kam tawh a ki gelh Topa Jesu neulai thu ki atna Thupha laibu te, Nicodemus gelh thupha laibute, lettamapa Joseph tangthu te le Thupha ngah maria tangthu thupha laibu te a hi hi.
Palestinian Canon
Hih pen Palestine gam a om Judah mite' at a hi hi. Hebrew kam tawh a ki at hi a, khen 3 in ki khen hi.
[ 1 ] Tora ( ngeina laibu 5 te )
[ 2 ] Nebiim ( Kamsang masa le a nunung ci-in ki khen a , kamsang masa te pen = Joshua , Thukhen mangte , Samuel le kumpi te a hi uh hi. Kamsang nunung te in = Isaiah , Jeremiah , Ezekiel leh kamsang neu 12 te a hi uh hi.
[ 3 ] Ketubiim ci-in ki khen hi. Hih laibu pen salan ( Late ), Pilna le a dang laibute huam hi. Tua ciangin Palestine Canon sungah a vekin laibu (24) om hi. Hih laibu (24) te pen Lai Siangtho lui sungah Catholic laibu (39" Procanonical ") te le Protestant-te' Lai Siangtho bu 39 tawh ki bang hi.
Judah Canon
Hih Lai Siangtho lui laibute, Topa Jesu hong paima kum1000 khit hun pawla, ki at a hi hi. Tuate lakah a ki at masa penpen in Exodus " Paikhiatna" laibu a hi hi. Daniel laibu pen B.C 200 hun lai-a ki-at hi a, Wisdom "Pilna" le Maccabees pen B.C 100 hun lai-a, ki-at a hi hi.
Alexandrian Canon
Alexandrian Canon in, Palestinion Canon sangin ki cing zaw hi. Bang hang hiam cih leh Alexandria khua a om Judah mite in Palestine gam a teeng Judah mite sangin laibu kaihkhop hatzaw uh hi. Hih Lai Siangtho pen Greek kam tawh ki-at hi a, Alexandria khua a teeng Judah mipil (70) te'n Hebrew Lai Siangtho panin Greek kam tawh B.C 275 kum in a gelh uh a hi hi. Hih Lai Siangtho pen " Septuagint { LXX } " ki ci hi. Greek pau - in 70 a cihna a hi hi. Palestinian Canon sungah laibu 24, Catholic laibu 7 ( Deuterocanonical ) te le Apocrypha laibute tawmtawm kihel hi. A bekpi'n laibu 45 om hi.
Latin Vulgate
Topa Jesu Palestine gamah a teeng a hih manin, Palestine Canon Lai Siangtho bu zangin ki-um mawh hi. Lai Siangtho thak a ki-at ma-in, Lai Siangtho ( Holy Scripture ) kici zaw hi. Lai Siangtho bu a thak a ki-at khit ciang bek in Lai Siangtho a lui le a thak hong piangkhia a hi hi.
A.D 100 hun ma in, Lai Siangtho thak te ki-at khin zo hi. A masa in Greek kam tawh a ki-at a hi hi. A.D 200 a ma akipan Rome kumpite' uksung khempeuh ah , Latin kam ki zang ahih man in thuzui masa te Latin kam zang uh hi. A.D 383 in Pope Demasus in Lai Siangtho khempeuh kai khawm in Latin kam tawh St. Jerome tei khia sak hi. St.Jerome in Hebrew , Greek le Latin kamte a ma pianpih kam bangin a zang thei a hi hi.
Tuni a kizang Lai Siangtho
Lai Siangtho Alui leh a thak kigawm in bu 73 pha hi. A lui 46 le a thak 27 a hi hi. A.D 393 kumin kikipsak khin hi. Christian kipatcil lai ate'n Lai Siangtho bu 73 mah nanei uh a, Martin Luther Pawlpi sungpan hong peng lenkhiat ciangin, a lui sungpan bu 39 leh a thak sung pan 27 a ki gawmin bu 66 teng bek hong lakhia ziau hi. Tua te in tu a Protestant-te neih bu 66 a hi hi. En pak leng hang Lai Siangtho bu 66 a pha dingin a kilawm het lo hi. Bang hang hiam? Cih leh , nambat 6 pen a hoih lo a ki ciam teh hi aa, 66 ong ki thuap ciangin hoih mahmah lo a hi hi. Kitak huai lipkhap huai a cih na hi. 666 a hoih lo pen sahang numbat a hi hi. Lai Siangtho bu 66 in Lai siangtho dingin a ki lawm het lo a hi hi. Christian masa te in hih bang nambat pen Lai Siangtho bu phazah dingin deih hetlo ding uh hi. Tanglai-in a lipkhap mahmah, nambat na hi se se uh hi. Tua a hih man in tanglai Christian masate in a omsa bang mahin lakhia selo in Lai Siangtho bu 73 mah na zang uh hi.
