Mikang Gamkek Galkapte Tawh Kidona
Zogam ah Zomite, kuama ukna nuai-ah om ngeilo in, Ei leh Ei iki-uk laitak in, Bitish Empire te'n 1824 Kum, Kawlgam tawlam teng la uh-a, 1852 Kum teh Kawlgam laizang, 1885 Kum ciangin Kawlgambup lakhin vek uhi. 1886 Kum Febuary Kha in, Kawlgambup saklam leh khanglam kigawmta cihthu tangko khia uhi. Ahizongin, Kawlgam Mualtung teng la nailo uhi. British Empire te'n Kawl Kumpi Tibaw amat khit uh ciangin, Kumpipa' tapa Shwegyuphyo leh Kawl galkap ulian honkhat, Kaleymyo/Kalaymyo dong tungto uh-a, Mualtungmite tawh kipawlkhawm-a British te lehdo dingin, vaihawm uhi.
British te'n atunga thu atheih uteh thukan dingin Galkap pawlkhat paisak in, Shihawng Khua ah kibusak uh-a, Zogam sim dingin, Lampi nih tawnin ongkuan khia uhi. Amasa lampi pen Kabaw kuamteng simdinga ongpai Batalian te' totna hi-in, anihna pen Pakokku pa'n Zaw gam leh Pungtaung/Punya lam kantan-a hongpai Batalian te' totna lampi ahihi. Amasa galsim nadinga kuanna lampi pen Zogam ladingin, Kalaymyo Khua gei, Pinda gunpang ah busak uh-a, 1887 Kum December kha in, Sit Mission ah makaipi, Capt Raikes in Sihzang hausate kiangah laikhak leh piakkhong vante puasak a, "Kawlgam leh India gam kikal paina ding'n lampi sialnuam kahihman-un, nawngkaina bangmah nongbawl lohna ding'n" ci-in ngen hi. Ahizongin, Sihzang hausate'n lam sialtheihna ding phalna pialo uhi.
Dec 30, 1888 Kum tak ciangin, British te'n Kalaymyo pa'n Kanpale Khua dong lampi sialkhin uh ahihman-un, Sihzang hausapi Pu Khup Pau makai-in, British Empire te do uh-a, British te Kalaymyo dong nungkik uhi. Tua kidona ah Sihzangte mi 4 si hi. British te'n Zuangsi cihna munah kipankik in, lambawl hong zom leuleu uh-a, Phatzang (No. 3 Stokade) hongtung uhi. Tua ciangin, Shihzang, Sukte, Kam Hau kipawlkhawm in, Zogam simnuam British Empire te dohuan dingin thukimna ongbawl uh-a, Khuasak Hausapa Pu Khup Pau, Kam Hau pa'n Ukpipa Pu Khua Cin leh Sukte gam Ukpipa Do Thawng te'n athukhen tatna bangun, Pu Khaw Cin leh Pu Do Thawng in, amau ukna gampa'n agalkapte ciat Khuasak Khua ah paisak uhi.
Jan 25, 1989 Kum ciangin, Kam Hau galkap 400, Sukte galkap 300 leh Sihzang galkap 530 te, Khuasak Khua ah kituah khawmin, mapangkhawm-a British Empire te dokhop dingin, Thuciamna Saban bawlin, Sial khat go uhi. Kam Hau' lampa'n galkap, Pu Vai Kham leh Pu Vum Kam in makaih in, Sukte lampa'n Mualbeem Khuami, Pu Hau Khaw Zam in makaih-a, Sihzang lampa'n Pu Khup Pau leh Pu Khai Kam in makaih uhi. Jan 27 ni-in, Gamkek Mikangte do dingin, gam-it Zomite ong kipan uhi. Mikangte' phualpi Phatzang Khua gei, Leisan mual ah gal nanna dingin, kulh bawl uhi. British lampa'n Field Marshal George White in, Lt. Colonel Skine makai sak-a, Gurkha Tat (42) te leh gam it galkapte hun saupivei sung kikap uhi. Hih kikapna ah Sukte galkap Pu Kim Lian si-a, Pu Kai Tun leh Pu Pau Deng te, liam uh-a, Kam Hau lampa'n Pu Khup Thang leh Pu Thuam Son te, liam uhi. Gamkekte' lampa'n Phiphaw liam hi. Aliamte pua in, Mualbem Khua zuanin, galkap pawlkhat pai uh-a, Gamkek galkapte'n tuamun phul-in, kap uh ahihman-in, Leisan panmun kikhah suah ta hi. Gam-it galkapte'n Leisan panmun nusia uh-a, nungkik in, Han Thang Lu kicihna munah galdalna dingin, leidum to-in, singhual bawl uh-a, galte pang uhi.
