Khamtung gamah Japante Ong Tunna

          Japan Gal Vai  Dawmna

         (S.I.A, Pu Hau Za Lian Suangzang) Diary pan

                           Khamtung gamah Japante Ong Tunna

             1942 kum kipatcil-in Japan galkapte kawlgamah ong lut uh a, Mangkang galkapte in nang loin taisan uh ahi manin kha thum sung bangin Kawlgam sung siangtho takin tung khin uh a, Khamtung ong paisuak-pah lo uhi.

         Tua hun laitakin Tedim Vuandok N.W.Kelly hi a, Khamtung gamah Japante ong lut loh nadingin kawlgam tawh gamgi pan nan theih nading vaikikupna khat bawl dingin Ukpi, Hausa le Upa khempeuh ong khawm a,1942-April 14-16 sung kikupna ka bawl uhi.Tua kikupna-ah Sukte Gam le Sihzang Gam mite in kawlgam tawh gamgi pan Japan galkapte nang dingin Levy phuan ding a, do ding cih kithukim a, Kamhau Gam mite lungkim loin '' Levy phuan a Japan galkapte i do sangin i thau neih teng ap zaw ding hihang'' ci uhi.

                Banggangin Kamhau Mite In Do Nuam Lo

           '' Burma Rifles sungah Zomi Battalion khat om a, tua sungah atam pen Kamhau mite a hi uhi. Tua Kamhau mi galkapte , Japante in a na mat khak-te uh na bawlsia kha ding hi. Tuate a bawlsiat loh nading deihna tawh, Japante kiangah lai khakin ;Ko lah ong kap kei nung in no lah Kamhau mi galkap na matte uh lah ong bawlsiatsak  kei un'' ci-in mi nih sawlin lai piasak hi hang'' ci uhi.

                   Khamtung Pan Japante Bangci Kido a, Bangci hun-a Ong Tung

        Tedim gam panin 1942 April kha-in Levy kiphuanpah a, Kham le Zaang cinah Japante  kidal hi. Tedim gam teng Tedimte in dal-in Falam gam teng Chin Hills Battalion in dal hi. Japan galkapte Tedim lam pan hatin damdamin ong pai toto uh a, Chin Hills Battalionte a kipan India galkapte ong kibehlapin a nung ciangin 17th Divisiante ong tung hi. Mangkang galkapte ong nuamhuai mahmah uh ciangin Kauhau mite zong  Levy sungah ong lut nuam ta uh a. A- Levy le B- Levy ci-in namnih-in kikhen hi. A-Levy-te in khasum Rs. 20, a sih leh luangman Rs.300 ngah ding a, B-Levy-te in khasum Rs.10 hi a, khua cing le laitai sem uhi. Chief Pum Za Mang in B-Levy uk a khasum Rs.150. ngah hi.

         Tedim gamah A-Levy makaite a nuai-a bang hi.

 Kamhau Gam       1. Vung Za Cin ( Tonzang)

                                    2. Khup Za Tung ( Haupi)

                                    3. Thang Za Kai  ( Tuithang)

                                    4. Awn Khaw Mang ( Hiangzang)

                                    5. Pau Cin Kham   ( Thangzang)

 Sihzang Gam         1. Lian Thawng      ( Khuasak)

                                    2. Thian Pum         ( Buanman)

                                    3. Lam Khaw Mang ( Thuklai)

                                    4. Mang Pum    ( Voklak)

Sukte Gam              1. Thawng Za Khup  ( Saizang)

                                    2. Hau Za Lian            ( Suangzang)

                                    3. Thuam Za Mang    ( Mualbem)

                                    4. Hau Za Nang           ( Heilei)

                                    5. En Khaw Zam         ( Suangphei)

   

                  Mangkang galkapte muanhuai mahmah ci-a i ngaihsut laitakin 14-3-1944-in Tedim pan India zuanin nungkik uh a, 19-3-1944 ni-in Japante in Tedim ong luah ta hi. 

           Mangkang galkap 17th Divisionte Tedimah  ong om uh a, galkap, thaupi, vanleeng kapna, mawtaw , laa, apawlcingtakin om ahi manin muanhuai kisa mahmah a, kuamah'n zo ngei kenteh , ci-in a kilungnuan mahmah laitakin thakhatin ong nusia hiitheet uhi. Japan galkapte in Phaipi, Kohima lamah nakpi-in a sim ban uah, Meitei gun nitumna lam pan na khiangtanin Tonzang khua gei, Mualtawhtan ( Tuitum Saddle) a cihna mun le Vialcian khawngah na pang uhi.

       Tua pen galsim dan laibute-ah Long Range Penetration a cih, theih loh kal a, a kigin lohna mun, a gamlapipi-ah lutsim a, khaktan ding galsim zia kisin nai vet lo'' ci uhi. Japante in tua Long Range Penetration a cih galsim zia tawh a bul lamah lutin a khaktan sim ciangin patau gawp-a nung kik uh hih tuak hi.

                       Japante In Ong Bangci Uk

        Japan galakpte in Tedim ong luah phetin Ukpi le Hausate tungah: ''Tua ni a nong tun kei uh leh na ngawng uh ong kitan ding hi,'' ci-in ong sam uh a, thu ong genna-ah '' Suang in a delhcip a, a khang thei lo kiakte bangin mangkang kumpi in note ong nencipin na khang thei kei uhi.

       A delhcip suang i lakkhiat ciangin akhang thei pan kiak bangin no hong nencip mangkangte kong paihkhiatsak zo uh a, tu-in suahtakna na ngah zo uhi. Tu-in Japan kumpi in na khantoh nasing uh kong vaihawmsak ding uhi. Hong langpang na om peuhmah uh leh na ngawng uh ong ki-attan ding hi. Na uk sung khua mite na gen dung uha, hong nen niam Mangkangte ong lut kik loh nading in Chin Defence Army (CDA) na phuan ding uhi'' cih thu ong pia hi.

            Japan galkap makaipa in kei ong samtuam a, " No nitumna lam gam le mangkang galkapte omna kinai ahi manin CDA galkap na phuanpah inla, nang, South West Commander na sem in,'' ci-in thu ong pia hi. Hih thupiakna zui-in Sukte Gungal Nitumna lam khuate-ah  CDA galkap kiphuan kawikawi hi. Suahtakna le Khantohna cih kammal i zat theihna pen hih lai pan ong kipan khia hi.

                      Japan Kumpi Ong Uk Zia

          

                Japan kumpi ong ukzia panin Mangkang dangka ong zangsak loin amau bawl tawm. dangka lai ong zangsak hi. Sial, Bawng, Sakol, Vok , Ak, a kipan ei' khawi loh ngasa nangawn a tawi-in ong ngen mawk uh a, mehha, mehtui ong kipuaksak den hi. Thumaan tawh thu sittel na bawl lopi-in upmawh thu bek tawh a kiman, a kithatlum ong omom hi.

                          Banghangin Sukte Independent Army Kiphuan: 

 

              Japan Kumpi-in Tedim gam ong uk khit a sawt loin gam kaang thu lel peuh tawh amau upmawh mite man uh a, sing lamtehsakin a sih dong thautei tawh dawt uhi. Tua banga Japante ong bawlsiatna thute ka ngaihsut ciangin thuak zo loin na ka sa lua a, bangci kibawl leh Japante kinawh khia zo ding hiam'' cih thu bekbek a sun azanin ka ngaihsunsun hi.

 

             A nungciangin thuak hak sa lua ka hi manin CDA galkap ka phuatna sung a, mi nuamhuai teng tawh thu kikupsimna khat ka neihpih hi. Tua lai-ah; " A khuakhua-ah mi muanhuai teel khia-in thu kikupkhopna bawlin'' Khut khat tawi khe khat khai bangin ma pang khawm-in Japante lehdo ni,'' ci-in thuciam ka bawl uhi.

         5-6-1944 ni-in Japan Kumpi in Tedimah ong sam a, '' ka vaihawm simnate ong phawk a ong sam hinteh'' cih ummawh ka hi manin pai loin kap  ning, cih ka geel masa hi. A hi zongin thakhatin kikap pah leh gungal ni-suahna lam-a om U le Naute  in gim thuak ding uh, cih ka ngaihsut ciangin bangbang hi leh kipai phot dih hen'' ci-in ka pai kik hi.

           Ka tun ciangin kei bek ong sam hi loin Ukpi, Hausa khempeuh ong sam na hi uh a, van man tanna le ei le ei in bangci sep leeng khangto ding , cih thu 10-6-1944 dong ong kikuppih uhi. Tua kikupna-ah a pau a ham ngam kuamah om loin kingai dide bek hi. Kei zong thuak zo loin thu khat ka genna-ah '' Nippon Kumpi in Mangkang Kumpi khut sung pan ong suaktasak na hi manun nuam mahmah ung. Khantoh nading nong bawlsak ding uh zong tam mahmah ahi manin nuam mahmah ung.

           Kong gennop thu khatah gal tawh kipawl a ong langpang taktak mite pen gam sung upadi- a om bangin ong that mai un. Tua hi lo a, thuman lopi ong kipia kha tam mahmah ding ahi manin a kiman mite peuhmah a maan le a maan lo thu a kisittel khit matengin nong thahsak loh nadingun kong thum hi,'' ka cih ciangin Vuandok a sem, Zabiak ( Falam- a Japanmin - Hachita) in'' gungal nitumna lam-a om i thum thah ding om a, a thu a kikan laitak hi,'' ci-in ong gen hi.