Lai Siangtho a ki ciangtan hun dongin laidal omnailo a, savun dalpi tungah haksa pi-in a kigelh a hi hi. Tu hun bangin a khanlian, a neu cih zong ki khen nailo-in ki at suk miaimuai lel hi. Nambat khat pen bukhat hi pahpah lel hi. Tua a hih manin Lai Siangtho bu khat ngah na ding hun sawtpi bel a, lah vanglian mahmah a hih manin bu tawm
In man tam hi. Savun ahih manin a duh a liak nuam zong tam hi. Hun thupi te bek ah a ki zat loh buang in Biakinn sung dei ah, tawhkalh in ki kem hi. Tua pen a sia gen nuam te in " RC Siampi te in Lai Siangtho pen seelcip uh hi" ci uh hi.
A.D 1214 kum ciangin RC Siampi Stephen Langton in lai Siangtho bu a khan a lian hong khen in, 1228 kum ciangin Lungdam na Lai Siangtho bu a khan lian a khen hong zo hi. 1440 kum in Germany gam a, thuzui hanciam mahmah John Guttenberg in leitung ah a masa pen pen lai khetna setpi ong bawl khia hi. ( 1450 kum a ci zong om hi) Lai Siangtho bu zong ongbawl pah a, Lei tungah laikhetna tawh a ki -at ma sa pen pen zong ong hi pah hi. Tua Lai Siangtho bu ah laimal 1282 om a, laimai khat ah laigual 42 ta om hi.
1528 kum ciangin, Italy mi siampi khat ahi Fr. Parguni -in a khan neu hong khen hi. Pawlpi ki ukna limzui a, a khen a hi hi. A.D 1517 kumin Marti Luther pawlpi sungpan tai khia a, a ma Taikhiat ma in Catholic pawlpi in Germany kam tawh Lai Siangtho 17 vei bawl khin zo hi. A.D 1534 kumin Martin Luther in Germany kam
Tawh ong tei khia pan a hi hi.
1582 kumin Catholic pawlpi-in Douay Rheims Lai Siangtho bu hoih a minthang Khat Catholic pawlpi-in bawl a, 1941 kimin zong Revosed Catholic Enition U.S.A Lai Siangtho bu hong at hi. Martin Luther gelh Lai Siangtho bu pen Protestant Bible kici hi.
Protestant Canon
Protestant-te in Lai Siangtho bu sunga Seuterocanonical deih nawnlo in, Apocrypha ci uh a, Hebrew kam tawh a ki-at bu 37 bek deih vetse uh hi. A hih hangin 1534 kumna a tei khiat Lai Siangtho sung a tawpna lamah Apocrypha ci-in hel ve ve uh hi. 1559 kum in Mikang kam in tei khia leuleu uh a, tua sungah ong hel nawn lo uh hi.
* ( Matin Luther in James , Juda , Hebrew , Maangmuhna te zong sanglo in a hih hangin Protestant Bible anunglam ah guang/ hel uh a, bu vekpi 66 ong suah uh hi. )*
Kum 1646 ciangin England Pawlpi mi a hi King James' atsa , King James Version sungah a deihloh uh (7) te helkik in zang leuleu uh hi. Kum 1827 ciangin England gam Bible Society in cikmah hun in hel nawnloh ding in thu kipsak hi.
A hi zongin tuhun Ciangin Baikna ki tam semsem Pasian thu leh la a kan taktak te in Apocrypha bute simkik nopna lungsim nei uh hi.
Leitung bup biakna liante leh a zat Lai Siangtho bute
1/ Christiannity B.C 4 Holy Bible
2/ Confusian B.C 551 Classic
3/ Buddhist B.C 560 Tripitakah
4/ Jain B.C 599 Angas
5/ Taoist B.C 604 Taoteh King
6/ Shinto B.C 660 Kojiiki-Nilongi
7/ Eoroastrian B.C 660 Avesta
8/ Hindu B.C 1500 Vedas
9/ Jewish B.C 11200 O.T ( Old Testament )
10/ Moslem A.D 57 Koran
11/ Sikhism A.D 1469 Granth
Hih bangin na ki ciamteh hi .
Tuangpi @Zogam