Jan 31, 1889 ni, zingsang khuavak milmial hunin, amadawk khol Panjabi galkapte, singhual kamna mun ongtung uh-a, nasiatak in kikap leuleu uhi. Panjabi galkapte'n phuzolo in nungkik uhi. Gurkha galkapte tawh kipawl in Thaupi zanguh ahihman-in, nang zolo in, gam-it galkapte nungkin uhi. Hih kikapna ah Gamkek galkapte aliam abai tampi om-a, Gam it galkapte lakpa'n Pu Thual Khual liam hi. Gamkek galkapte pen Aicik kulh (4) lina ah kibusa uhi. Gam it galkapte'n Han Thang Lu pa'n napang khol in, nai tingteng in kikap leuleu uh-a, nang zolo in nunkin leuleu uhi. Feb
4, 1889 ni-in, Gamkekte'n Sihzang gam lasiang uhi. Hih hunin, British Tat-mu makaihna bek hilo in, Galkapmang lian Field Marshal Ceorge White mahmah makai in, gal omzia encik General Faunce leh Tat-mu Major Raikes te hong kihel uhi. Gamkek galkapte'n limkap lua uh ahihman-in, Khuasak Khua meikang in kisia gawp hi.
Gamkek galkapte, Khuasak Khua ah kibusa in aom sungun, Sukte, Kam Hau leh Sihzang gamit galkap kigawm 2,000 Buanman Khua ah kituah in, Gamkek galkapte do dingin kiging uhi. Kam Hau gam Ukpi Pu Khua Cin zongh ama mite amakaih dingin Luai tawh kipua in, Buanman Khua ah Galvai va vaihawm hi. Feb 13, 1889 ni-in, Buanman Khua ah Gam-it galkapte kituah khawmin aom pempam laitak un, Gamkek galkapte'n Khuasak Khua pa'n Thaupi tawh galkap uhi. A Thautang puakkham in, Khua gei gampate kang-a, tatsatlo nawhsa takin kap uh ahihman-in, Gam-it galkapte nungkin ciat uhi. Gamkek galkapte'n Buanman Khua leh Thuklai Khua akapni mah-un, Thuklai Khuakhung ah galvil phualpi phut in kibusa pah uhi.
Gamkekte'n Sukte' gam leh Kam Hau' gam asimna:
British Empire te'n Kawlgam zanglei panin, hongsim toto uh-a, Zanglei tawh kinai Sihzang te'n anazawh loh ciangin, " Ei' gam zongh hongsim dinghi " cih lung hihmawhna tawh 1889 Febuary Kha kipat pawlin, ama uksung mite leh galhangte khawmin, Gamkek Mikangte doding' thu kikupna bawl uhi. Gammi te asia apha ah lungsim kihual takin om uh-a, Gamkek Mikangte dodingin, Thukimna Sabanna nei uhi. Hih Thuciam Sabanna ah vaihawm khawm Makaite anuai ah en dihni.