                 Tua thah ding a cih mi thum teng pen,   Pu Hau Za Lian- Suangzang, Pu Cin Za Dal -Suangzang, Pu Tun Thual- Kaptel -te na hi uh hi.'' Guahtui ong tam tading a hi manin gungal nitumna lam peuhmah in thau le sakol om khempeuh nong puak khit kei uh leh na ngawng uh ong ki-attan ding hi,'' ci-in thu ong pia a, 11-6-1944 ni-in ong ciahsak hi. Lampi panin nitumna lam hausa upate kiangah: ''Keima thu loin thau le sakol peuhmah na puak kei un,'' ci-in ka vaikhak hi. 

                   Khua ka tun ciangin Mangkangte ong nusiat lai-a ka seelsim uh, thau le thautangte la-in  Sa-ek-a om, Lt Thawng Cin Thang tawh kithuzakna ka bawl khit teh ka mite thau tawh kithawisakin Kaptel khua-a CDA-te umcih-in''ong lut un'' ci-in ka man uh a, sakol khempeuh, thau khempeuh, hausa upa khempeuh, mat bangin paipihin Sa-ek khua-ah ka piphualsak hi. Hih thu hangin gungal nisuahna lam a om u le naute tungah bawlsiatna a zat loh nadingin thu ka thangsak a, ''Mangkang galkap tampi ong pai-in hausa upa le thau le sakol khempeuh kiman khin a, Kaptel-a CDA-te zong man khin uhi'' ci-in Tedim-a om Japan kumpi tungah lai ka piasak hi.

             Tua khit ciangin gun lei khempeuh sattatin gungal nitumna lam khua tengah vak kawikawi-in Japante do dingin galkap ka phuan a, thau nei lote zong singkhuah suangtum tawh na kithawi un'' ci-in ka vaikhak hi. Japan galkap ong pai a om leh khah-suah lo ding'' ka cih ciangin kuamapeuh thukimin khe khat tawi bangpah ngeingai uhi. Lungnophuai ka sak ciangin Lt Thawng Cin Thang le a taipih Levyte , Suangzang Khualu , Taakzang munah samsukin phualpi ka saat uh a, tua hun-a kipan amah tawh thusia thupha ka vaihawm khawm uhi.

    

                       Sukte Independent Army Min Ong Pianna

               Lt. Thawng Cin Thang ong tun ciangin Japante do ding a kiphuan galkap pen '' Free Chin Movement''min ka na phuah sa uh pen ei pau-in ''Zo Suakta'' min kiphuaksa ahi hangin thu ngaihsun thei mi tampite in galkap phuatna a min a gam tamin'' Sukte Independent Army'' min deihzaw uh ahi manin liangko tungah S.I.A. kisuangsak hi. 

         Hih Sukte Independent Army min ong pianna hih bang hi. Mailam nasep nading tawh kisai-in Taakzang phualpi-ah 1-9-1944 ni-in kikupna khat om a, tua lai-ah Bu Tun  Thual, (Phiamphu, Kaptel, A pusawn Tuang Ngam khang pek panin Pute tawh na ki-it na kipom den uhi.) in: " I min pen Free Chin Movement sangin nasep nading kipatkhiatna phualpi, mun le gam  tamsakin Sukte Independent Army kituakzaw lo ding hiam'' ong cih ciangin a om khempeuh lungkimin laih uhi.

            Tua ahi manin Sukte behmin kilawhna hi loin a phuatna mun kilawhna a hi hi. Tua khit, a nungciangin thu kikupna khat-ah Khuasak U Awn Zam in: '' S.I.A. bang a cih nopna hiam? ci-in ong dong hi. Pu Hau Za Lian in:'' Sukte Gam Taakzang panin kiphuankhia ahi manin a phuatna mun le gam kitamsakhi,'' ci-in a gen ciangin U Awn Zam in: '' Ko Sihzang mite zong Japan nawhkhiatna-ah kihelin notkhia khawm ihi manin Sukte le Sihzang cihna S kibang ahi manin Sukte/Sihzang Independent Army ci lehang hi thei lo hiam'' ci-in a dot kik ciangin Pu Hau Za Lian in:'' Eite nasep , Japante nawhkhiatna-ah min deihna tawh nasem, galdo hi loin i gam i lei, i minam itna tawh i nuntakna khamin i mipihte a that nuam Japante do-in mipite nuntakna hon khia ding a nasemte hihanga, hih Sukte Independent Army pen amin kiphuah laitak-a a mun kitap a, mipi lungkimna tawh a kiphuak ahi mnain keikia thu-in kibehlap thei lo hi,'' ci hi.

  

           S.I.A. galkapte training sinsak ding a, guahtui kan, November 1944 ma-in ,Tedim gam sunga om Japan galkapte simin siamsak ding ngimna om bangin tangval, a teitang company khat India-ah training dingin ka pai-sakuhi. Tua training paite lakah  Neng Khaw Kam( Kamkip, Saizang) in hi bang in laphuak hi,

(a) Zata tongdot ka ciin Thang in gual len va zil aw,ci e ;

(b) Gual in al bang mang vaak ci e, pupa phaksap khua mu ing e, 

ci-in la na phuak hi.

        Gunlei khempeuh kisattan khin ahi mnain gungal kaai nadingin a khuaciatah khau ka heeksak uhi.Nisuahna lam u le naute tawhkithuzak nading ka bawl uh a, Chief Thuam Za Mang ( Mualbem), Chief Thawng Za Khup ( Saizang), Pau Za Kam ( Tedim Headman)-te a kipan akuamapeuh ong huhna tawh suangtang tungah lai khih khawmin gungal khat le gungal khat kilotin hoihtakin thu kiza thei hi.

           Japan Vuandok a sem Za Biak in'' Sihzang gam ukpi hausa le thau khempeuh , Sukte gam ukpi hausa le thau khempeuh, Suahliim-ah puak ding, Sihzang gam panin (Mualbem 14-9-1944) ni-in tung ding '' cih thu a piakna kazak uh ciangin ka ngim masakna uh ,November kha kingak thei nawn loin kithawi biangbuangin 13-9-1944 ni-in Mualbem khuataw panin ka galkah uhi.

                Tua galkahna pen Mualbem khua mi, Thual Nang,( Sia Thang Do Khen' sungpa) in gunlei khau tungah mi 5 a tuan theih nading kawn leengpei neii hong bawlsak theih manin kimanlang diak hi a, ama tungah ki lungdam mah mah hi.

                  Mualbem khuataw gungal panin galkapte khennih suahin khenkhat Saizang ah, khenkhat Mualbem ah  pai-in 14-9-1944 zanin Japan galkapte ka sim uhi. Mualbem galsimna-ah Za Biak le CDA galkapte kihingmatin Japan galkap khat kikaplum hi. S.I.A. galpak Phawng Kim, Si-in , Khai Za Khup, Hau Khual,Vial Lang le Ngo Nang te , mi 4 lian uhi. Tua mite in Suangzang khua pan vive hi a, Suangzang khua-ah ki pua uhi.

             Mualbem le Saizang ka zawh khit uh ciangin Mualbem Chief Thuam Za Mang' innah phualpi ka phut uhi. Mualbem phualpi panin a khua akhua-ah hausa le upate  khawmin amau gam le lei ciatah S.I.A. galkap phuanin Japante do ding ka genpih uh ciangin lungkimpah diamdiam uh ahi manin Mualbem phualpi pan thau le thautang pia-in galsim ka kipansakpah uhi.

              Tedim Japan phualpi le mun tuamtuam-a om Japan phualpite pan Japan sung-a sem galkap pawl khat Mualbem S.I.A. phualpi-ah ong lut uh a, Mualbem phualpi panin Japan galkap omna phualpite kisim kawikawi-in Tedim gambup mite hanciamna tawh November kha cin ma-in Tedim gam sung aom Japan galkap khempeuh kinot siang khin hi.

          Tua ciangin 5th division galkapte tungah tavuan ki-apna 27-11-1944 ni-in Thang Mual-ah kibawl hi. Tedim gamsung a siantho khit ciangin Lt. Thawng Cin Thang pen Civil Affairs Officer hi a, amah tawh S.I.A. galkapte minphatna le pahtawina lai ka pia uhi.( Ka Pa Hau Za Lain' ciamtehna lai pan, Cin Khen Zam )

      S.I.A. nasepna tawh kisai a la kiphuakte dawng 9:

Bu Siing Lian:( Bank Manager , Khup Pum' Pa)

(a) Ngual in a taaitaai ong ci e, dam didial-in hei kik ing e;

(b) Suktui lunmang hawmsiam kom a, suul-ah ong hei kik ing e,

(a) Limbelh gua bang phuk hi ci a, sunkim nau bang kah lawh'ng e,

(b) Batphu zong tu suktui taanggual, suntung phulum phul bang e.

(Limbelh gua bang phuk a cih pen, Tual Za Kam le Hau Za Hen Japante in ong thahsak a genna hi. Taden maan lopi a kipiak ciangin Japante in thusit lopi in mi ong ban thahthah ciangin  amah'n zong thuakhak sa a, a khitui luanlawhna le midangte zong kungkim loin tungtun-a phulumn phul bangin mi tampi-in Japante hawl khia-in phu kila nuam ciat cih, a phuahna hi.)

 Awn Khaw Khai ( Pu Dam Khup' makpa, Gawngmual)

(a) Suktui tunnu'n tong ong khak e,Dimtui va sai aw, ci e;

(b) Suktui siamin lenpuan zawn a, Dimtui sai kham kei hi'ng e,

Thawng Za Khup ( Saizang Innpipa)

(a) Ciau gal mimphung na hawmsiam e, sialum-in nei ngawn ing e;

(b) Tong tam lo ua, lenpih gual aw, paak bang tawitawi nuam hang e;

Pau Za Cin ( Suangzang , Pu Hau Za Lian' pa)

(a) Miza ziin bang liin laitak a, von in zingvai hawm tah e;

(b) A siallum le lenpih gual tawh Pantui zang tual-ah khia e.

Hau Za Lian ( Suangzang)

(a) S.I.A. laam taang kaai ua, lia le taang gual laam vevua;

(b) Mun inn gam lo i it manin, leido pat bang saai hang e,.

Pu Hau Za Lian ciamteh na lai pan hi,,,

ZOLAI HONG PIANKHIATNA

• 
• 

Category: Tangthu

Published on Tuesday, 16 April 2013 15:49

Written by Paul Thangpi

Hits: 103

Thupatna
Joseph Herbert Cope (Cope Topa) in Zomite anungta Pasian thu hong muam ding, Leivui pan hong lamto ding leh Niinphual pan hong domto dingin 1910 November kha ni (1) ni in Tedim hong tung hi. Zomite in Pasian thu sim theih nang leh leitung ah khuasak theih nangin 1913 kum in sim theih ding LAI hong bawlsak-a tu in Kum 100 (1913 – 2013) hong cingta hi. Tua LAI in Zomite’ nisim nuntakna, thu leh la kizopna leh Pasian thu simna in akizang ZOLAI ahihi.
Roman Alphabet mal 20 bek tawh hong bawlsak Zolai in tel baih in, zat nuam a, Leitunga Pau tuamtuamte ahibangin kigelh thei hi. Tulaitak in Kawlgam, India leh Leitung gam tuamtuamte ah Zolai a zang mi Tulza-thum leh, tulsawm-li leh tul-li (344,000) om hi ci-in Leitung Kampau tuamtuamte akancian Ethnologue in naciamteh hi. Zomite in Zolai ihneih manin Leitungah Minam khat in hong kiciamteh-a lungdam leh angtan huai mahmah ahihi.

Zopau hong Kipatkhiatna
Leitung ah Pau nam 7,105 omhi ci-in Linguistic Society of America in ciamteh hi.  Hih Pau teng nampi (4): Indo-European (Europe lam), Sino-Tibetan (Asia Lam), Semitic (Arab, Israel, Sehnelgam lam) leh Bantu (Africa lam) cihbangin kikhen hi. Sino-Tibetan sungah Pau nampi 250 om in Tibeto-Burma Pau nam khat in kihel hi. Tibeto-Burma Paunam sungah Pau nam 400 bang om in Zopau nam khat in kihel ahihi. Minam khat a suah theih nadingin Pau neih masak kisam-a tua Pau tawh kizop theih nangin Lai neih hongkul hi.
“Lai” cih kammal Zomite in tanglai hun pekpan ineih ahihi. English in “Script” ahk “Writings”, Sen ten “Jiaoben” ahk “Xin”, Mogolia ten “Bichig”, Tibet ten “Bod yig”, Kawl ten “Sa” cihbangin na nei uhhi. Falam, Khalkha lamte in “Ca” ci-in Kawllai pan alak ahihi. Laibu acih uhciangin “Ca ouk”, Laihuan acih uhciangin “Ca mi puai” cihbangin Lai tawh kisai Kawllai pan tampi na la uhhi. Zopau in Lai aat, Lai-aatpi (General Secretary), Lai-aat lohbu (Blank note book), Laibu, Laidal, Laihuan, Lai hawmpa, Laihawmnu, Lai-ip, Laikung, Lailu, Laimal, Laisiangtho, Laisuangpi (Black board), Laitai, Siktawhlai khetna, Zum Lai-aat cihbangin kuama kiangpan kawmlo in tanglai hunpek pan ineih ahihi. Tanglai a ih Zopau-in bang cidan Pau hilian dinghiam cih kithei cianlianlo hi.  Ahizongin Tibet leh Kawl pau siksan Pau nam khat ahihi.
Tibet pau leh Zopau etkaakna:
Zopau                                  Tibet pau
Khat                                     Chick
Nih                                        Nih
Thum                                    Sum
Li                                           Zhi
Nga                                        Nga
Mit (eye)                               Mit
Na (ill, sick, pain)               Na
Numei, Anu (Female)       Mo
Sa (hot)                                 Tsha
Sa (meat)                              Sha
Nga sa (fish meat)              Nya sha
Si (die)                                  Shi
Zopau in mitna (eye sore) pen Tibet pau in mitna mah hipah hi. Zopau in mi nga si (five persons die) pen Tibet pau in mi nga shi mah hipah hi. Tua ahihmanin tanglai ih Zopau in Tibet pau tawh kinai-in Tibetgam pan hong piangkhia Pau ahihlam kimu thei hi.
Zomite’ Lai Neih Masakna
I pu i pate Tibetgam pan Kawlzang kizuan in Kawlzang pan Khamtung azuat ding ciangin makai unau nihte apa in Tu leh Ta, Suan leh Paalte zat dingin Lai pua sak hi. A u adingin Savun tungah aat sak in, a nau adingin Guapum tung ah aat sak hi.  A nau ahihleh Khamtung ah teng nuamlo in Zanggam ah ciah kik hi.  A nau Zanggam a zuat kik zawh kum sauvei hun khat ciangin a u kep Lai teng kawtsak in nisa apho na ah Ui in tuah sak in mukik nawnlo hi (Ui in neksak hidingin ki um mawh hi). Tua hunpan kipan Zomite in Lai nei nawnlo hi kici hi.
Hibangin a mansuah takciangin a u in a nau kiangah “Lai mansuah ka hihmanin Lai hilh dingin Khamtung hong paito in” ci-in vaikhak hi.  A nau zong Khamtung hong paito kik in a u te’ Lo khawhnate hong mu hi. Tua ciangin a u tenna Khua a pai ma in Lo sungteng ah hong pai masa hi.  A nau in a u’ Lo khawhna Lo sung hong pai masa hi. Tua ni a u Lo kuanlo ahihmanin a nau tawh kimu khalo hi. A nau in a u Lo sungah a ma theih ngeiloh Lo khawhna van zatte, Lo hunna Thaangsiahna, Zusa Vasa matna, Lo tuilakna atuamtuamte a muhciangin hibangin ngaihsun hi “Ka u in hibangin na lamdang a thak  atuamtuamte ngaihsun thei, bawl thei ahihciang Lai mangngilh loding hi.  Lai ka mansuah acih hang’ hong khemna hiding hi.  Kei tungah banglo khat hong bawlnuam hiding hi” ci-in ngaihsun-in a u tawh ki mulo in ciahsuk kik hi.
Hibangin a nau hong paitoh lam a u in tua ni-a Lo kuante’ tung pan thei a, ahizongin Lai ngah kik nawnlo hi. Tua hun akipan Zomite in Lai neilo-in ki omsuak hi, ci-in tangthu ah kiciamteh hi. Nidangin khangluiten Laikung, Laidal cihbang zang nailo in Suangpeek tung, Singpeek tung, Savun tung cihbang ah a zum, a hiam khatpeuh tawh Lai na at uh ahihmanin min dang nei nailo in “Lai aat” naci uhhi. Sanginn-a sang Siate Lai hilhna (black board) pen “Laisuangpi” kici hi. Nidangin Suangpeek tungah Lai ki at ngei ahihna kimu thei hi. Tuhun ciangin Laikung, Siktawhlai khetna, Computer, Laptop cihbang hong omciangin “Lai gelh” , “Lai khen”, “Lai meek”, “Lai copy”,  “Lai email”  cihbangin kizang hi. Tua ahihmanin nidangin Zomite in Lai nei ngei ihihna hong mu sak hi.
Pau Cin Hau Lai Zatna
Pu Pau Cin Hau Tangthu atomin: 1859 kum December kha in Tedim khua Pu Khan Lian leh Pi Cing Zam te sungpan hong piang hi. Pu Khan Lian in tapa 8 nei in Pu Pau Cin Hau pen a lina, Rev. Hau Go’ pano ahihi. Pu Kam Hau khan sungin Tedim ah teeng in Englandte hong khan ciang Lailui khua ah galtai in na teeng hi. A nungciangin Mualbem khua ah na teeng hi. Aneu tuung akipan kum 15 sung tawntung kumzawnin Khanglui ngeina biak theih khempeuh bia in, thoih theih khempeuh thoih-a dam tuanlo hi. Ni khat alungkia lua in kisiammawh, kicimtakin amah-le-amah kikaplum dingin Thau khat tawh pai khia hi.  Khua nawl a tun ciangin Sakhi khat natai dihdih in a kap leh kha pahlian ahihmanin ama kithah nading Thautang om nawn lo in Sakhi khat tawh ciah kik hi.
Tuakhit akipan mangmu zelzel in Pasian in “Van leh Lei a bawl Keimah Pasian hong bia inla damna hong ngen in damna kongpia ding hi” ci hi. Pasian kiang ah damna anget leh dam takpi hi. Midang tampite thunget sak in mitampi in damna ngah hi. Tua hun laitakmah in Tedim ah Nuam Dim akici kamsang numei khat om hi. Pasian in Pi Nuam Dim tung ah  “Ka thu a zeek khia dingin Pau Cin Hau ka teel hi” ci-in na gen hi. Tua bangin Pau Cin Hau Biakna hong piang hi. A sawtlo in Khamtung bup ah gamkang bangin hong kizeel hi. A tapa upa pen Pasian tamhsak in Sian Khaw Cin na phauk hi, Zomite sungah Pasian min atamh masa pen ahihi. Kum 1948 December 28 ni in Mualbem ah a leitung nuntakna nusia hi.
 
Pau Cin Hau Lai hong Piankhiatna: Pau Cin Hau lai in  “Zotual Lai” ahk “Laipian Lai” zong kici hi. Kum 1899 in Pasian in Pu Pau Cin Hau Zomite zat ding Lai mangmuhna tawh musak hi. Tawlkhat sung Pasian in hilhin a Mangmuhnate midangte tungah a hilh theih nadingin 1902 kum in sim theih dingin Lai tawh hong bawl hi. Lai hong mukhia ahihmanin “Laipianpa Pau Cin Hau”  ci-in kithei hi. Pau Cin Hau Lai in Lim tawh akisim (Logopraphic Script) Lai nam ahihi. Atuungin mal 1053 pha-a abu in bu 6 pha hi. 1931 kum in hong puah pha in Lailung tawh akisim (Alphabetic Script) Lai nam in hong pianga mal 57 pha hi. Mal 57 sung pan mal 37 te Lailung (consonants leh vowels) hi in, mal 20 te Dawngtawi (tone marks) te ahihi. Laidal tung leh Suangpek tung ah gelhin midangte na hilh sawn hi.
Pau Cin Hau Lai Kizatna: Zogam ah Sangmangten Lai hong bawlsak ma in Pau Cin Hau Lai bek kizang hi. Zogam sung bekthamloh Manipur leh Luseigam Zomite‘ tenna dongin kizel man hi. 1917 kum Piantit pai lai in Pau Cin Hau Lai zangin innlamte tawh ki thuza uhhi. Kumpite tungah lungkim lohnate a koh ciangun zong Lai dang theilo ahihmanun Pau Cin Hau Lai mah tawh na gelh uhhi. Sangmangte in Pu Pau Cin Hau kiangah “Kipawl ni in sem khawm ni” ci-in na zol a “Kei a pen, ko gam tawh kituak dinga Pasian hong piak tuam hi-a, no a pen gamdang Biakna hi-a, ko tawh kituak lo hi” ci-in na mang nuamlo hi. 1931 kum in British and Foreign Bible Society in Pau Cin Hau Lai tawh Mualtung Thuhilhna (Mate Laisiangtho alian 5 sung) Dal 500 khen uhhi. Census of India 1931 Volume XI Part (I) laimai 194-195 sungah “Pau Cin Hau Lai” ci-in kikhum hi. Tu hunciangin Laipian (Siangsawn) Pawlpi sung ah kilim zat mahmah hi. Leitung a Sang minthang tampi pan in Lai lam Thuthuuk Kankhiatna (Research) bawlte in Pau Cin Hau Lai nalim kan mahmah uhhi.

Kawllai Kizatna
Sangmangte Zogam ah na hongsep uhciangin Lai lo tawh maban zom theilo ahihmanin Kawllai hilh dingin Karen Siate pawlkhat hong cial uhhi. 1904 kumin Sia Shwe San Khuasak ah koih uhhi. Pasian thu a telmuh theih nadingin nitak in Lai hilhin kum khat a cin ciangin Kawllai a sim thei omta hi. Pu Hau Cin Khup in Tedimah Zum akah ciangin Kawllai sim theite amuh ciangin thupi sa ahihmanin Vuandokpa kiangah Tonzang ah Kawllai hilh ding Sia na ngen pah hi. Vuandokpa in "A Sanginn ding leh Siainn ding na lam inla na zawh ciangin a Sia ding keiman hong vaihawm ning" ci-in na gen hi. Pu Hau Cin Khup in zong Sanginn ding leh Siainn ding lam pah in a zawh ciangin Vuandokpa thei sak pah hi. Vuandokpa leh Rev. Cope kikumin Sia Po Ko paisak in 1905 kum in Tonzang ah Kawllai sang ki hong hi.  A hon tuungin Sangnaupang 40 bang pha-in kum bei kuanciangin 70 bang hong phato hi.
Khamtung bup ah Khuasak leh Tonzang ah Sang a om masa pen hong suak hi. Tua hunlai-in Zogam ah Kawllai bek kisin ahihmanin Lai theite in a Laigelhte leh Mualsuangte Kawllai vive tawh na gelh in tudongin muhtheih dingin omlai hi. 1909 kum ciangin Kumpi in Tedim leh Lennakot ah Kumpi Kawllai Primary Sang hong hi. Tua hi in Biakna Sang (3): Khuasak, Tedim, Tonzang tawh akigawmin Sang (5) kinei hi. 1920 kum ciangin Biakna Sang (3): Theizang, Limkhai leh Dolluang ah kihong ahihmanin Zogam ah Primary Sang (7) kinei a Kawllai vive tawh kisin hi. 1923 kum ciangin Khuasak ah Biakna Sang tan (6) ciang kihong hi. 1925 kum akipan Zogam ah Kawllai kiphiat in Zolai sin kipan hi.
Zolai Neihna
Joseph Herbert Cope (Cope Topa) Tangthu atomin: Joseph Herbert Cope 1882 November 21 ni in Philadelphia, Pennsylvania, USA ah suak hi. 1899 kum in Tui kiphum hi. 1904 kum in Pennsylvania University pan B.Sc.(Bachelor of Science) Degree ngah in  1908 ciangin Rochester Theological Seminary pan B.D. (Bachelor of Divinity) ngah a tua kum July 7 ni in Ordination kipia hi. Kum 1908 September 3 ni in Elizabeth Coldwel Smith tawh pumkhat suah kitenna nei hi. Tapa 3 Joseph Howard Cope, Harry Cope leh Appleton Danforth Cope te nei uhhi. 1908 December 21 ni in Khalkha hong tung in Sangmang Carson sih tawh kituak ahihmanin Khalkha ah kum 2 om in 1910 November 1 ni in Tedim hong tung hi.

1913 kum in a masa pen Zolai Simbu hong bawl sak hi. 1919 October kha in Zolai tawh laihawm masapen “Tedim Thukizakna Lai” hong phuankhia a editor sem hi. Kumpi’ sawlna tawh Tedim, Falam, Hakha pau tawh a bawl Laisimbu avekpi in 35 pha a 1923 November kha in kumpi in “Kaisar I Hind” cih pahtawina Ngun Medal pia hi (Kaisar German pau pan hong pai Ukpi cihna hi-in, Hindi leh Urdu pau tawh “Kaisar I Hind” akhiatna in “India gam Ukpi” hi-a England kumpi ukna India gam sunga nasep thupi asemte pahtawi na-a kipia ahihi). 1935 June 10 ni in Colgate University in Honorary Degree Doctor of Divinity (D.D.) pia hi. Zogam simlam Mindat, Kanpetlet lamte’ ading a bawlsan laitak 1938 June 11 ni zingsang nai 5:00 hun in Gilsan leh Khuasik natna tawh Khalkha ah nong nusia in  June 12 ni in Rev. A.E. Carson kivuina han kiangah kivui hi. Khamtung gam sunga a om hun khempeuh Kum 25 leh Kha 7 (ni 9,419) ahihi. Akhuan 3 vei ciahin ni 1,345 sawt hi.
Tedim Khuapi pan Taangkam (Pautang) khat hong Piankhiatna: Tedim khua Guite Pu Gui Mang in AD 1550 pawlin sat hi ci-in tangthu ah kiciamteh hi.  Ahizongin kiim leh paam pan galten na sim zel ahihmanin kilal san zel, kibeel kik zel hi. 1806 kum pawl ciangin Pu Kam Hau in Lamzaang khua hausa asepna panin Tedim khua ah na teng hi. Inn leh lo kician zong neiman nailo in galten na sim zelzel ahihmanin Lamzaang khua ah ciahkik hi. 1810 kum ciangin Pu Kam Hau (Sukte), Pu Mang Gin (Hatlang), Pu Khoi Lam (Hatzaw), Pu Pau Vum (Sukte), Pu Tel Khaat (Thawmte), Pu Lam Dong (Tawmging), Pu Kam Vial (Bawmkhai), Pu Kim Thuam (Zillom), Pu Pau Am (Samte), Pu Cin Kim (Samte) leh Pu Gen Cin (Lethil) te kipawlin Tedim ah na teng kik uhhi. Gal akici khempeuh na hungzo ahihmanin midangte in Tedim hong bel in a sawtlo in inn 30 hong pha-a Pu Kam Hau in hausapi sem hi.
1848 kum ciangin galvai, savai, thusia, lasia, a om ciangin hoih tak-a ki uk theih nadingin Thukhun hong bawlin tuhun dong mah akizang “Kam Hau Thukhun” (Kam Hau Upadi) ahihi. Tua Thukhunte hangin Zomite sungah khat-le-khat mawh kimaisakna, kilemna, ki itna leh ki pawlkhop theihnate hong om theita hi. Tua ahihmanin Tedim khua pan in Zomite Khuatheih kipatna (civilization) hong piang ahihi.
A sawtlo Tedim khua inn 300 hong pha in hibangin hong teeng khawm uhhi.
Bonuai veng: Tu laitak a galkap tualpi nuai nitumna lam teng hi a Pu Pau Vum leh Teizaang mi pawlkhat teeng uh hi. Galkap Tualpi pen Pu Khua Cin innmun ahihi.
Botung veng: Pu Khua Cin inn tungsiah nitumna lam teng hi a Pu Za Tual leh Teizaang mi pawlkhat teeng uhhi.
Vaiphei veng: Bonuai veng pan a khanglam nisuahna lam teng hi a Vaiphei miteng teeng uhhi.
Sekzaang veng: Sakollam Ngennung lamka panin leilu lam teng hi a Guite miteng teeng uhhi.
Khuangzaang veng: Col. Dal Za Kam inn dungto teng hi a Thahdomiteng teeng uhhi.
Khua tuamtuam mun tuamtuam pan hong bel uh ahihmanin pau leh ham hong ki helzau gawp in asawtlo in tu laitak a ih zat Tedim pau hong piangkhia hi.
Zolai bawlnangin Tedim Tualsuak Pau kizatna: Cope Topa 1910 kum in Tedim hong tun ciangin Sihzang kampau Zomi sungpan Pu Pau Suan leh Pu Thuam Hang te Christian na suak khin uh ahihmanin amau tawh kithuah in Sihzang pau na sin pah hi. A sawtlo in hong siam in Zolai a gelh masakte Sihzang pau in na gelh hi. Zogam Leilu lam ading Lai hong bawlsak taktak ding ciangin Tedim gam sunga pau tuamtuamte sungpan bang pau zang leng mitamin thei kim pen ding, tangzai pen ding cih hong ngaihsun hi.
Tua ahihmanin 1919 kum in Tedim Vuandok Zum ah Tedim gam hausa lianteng kikhawm in gambup ah Sihzang pau zat dingin thu kisung hi. Cope Topa in “Hat Lian Bu” (Jack The Giant Killer) kici Sihzang pau tawh a gelh, laigelhloh dal 20 bang aphading tangthu khat hong simkhia hi. Tua ciangin Thado, Zo (Zou) leh Paihte kampau Zomi tengin Sihzangkam a teltheih loh lamuh hong pulak khia hi. Tua ahihmanin bang pau in Lai bawl ding cih anuai-a bangin hong kikum in hong khensat uhhi.
Tuimui hausa Pu Mang Za Thang in: “Paite pau-in bawl le hang kithei kimlo ding hi. Tedim khuapi sung-a kizang kampau tawh bawl le hang kitel kim pen ding hi” ci-in a gen ciangin Haiciin hausapa Pu Tual Pum in “Tu-a Tuimui hausapa genna pen a man hi” ci-in thukimpih hi.
Hiangzaang hausa Pu Zam Khaw Thawng in: “Ko Thahdo pau in om leh kithei kimlo ding hi. Tedim khuapi a kizang kampau tawh bawl ni” ci-in gen-a Hangken hausa Pu Kam Pum in “Tu-a Hiangzang hausapa gen pen ka thukimpih hi” ci hi.
Saalzang hausa Pu Zaang Khaw Lian in zong: “Ko Zote pau in om leh kua mahin tel kim lo ding hi. Tedim khua akizang pau mah hi leh kitel kim pen ding hi” ci-in agen ciangin Mantuang beh Phaitu hausapa Pu Khan Thawng in “Saalzang hausapa gen pen man hi” ci-in thukimpih hi.
A tung-a bangin hausa lian 6 te in agenna uh hausa leh upa akihel khempeuh in zong thukimpih hi. Mipite in lungkimna aneih khituh ciangin Cope Topa in kipsak-a tua hun akipan Tedim khuapi-a kizang “Tedim khuapi Tualsuak Pau” tawh Lai hong bawl sak ahihi.
Zolai Khantohna
1913 kumin Cope Topa in “Tual Lai Sintawmna Bu” cih Laibu khat hong bawlsak in, tua pen Zolai akigelhcilna ahihi. 1914 kumin Sihzang Pau-a kitei La dawng 24 apha hongbawl in Zomite in Labu ihneih masak pen ahihi. 1915 kumin  Zolai tawh sim theihdingin Mate Laisiangtho honggelh sak hi. 1918 kumin La dawng 100 apha Zolai tawh hong suak hi. 1919 October kha in Zolai tawh laihawm masapen “Tedim Thukizakna Lai” (The Chin Hills News) hong hawmkhia a, Cope Topa in editor sem hi. Tua laihawm sungah “Tedim mite laisim thei tampen ahih manin Tedim pau in kibawl hi”, ci in na gelh hi. 1923 kum ciangin La dawng 283 apha Zolai mahtawh hong suak leuleu hi. 1924 kum ciangin Tanbul (Primary) sang khempeuh ah Zolai tawh sin sak ding kithukim hi.
1925 kum akipan Cope Topa hong bawlsak Zolai Tan 4 ciang Primary Sang tengah sin kipan hi. 1926 kum in Sangte ah sin dingin Zolai tawh Leitung thu leh Gamthu (Geography) hong bawlsak in, 1927 kum leh 1931 kum ciangin tua Laibute mah hong puahphat sak kik hi. 1932 kum ciangin Zolai tawh sim theihding Laisiangtho Thuciam Thak  buppi hong tei sak hi. 1977 kum ciangin Laisiangtho Buppi (Thuciam Lui leh Thuciam Thak) Zolai tawh sim theih dingin kinei a Sangmangte gah mah ahihi. Cope Topa in Biakna sunga zat dingin biakna Laibu, Lai Siangtho bu, Labu cihte hong bawlsak banah Sangah sin dingin Gamthu bu (Geography), Nate’ thubu (Science), Ganan bu (Mathamatics) leh Laisimbu tuamtuamte zong hong bawlsak lai hi.
1914 kum-a kibawl Labu neihmasak pen sunga Doxology anuai-a bang ahihi:
Thu pha khem piu hawng pia To Pa, Le tung mi hing a min phat ta,
Van tung mi zong in To Pa Pi, Jesu, Kha Shiang Tho min phat hi.
1915 kum-a kibawl Mate Laisiangtho 4:1-3
“A tu ciang in a doi mang pa je et ding in a Kha Shiang Tho in Jesu gam lak a a pai pi hi. Ni sawm li le’ zan sawm li an ngawla a nung ciang in a gil hawng kiel hi. A je et pa in hawng nai a, Nang ma in Pashian ta pa n’ hi le’ hi shuang te kho mun n’ shuawk sak in a ci hi.”
1923 kum-a kigelh Lungdamna Zawhang Laisiangtho 3:22, 28
“Tu a nung ciang-in Zheishu in a nungzhui-te tawh Zhuda gam-ah pai uh leh tua san tak-ah amaute tawh a om khawm a tui shung-ah a phum uh hi. 3:28 Keimah in, Khazhih kah hih kei hi, Khazhih mai-ah hong pai sak pa kah hi, ken ka ci hi.”
Zopau Zolai kemcing ni
Leitung ah Pau nam 7000 val a om sungpan Kaal 3 sim (every three week) in Pau nam (1) ta beimang hi kici hi. SIL International in agenna ah tulaitakin Kawlgam ah Pau nam 117 om in tua sung pan nam (5): Anong (kachin pau nam khat), Hpon (Kachin pau nam khat mah), Taman (Khamti, Homalin, Sagaing Division), Pali (a pau kizang nawnlo a Lai bek ki zang lai) leh Wewaw (Kayin pau) hiteng a pau mi om nawnlo hi kici hi. Tu zawh kum za khat ciangin Kawlgam ah Pau nam 50 bek kipau lai dinghi kici hi.
Tulaitak in Chin State (Zogam) sung ah Pau nam 31 om hi. Tu zawh kum 50 ciangin Pau nam 15 bek pha ding hi. Pawlkhat mangthang ding-a tua a mangthang dingte: Khongso (Paletwa), Bawm (Chin State, Mizoram, Tripura), Tuiship (Kanpalet, Paletwa), Ta-aw (Paletwa), Kaang (Mindat), Lautu (Matupi, Thantlang), Mro-khimi (Paletwa), Rawngtu (Mindat), Senthang (Khalkha, Thantlang, Gangaw, Kalay), Songlai (Paletwa), Tawr (Khalkha), Thaiphum (Matupi) cihbangte ahihi. UNESCO in a genna panin India gam-a om Pau tuamtuam a bei thei ding 196 sung panin 103 pen a bei hak nawn lo dingte hi ci hi.
Pau bangci bei thei hiam?: (1) Tu leh tate in zang nawnlo, nu leh pa te in tate ei pau siamsak zolo, hilh lo. (2) Khangthakte in zat ding maizum pih, daihpih ngamlo, a sawtna ciang pau thei nawnlo. (3) Ei Lai tawh laigelh lo-in midangte Lai tawh gelh, Lai kigelh a om loh ciang‘ sim ding zong omlo pah. Gtn. in Khasi (India gam Maghalaya State sunga om minam) te in a gamah Khasi pau sang‘in Kala pau leh English pau zangzawta ahihmanin a Pau uh sawt zang nawnlo dingin kimu uhhi. Chin State (Zogam) ah Lautu kampaute Thangtlang Myone leh Matupi Myone te ah khua 17 om-a amau pau sangin Khalkha pau leh Kawlpau lim zatzaw ahihmanin asawtlo in abei thei dingin ki ciamteh hi.
Zomite ki-en lehang i pau  sawt i len zo lai ding hiam? Lungngaih huai kasa hi. Kawlgam (Mandalay, Yangon, Gunkhawm khangsiah ) ah khangthakte in Kawlpau bek zang ta hi. Zopau pau sunsun le-uh Kawlpau tawh helh in pau melmel ta uhhi. Mizogam ah nu leh pate in ei pau zang lai liamliam in, tate in Mizo pau bek zang hi. Min gelh ciangin anungah Lusei min gelh danin ..a leh ..i vive kizang ta hi. America, Asia, Australia, Europe, Nitumna gamte ah khangthak Zomite in ei pau zang nawn lo in, nu leh pate bek in zang lai hi. Tate tawh ei pau in ki ho thei nawn lo hi. Tate khangah ei pau kizang nawn lo ding cih theihsa ahihi. I Pau bei leh i Lai zong abei ding ahihi.
Tua ahihmanin Zomite in i Pau leh i Lai a bei lohna dingin bangci leng kemcing thei ding i hiam, cih lim takin ngaihsut huai hi. A hi theizah in i tate ei pau tawh hopih in siamsak sawm ding. Pawlpi leh kipawlna tuamtuamte in khangthakte adingin Zopau, Zolai leh Zongeina sinna neihzawh ciat nang hanciam ding. Zolai, Zopau tawh Laibu, Media, Journal atam theithei nei-in thapia-a i panpih ciat ding deih huai kasa hi. Zopau Zolai kemcing ni.
A kaikhawm: Paul Thangpi (Pau Pian Thang) Offenbach, Germany
Ekkaak laibute:

1. Ethnologue: Languages of the World, 17th 2013 Edition by Lewis, M. Paul, Gary F. Simons and Charles D. Fennig, Published by SIL International,  Dallas, Texas, USA
2. Gin Hau Pum Sia, “Rev. Dr. Joseph Herbert Cope (1882 - 1938)”  Posted on Phuitong Liim, posted by Dr. Hau Za Cin on March 1, 2009
3. G.K. Nang Rev. Dr., Article: “Beginning of Christianity in Mizoram and Chin Hills”
4. G.K. Nang Rev. Dr., Article: “Pau a bei thei thu hi”,  posted on Tongsan News Journal, 2009
5. Gin Sian Pau Sia, Article: “Cope Topa Nuntakzia Tomki”  Posted on Tonsan International Media Website
6. Kam Khua Mang Pu, “Khamtunggam Tangthu le ki ukna thu”, Sukte Chronicle III pp. 19-20.
7. Khen Za Sian Rev. Dr., Article: “Tedim Pau Icih”
8. Khoi Lam Thang Rev., Article: “Tedim Kam”
9. L. B. Naylor, A Practical Handbook of the Chin Language, pp. 46-47.

10) List of Languages, Wikipedia the Free Encyclopedia
11) Luan Za Cing Pi, “Khamtung ah Lai le Sang i neih hun”, Sukte Chronicle IX, pp. 35-38.
12) Stephen Hre Kio Rev. Dr., Presentation: “Concerns on Chin Language”  posted on Youtube
13) Tawmging Beh Khang Tangthu Laibu: 1st Edition Published 1973,p. 37.

Zomi te' theihhuai thu pawlkhat

Minam khat in ka gam ka lei a cih ding gam khat neih ding pen baih het lo hi. A neisate in zong a gam a lei uh it in, gal leh sa lakah a khahsuah lohna dingin ahih theih zahun keem tek uh hi. Tua mah bangin I pu I pate in zong I gam I lei hu a, a khang a khanga gal leh sa a dona uh gen ding tampi om hi. Zogam la dinga British galkapte hong kuan lai taka I pu I pate in a hih zawh zahun Mikang galkapte nangin, a do mah bangun, Mikang ten Zogam hong lak khit ciangin zong Zogam pan Mikang galkapte nohkhiat kik sawmin hih theihnana pan do tawntung uh hi. Tua hanga Mikangte khut thuak minthang masa pen Pu Thuam Thawng leh a tapa Tg. Pau Dal, Pu Kai Tuah leh Pu Khai Kamte hi a, 1898 kuma Mikangte phualpi Thuamvum (Kennedy peak/ Fort White) a simna uh pan Mikang galkapte in man in, Pu Thuam Thawng leh tapa Pau Dal pen Kendat thongah puak uh a, hih thongah a pata-un si uh hi. Pu Kai Tuah leh Pu Khai Kam pen khantawn gotna kipia a, Pu Kai Tuah pen Myingyan thongah, Pu Khai Kam pen Andaman tuikulh (Island) pekah puak uh hi.

Leitung Galpi Khatna bei kuan 1917 kum ciangin Mikang kumpi in France gamah van nawn dingin Zomi galkap kaikhawmin innkuan khat pan pasal kum 20 tung siah khat ta tangkaih uh hi. France gam pen gamlapi leh theih ngei loh gam hi a, galgam ahih manin sih khitna dingin ngaihsunin Zomite kuamah ut loin langpang uh hi. Hih taka a makaipi Pu Ngul Bul pen Mikang ten mat bek tawh lungkim loin thatin, a luang pen a nennenin semin Tedim uksung inn simah hawmin Zomite vauna in zang uh hi. Hih bangin Mikangte in hong vau uh hangin phatuam tuan lo ahih manin a tawpna ciangin France gam paite pen kuli leh leisiah peng (h) dingin a zolbawl uh ciangin ngah zo pan hi. Hih France paite CHIN LABOUR CORPS kivawh a, Tedim gam pan mi 1000, Falam gam pan mi 500 leh Lusei gam pan mi 2000 pai hi. Hih Zo galkapte in France gam panin Pu Song Theu, Pu Kam Za Mang, Pu Khual Khen Thangte makaihna tawh buaina bawlbawl uh ahih manin Mikang kumpi in cihna ding thei loin 1918 kumin Zogamah puak kik uh hi.
France gam paite Zogam hong tun kik uh ciangin mi tampi tak mel muh ding om loin galgamah si uh ahih manin Zomite in Mikangte huatna nasia tektekin a koi a koi-ah Mikangte langpanna laang seemseem hi. Tua hangin Mikang kumpi in buaina phelhna dingin Ukpite leh hausate thuneihna piak behlapin mipite ukcipsak hi. Tua banga Mikangte ukna Zomi kithuaklah lua ahih manin lungkim lohna tawh 1932 kumin Falam khua-a Mikang thuneite kiangah Pu Suang Khaw Kam leh Pu Lian Mang makaihna tawh kiko hi. Bangmah phattuamna om lo ahih manin Magwe DC kiang manawh leuleu uh a, lawhcinna bangmah om tuan lo hi. Tua lai tak 1938 kumin makaipi Pu Suang Khaw Kam pen Magwe khuapi-ah hong si sawnsawn hi. Hih sihna pen gul tuk hang hi, a kicih pong hangin suamlup mah hi dingin kingaihsun veve hi. A luang Zogamah lak ding vai natawmah nakpi takin buaina piang lai hi.
Zogam sim lamah zong Mikangte huatna laang mahmah a, Mindat lam mi Vuamtu Mawng in zong Mikang galkap sungah Sabedar za a ngah kum 1925 in Mikangte lehdo dingin galkap pan taikhia in, kum 1928, February 20 ni-in CHIN NATIONAL UNION (CNU) pawl a makaihna tawh phut hi. CNU in 1933 kumin Rangoon-a Mikang kumpi tungah Zogamah Zo mite thuneihna a ngah kikna ding leh, Kawlgam in suahtakna a ngah cianga Zogam in zong a ngah pahna dingin deihna leh ngetna tun hi. Hih ngetnate Mikang kumpi in don cih thadah 1939 kumin CNU makaipi mi kuate baan mat zawsop in, Zogamah Japante hong khan 1942 kum dong thong sungah khumcip uh hi.

1942 kuma Leitung Galpi Nihna in Zogam hong phak ciangin Mikang kumpi in Japan gal a nang dingin Zomite kaikhawmin CHIN LEVY phuan hi. Ahi zongin Pu Pum Za Mang leh Pu Za Biakte in Japante tawh kizawl a, Mikangte ki-umkhia leh Zogam in suahtakna a ngah ding lametin Kawl makaite leh Japan galkapte tawh kizopna bawl uh a, Japante makaihna tawh Mikangte do dingin CHIN DEFENCE ARMY (CDA) galkap phuan uh hi. Ahi zongin, Japan ten Zogam hong op ciangin suahtakna hong piak sangsikin Zomite tungah Mikangte sangin hong tatsia zaw uh a, kithuaklah zaw seem hi. Tua ahih manin Mikangte hi ta leh, Japante hi ta leh a do dingin Pu Thawng Cin Thang, Pu Hau Za Lian leh Pu Lian Cin Thangte makaihna tawh SUKTE INDEPENDENT ARMY (SIA) kiphut biangbuang hi. SIA pen hih sawng maha a kiphut SIHZANG INDEPENDENT ARMY (SIA) tawh pangkhawm hi. SIA in kum 1944, June kha in CDA phualpi Kaptel khua sim uh a, CDA-te a vekin hing mat khin uh hi. Kum 1944, September 11 ni-in Meitei gun kantanin Mualbeem khua sim leuleu-in CDA makai Pu Za Biak natawm man uh hi.
Hih sawng mah, 1944 kumin Pu Vum Khaw Hau makaihna zong tawh CHIN LEADERS FREEDOM LEAGUE (CLFL) pawl a sim a thamin kiphut hi. Tua banga Japante zawna Mikangte do huan a kisawm lai takin, Zomi makaite in Japante tatsiatzia za nunawh uh ahih manin lang khat lamah Japan na'nna dingin FREE CHIN MOVEMENT (FCM) pawl 1944 kum mahin a sim a thamin phut kik saisai uh a, FCM pawl in a sawt loin CHIN INDEPENDENCE ARMY (CIA) ci-in a pawlin khel kik uh hi. Hih bangin kipawlna phutin lang khat lang khatah Mikang leh Japan gal nangin a ciangciang pan hih hun laia Zomite om khong man lo uh hi.
Zogamah Japante doin a kipan lai takin, Imphal kidona-ah Japan in Mikangte lel kik ahih manin 1945 kumin Mikang ten Zogam hong luak leuleu hi. Tua banga Mikangte hong lut kik ciangin tuma Mikangte a langpang ngei Zomi tampi takin mat leh bawlsiat thuakin, SIA makai Pu Lian Cin Thang zong Kawlgam in a suahtakna a ngah (1948) ciangin thong sung pan kikhah kik pan hi.
Leitung galpi nihna hong veng(h) ciangin Mikangte hawlkhiatna ding leh Zogam suahtakna dingin mipi tha tawh panlak kul cih phawk uh ahih manin mipite a pattah dingin political party kisam sa uh hi. Tua ahih manin 1946 kum laizang pawlin Tedim khuapi-a Pu Lang Khaw Thangte innah Pu Thang Khaw Kai, Pu Song Theu, Pu Thang Za Kai leh Pu Lang Khaw Thangte makaihna tawh KHAMTUNG SUAHTAK VAIHAWM PAWLPI (KSVP) kiphuankhia hi. Hih hun sawng teng mahin Tedim khuapi mahah Pu Vungh Za Kham, Pu Hau Za Lian leh Pu Tuah Langte makaihna tawh THUHOIH VAIHAWM PAWLPI (THVP) kiphuan lai hi.
Hun hong pai to zelin, Zogam suahtakna dingin 1948 kumin Capt. Mang Tung Nung in CHIN PEOPLE'S FREEDOM LEAGUE (CPFL) pawl hong phut a, CPFL pawl pen kum sawm khit 1957 kum ciangin CNU tawh kigawmin CHIN NATIONAL ORGANISATION (CNO) pawl cih min hong pua in, Capt. Mang Tung Nung mahin President lenin makaih hi.
Lushai gam lamah 1947 kuma hong piang Lushai Hills-a political party masa pen MIZO UNION in zong Zogam suahtakna ding leh Zo minam teng kigawmna ding mah lunggulhna thu His Majesty's Government of India kiangah memorandum na khia uh hi.

1960 kumin Lamka khuapi panin Pu T. Go Khen Pau leh Pu S. Vung Khomte makaihna tawh PAITE NATIONAL COUNCIL (PNC) in kum 1960, May 30 ni-in India Prime Minister Pu Pandit Jawaharal Nehru kiangah 'Re-unification of Chin People of India and Burma under one country' cih thulu zangin Zo minam khempeuh ading District hiam, Division hiam, Region hiam khat bawlsak a, tua sungah gawmkhawm dingin ngetna memorandum thupi mahmah khia uh hi.

1964 kumin Kawlgam thuneihna Gen. Ne Win in la a, parliament a phiatna hanga lungkim lohna leh mipite kiangah thuneihna ap kikna ding hanciamna tawh MP pawlkhat leh Zomi mitei pawl khat ten ANTI-COMMUNIST FREEDOM ORGANISATION (ACFO) pawl hong phut uh a, Col. Son Khaw Pau, Pu Dam Khaw Hau, Pu Mang Khan Pau, Pu Hrang Nawl, Pu Son Cin Lian leh Pu Tual Zen ten makaih hi. ACFO pawl pen Manipur-a Zomi makai Tun Khaw Pum tawh kikopin, amau makaihna tawh Zomi 30 taang ding ten galsiam sin dingin East Pakistan (tu-a Bangladesh) gam zuan uh a, Zo Kumpi- UNITED CHIN GOVERNMENT pawl phuan uh hi. Pu Tun Khaw Pum pen Prime Minister, Pu Col. Son Khaw Pau pen Defence Minister, Pu Hrang Nawl pen Foreign Minister cih bangin panmun kiguan uh hi.
Galsiam a sin khit uh ciangin, Zogam kap dingin galvan namkim tawh hong kileh kik uh a, khen nih kisuahin, Pu Hrang Nawl makaih galkap mi 86 ten Halkha leh Falam lam nawkin, Pu Tual Zen, Commandar-in-Chief makaih galkap mi 700 ten Tedim lam zuan uh hi. Pu Hrang Nawl makaih lam ten Kawl galkap platoon khat omna Rihkhawdar khua ciang baih takin buluh zo a, Halkha khua la man loin nungkik kik uh hi. Pu Tual Zen makaih lamte zong Kawl galkapte tawh Tedim leh Mualbeem khua kikalah nakpi takin kikap uh a, Tedim khua la man mahin kidok kik uh hi. Hih banga a kihep kikna uh khat pen Falam DC Pu Thawng Cin Thang' hanciamna hang zong hi kawm hi.

Hih banga UCG pawl pen gamtaangin thahat man hi napi, 1969 kuma India Prime Minister Lal Bahadur Shashtri leh Gen. Ne Win ten Rangoon-ah kihona nei uh a, tua takah India leh Burma gamgi dungah buaina a bawl leh bawl a sawm peuhpeuh kimatsak a, a gam kumpi tungah ki-aptuahna ding kilemna thukhun bawl uh hi. Hih thukhun hangin Zomite minam nasepna bin lawh a,a sawt loin India kumpi in Zo galkap makai Col. Son Khaw Pau, Pu Hrang Nawl, Pu Dam Khaw Hau, Pu Ro Thangte leh midang pawlkhat man takpi-in Kawlgam kumpi tungah ap hi. Kawl kumpi in hih Zo minam makaite thong sungah khumin kum nga tek kia uh ahih manin UCG pen gamtang thei nawn loin omcip hi.
MP lui Pu John Mang Tling leh nam it Zomi khangno pawlkhat ten Kawlgam Prime Minister lui U Nu pawl PARLIAMENT DEMOCRACY PARTY (PDP) zom dingin kum 1969, December 30 ni-in Bangkok zuan uh hi. Ahi zongin Bangkok a tun uh ciangin Pu William Sa Lian Zam, Pu Micheal Mang Kham leh Pu John Mang Tlingte makaihna tawh Zomite in CHIN DEMOCRACY PARTY (CDP) pawl phuh zawk ding hoihsa uh hi. Kum 1970, Febraury 20 ni-in Bangkok mahah CDP leh Pu Jimmy makaih ZOMI CHIN LIBERATION FRONT (ZCLF) pawl tawh kihona bawl leuleu uh a, tua takah CDP leh ZCLF lawng khata gin ding deihin UNITED ZOMI DEMOCRACY PARTY (UZDP) pawl phutin, tua sungah kisungkhawm uh hi. Ahi zongin, February 25 ni-in UZDP President Pu Jimmy a panmun pan tawp themthum kik ahih manin CDP mi leh sate in CHIN DEMOCRACY PARTY (CDP) min mah pua kik uh hi. Kum 1972, August 24 ni-in CDP in galkap dingin CHIN INDEPENDENT ARMY (CIA) bawl hi.
Hihmah leh, kum 1973, January 29 ni-in PDP President U NU a panmun pan tawp dih laizang a, tua hangin CDP innkuan sungah lungkiatna nakpi takin tung hi. CIA galkap natawm mi 150 pan mi 100-ah kiam sukin bah lawh gawp hi. Kum 1976, February 18 ni-in PDP pawl na tawm kiphiat lai sawnsawn hi.
Kum 1976, January 14 ni-in CDP Leh CIA ten CIA galkapte Zogam lutsak ding geelna bawl uh a, tua vaihawmna-ah a nuaia bangin khensatna bawl uh hi.
1. CHIN INDEPENDENT ARMY pen CHIN NATIONAL ARMY (CNA) ci-a khek ding.
2. Zogam hawhna ding KACHIN INDEPENDENT ORGANISATION (KIO) pawlte
kiangah huhna nget ding.
3. Zogam paite a zaa (rank) uh a zah-thum teka khan ding.
4. Zogam a tun uh ciangin ARAKAN INDEPENDENT ARTY (AIP)
Pawl makai Khai Mu Lin kiangah neek leh taak panpihna nget ding.
A tunga khensatna bulphuhin kum 1976, December kha in William Sa Lian Zam makaih CNA galkap mi 120 in a kiphualna uh Menapalaw nusia-in Shan gam leh Kachin gam tawnin kum 1977 tuuk guah tun lai takin Zogam lut uh hi. Tua lai takin Zogamah khua sia mahmah ahih manin khawhun thuaklahin cinat lawh ngeingai uh a, cimawh mahmah uh hi. Tedim uksung Phunom khua-ah a om lai takun, neek leh taak kaikhawma Thuklai khua-ah a pai mite tung panin Kawl kumpi thuneite in CNA-te om thu za hi. Kawlgam galkapte hong tung pah uh ahih manin Phunom leh Saizang khua kikalah nakpi takin kikap niloh pah uh hi. Khua hun thuaklahna, neek leh taak kiciat lohna, zatui zaha taangsapnate hangin Zo galkapte sawt pang zo loin Vangteh khua-a Mah-Sah-Lah (Burma Socialist Programme Party) thuneite kiangah mi 20 ki-surendar uh a, ahi zongin Kawl galkap makai Bo Lah Twin' sawlna tawh Bo Mawng Aye in lainatna nei het loin lam laizangah gualin a baan a baanin kaplum veve hi. A nung cianga a ki-sunrender mi 40-te zong tuamah bangin Kawl galkap ten hawi tuan loin kaplum khin uh hi. Mi 46 Kalemyo Jail-ah kipuak a, mi 4 nasia takin liam hi. Hih bang teng tawh CNA mabaan zop lohin om suak hi.
MIZO NATIONAL FRONT (MNF) pawl hong kiphut leuleu-in President Pu Laldenga makaihna tawh India, Burma leh Bangladesh cih gam thuma Zo minamte luah leitang teng gawmkhawm na'ng leh suahtak na'ng mah suangin hong kipan leuleu uh hi. Kum 1963, December kha in Laldenga, Lalnunmawia leh Sainghakate East Pakistan (tu-a Bangladesh) ah lutin a sim a thamin UNDERGROUND MIZO GOVERNMENT (UMG) pawl phut uh hi.
Kum 1966, March 1 ni-in MNF in Independent pulakna bawlin, tua panin India kumpawh kikap kipanin, India gamah om thei lo uh ahih manin East Pakistan zuan uh hi.Kum 1971 kuma Bangladesh in suahtakna hong ngah tak ciangin East Pakistan-ah MNF ten om khuan nei nawn lo uh a, India leh Arakan gam kilak teng manawhin kikhin leuleu uh hi.
h sawngin MNF pang belin ZOMI LIBERATION FRONT (ZLF) pawl zong dingin Pu Tial Khal (President), Pu Thawm Luai (Vice President) leh Pu Thawng Sai(ForeignSecretary) ten maikaih hi. 1972 kumin MNF leh ZLF thukimna tawh Pu Lalnunmawia pen India kumpite hopih dingin kisawl a, Pu Tial Khal leh Pu Sui Lingte pen Pu Brengseng (L), Finance Secretary, KACHIN INDEPENDENT ORGANISATION (KIO) heel dingin kuan uh hi. Hun sawtpi khit ciangin KIO-te thupha tawh lawhcing taka hong kileh kik uh a, ahih hangin ZLF in vai tuamtuam hang tawh mabaan zom thei loin om uh hi. MNF in kum 20 sung Independent a thapaihpih khit ciangin 1986 kumin India kumpi tawh kilemna hong bawlin Mizoram pen State suaksakin tawlngak bawl uh hi.
CHIN NATIONAL FRONT (CNF): Hun hong pai to zelin, Pu Tial Khal makaihna mahin ZLF makai lui teng kum 1988, March 15 ni-in Aizawl, Chaltlang vengah kimuhkhopna khat bawlna leuleu uh a, pawlmin kheka CHIN NATIONAL FRONT (CNF) phuh ding vaihawm leuleu uh hi. Pu Tial Khal in President panmun mah len leuleu in, Gen.Secretary dingin Pu Mang Khum, Finance Secretary dingin Pu Lian No Thang, Chief of Staff dingin Pu Roenga, Organiser dingin Pu Mang Uk kiseh hi.
Kum 1988, March leh August kha sunga Democracy deihna hanga Kawlgam buaina hangin Zomi khangno tampi tak Kawlgam panin India gamah tai uh a, India kumpi in Saiha leh Champhai-ah refugee camp nih bawlsak hi. Hih refugee camp a tung khangnote in BURMA DEMOCRACY FRONT (WESTERN) pawl phut uh a, sawt ding man loin CNF makaite tawh kihona hong neih uh ciangin BDF pen phiat kik pahin, CNF sungah kum 1989, January kha in kisungkhawm uh hi.
1988 kum mah, November kha sunga CNF kikhopna-ah Pu No Than Kap alias John Khaw Kim Thang pen Thailand gamgi-a om KAREN NATIONAL UNION (KNU) Headquarter Manepalaw-ah National Democratic Front (NDF) kizopna bawl dingin paisak uh hi. KNU-te phualpi pan hong kileh kik ciangin Pu No Than Kap in Pu Tial Khal kiangah CNF President hihna awn dingin ngen a, Pu Tial Khal in zong awnin Pu No Than Kap in CNF President panmun len to hi.
CNF mi leh sate galkap training dingin kum 1989, March kha in pawl khat Kachin gama KIO-te kiang mah manawh uh a, kum 1989, November kha in pawl khat Bangladesh gam zuan uh hi. Tua panin gam leh minam suantakna dinga galtum CHIN NATIONAL ARMY (CNA) pawl hong piang leuleu-in, hihte pen tudong SANGNAUPANGTE a ci zong om hi.

1989, October kha-a CNF sungah Pu No Than Kap pawl leh Pu Tial Khal pawl ci-in kikaihna hong piangin, Pu Tial Khal lamte pialkhia-in pawlmin tuamtuam pua uh a, tua lakah a gentaak pen CHIN LIBERATION COUNCIL (CLC) hi-in, hun sawtpi mah kalsuan uh hi. A nung ciangin CLC President panmun pan Pu Tial Khal tawp leuleu-in, Pu Ro Za Thang in President panmun zom to hi.
Kum 1991, December 9 ni-in CNF President Pu No Than Kap pen nawngkai kisa ahih manin CNF sung pan kiheemkhia in, a munah Pu Roger F. Biak Lian Thang kikoihin, CNF President panmun len to hi. Kum 1995, February 22 ni-a Pu Roger F. Biak Lian Thang in a cidam lohna paulamin CNF President panmun nusia leuleu in, tua panin tudong CNF President panmun pen Pu Thomas Thang No in leen to suak lai hi.
1997, June 9-16 sungin a nih veina CNF Party Conference kibawl a, tua takah CNF makai dingin a nuaia teng kiteelkhia hi:
Chairman : Thomas Thang No
Vice Chairman : Zing Cung
General Secretary : Benjamin Turing
Joint General Secretary : Khua Uk Lian
Member-te
Dr. Sui Khar
Capt. Thang Zen
Capt. That Ci
Lt. Ral Hnin
Lt. Paul Smith
Lt. Malsawmlian
Lt. Solomon
Lt. Sunny Ngun Awi
Lt. Kam Do Dal
Lt. Uk Lian Thang and
Salai Chan Hmung cih teng hi.
ZOMI RE-UNIFICATION ORGANISATION (ZRO): Zo minamte kigawmna ding leh suahtakna dinga mala dingin kum 1993, April 9 ni-in Kachin gam, Phupian khua-ah pawl khat hong piang leuleu a, tua pen ZOMI REUNIFICATION ORGANISATION (ZRO) hi in, Assam gam, Karbi Anglong khawka MLA (Member of Legislative Assembly) a seem ngei Pu Khai Za Song Guite alias K.Guite in President panmun lenin, makaih hi.
1997, July kha in Yangon khuapi-ah University kah Zomi khangnote in I gam leh I minam suahtak nadingin sisan leh nuntakna piakkhiat ding lungkimna tawh Zomi Siamsin khangno 20 val in "Zoheisa Unit" ci-in sisan tawh kiciamin phut uh a, ZRO tawh kizoma na sepkhop ding lungkimna neih khit zawh ciangin Yangon khuapi pan sangnaupang mi 12, Tedim pan mi 10 val khawng in Lamka lam zuan uh a, ZRO sungah lutin panmun tuamtuam lenin tu dong kalsuan lai uh hi.
Pu Khai Za Song Guite zawh ciangin Kawlgam galkap mangpi Lt. Col. Hang Khaw Lian (Capt. Mang Tung Nung' tapa) in ZRO President panmun tawm vei len pak cih loh, 1997 kuma Manipur Zomi leh Kuki buai panin ZRO Gen. Secretary Pu Thang Lian Pau (Tonzang MP) pen emergency-in ZRO President panmun kilensak a, tua panin tu dong kip suak lai hi. Tu lai taka ZRO makaite pen a nuaia bang ahi hi.
President : Pu Thang Lian Pau, MP (ZNC)
Vice President : Hang Sian Thang
Chief Secretary : D. Kam Suan Thang
Finance Secy. : Kenneth Muana
Denfence Secy. : D. Kam Suan Thang
Home Secy. : L. Kam Za Thang
External Secy. : Thang Suan Mang
I & PR Secy. : Gin Pian Khup
Treasurer : SB Vum Lian Thang
Patron : Pu Khai Za Song Guite cih teng hi.
ZO RE-UNIFICATION ORGANISATION (ZORO): Zo minam bup kigawmna ding, suahtakna ding lunggulhna mah tawh kum 1988, May 19-21 sungin Champhai khua-ah FIRST WORLD ZOMI CONVENTION ON RE-UNIFICATION khawmpi kibawlin, Kawlgam, Manipur, Mizoram leh mun tuamtuam pan mi tul tampi in siim hi. Hih khawmpi panin Zo minam bup kipawlna ding ZOMI RE-UNIFICATION ORGANISATION (ZORO) hong piang hi. Hih khawmpi leh kipawlna vai a hawm leh a thusapite pen 1972, January 21 nia Manipur, Daizang khua-a kiphuh, Pu T. Gougin leh Pu S. Thang Khan Gin ngaihte-te makaih ZOMI NATIONAL CONGRESS (ZNC) party leh Mizoramah a diakin Pu Brig. Thenphunga Sailo makaih PEOPLE'S CONFERENCE (PC) party ahihi.
1991 kum panin ZORO pen political party tawh kisawh nawn lo dingin kiheemkhia a, tua panin Leitung mun tuamtuamah leh UN Secretary General kiang khawngah Zo minam bup kigawmna ding, suahtakna ding deihna Memorandum khia kawikawi hi. 1999 kumin a khat veina dingin Geneva-ah UN vaihawm minam nautangte khawmpi-ah kihelin, ZORO min tawh 'British in a khenzaak Zo minamte kumpi khat nuai-ah gawmkhawm kik' cih thulu zangin thugenna hun ngah hi. Tua panin hih bang lamsang kikhopna tuamtuamte-ah thugenna nei dingin UN (WGIP) in ZORO cial thei zel a, tukum July - August kha in zong Geneva-ah UN vaihawm Meeting-ah va kah leuleu uh hi. Tua bek tham loin, Committee tuamtuam Asia level Kathmandu (Nepal), Seol (Korea) leh Leitung level Durban (South Africa) cihte-ah zong kihel to zel lai hi. Tulai takin ZORO pen Pu R. Thangmawia (Chairman) leh Pu Ro Za Thangte (Secretary General) makaihna tawh kalsuanin, Aizawl khuapi pen a phualpi-in zang hi.
Hun beisa leh tulai taka I minam nuntakna dinga pute pate' nasepte khangthak Zomite in I phawk ding deihna leh hih thute I pau I lai tawh ciapteh ding lunggulhna in 'Zomite minam nasepna taangthu' a tomin kong kaikhawm ahi hi. I pau I laite I it bawl kei leh mailamah gam I nei zongin I pau I lai kizang lo kha thei ding hi. A khawsuak minam leh a suakta gam phuh zaha nasep haksa leh thupi zaw dang om lo hi. Hih thute panin khangthak Zomite in I minam nuntakna dingin a nasia zawa nasep a kisapzia phawkna in zang ni.

(Hih Zomite Minam Nasepna Taangthu cih pen Zomi Nam Ni Golden Jubilee pawi,
February 20, 1998 nia Mizoram, Champhai khua-a bawlna-ah ka simkhiat pen behlapin kong puak ahi hi -
J. Thang Lian Pau , editor Zolawkta)