1. Pu Khua Cin ( Kam Hau' gam Ukpipa ) - Sial Khat & Bawng Khat
2. Pu Tuang Khaw Thang ( Galvai Vaihawmpi ) - Vok Tukkli Khat
3. Pu Thang Khaw Pau ( Ngennung Hausapa ) - Sial Khat
4. Pu Khan Lian ( Galvai Vaihawm ) - Vok Tukkli Khat
5. Pu Khua Cin Khup ( Galvai Vaihawm ) - Vok Tukkli Khat
6. Pu Pau Khaw Thang ( Galvai Vaihawm ) - Vok Tukkli Khat
7. Pu Vai Kham ( Vaihawm )
8. Pu Gin Za Thang ( Vaihawm )
9. Pu Za Tual ( Vaihawm )
10. Pu Vum Kam ( Vaihawm )
11. Pu Eng Tuang ( Vaihawm )
12. Pu Thang Thual ( Vaihawm )
13. Pu Hau Suan ( Vaihawm )
14. Pu Khai Pau ( Vaihawm )
15. Pu Thuam Thawng ( Vaihawm )
Kam Hau' gam Ukpipa Pu Khua Cin in, Mikang gamkekte dona dingin, ama gamsunga om mite galkap dongin, kaikhawm hi. Ama Khuapi kimkot ah gal nanna dingin, kanh topha sak hi. Britist Empire te'n Sihzang kualteng alak khit uh ciangin, Kam Hau' gam ladingin ong kalsuan uhi. General Faunce in Kam Hau' gam Ukpipa Pu Khua Cin' kiangah ama gamsunga aom Thau khempeuh leh lutna sum angen dingin, Palai khat sawlin paisak hi. Pu Khua Cin in, hih angette apiakloh thamloh na thusim saklo hi.
Kam Hau' gam Ukpipa nialna kammalte, General Faunce leh Major Raikes te'n azak uh ciangin, Tedim Khuapi ladingin Thuklai Khuakhung ( Panmun sakna phualpi) pa'n galkap tampi tawh dingkhia in, Vangteh Khua tunguh-a, Vangteh te'n nakpitak in ado uh hang'n nangzo tuanlo a, Gamkekte'n Inn 220 haltum sak uhi. March 10 ni-in, Saizang Khua sim uh-a, Saizang Khua tenzongh nakpitak ado uh hangin, lel uh-a, a innte uh hal sak uhi.
Kam Hau gam - Tedim Khuapi Alakkna Thu
Gamkek Mikang galkapte'n Saizang Khua asuksiat khit uh ciangin, Tedim Khuapi simdingin, March 12 ni-in, hong dingkhia uhi. Gam Ukpi Pu Khua Cin in, ama galkap pawlkhat Lawibual ah napangsak khol a, Khuakim' kanhte ah galkapte pangkhol sak hi. Gamkek galkapte'n Lawibual hongphu uh-a, nakpitak in hong kikap uhi. Gam-it galkapte'n galhiam hoih neilo uh ahihman-in, nungkik uhi. Khuakim' kanhpa'n apang galkapte'n zongh hangsan takin nado uh himah leh Gamkek galkapte pawlcingin vanzat khaupai theilua ahihman-in, nangzolo uhi. Gamkek galkapte, Khuapi sungah lutin inn citeng meitawh haltum vek uhi. Khuamite pen khethawlna peuh ah taikek manguh-a, pawlkhatte Tozang lam zuanin tai uhi. Hih Gamkekte tawh kidona ah Gamkek galkap 50 si-in, 12 liam uh-a, Gam-it galkap 25 si-in, 50 liam hi.
Sukte leh Gamkekte' Kidona
Mikang Gamkekte Kalaymyo pa'n hongkah toto uh-a, Leisan Han Thang Lu, Thingtanh leh Thaang kulhte pan nakpitak kidona ah Gamkekte zat van leh thaute khauhpai theilua ahihman-in, nang zolo in, Sihzang kual' Khua teng, Khuakhat khit Khuakhat ongla toto uhi. Thuklai Khuakhung phualpi pan kipanpha in, Sukte' gam saklam leh Kam Hau gam simdingin, hongkuan uh-a, Vangteh leh Saizang Khuate alak khit uh ciangin, Kam Hau gam Tedim Khuapi la uhi. Lungtangpha Sihzang galkap kimkhat in gamsung belin nakpitak kipankik uh-a, Gamkekte'n tuate leizon in, buben kawikawi uhi. Hibang tengtawh 1889 Kum khalhun hongbei in, Tukhun hongtung a, Gamkekte tawmvei sung tawlnga uhi. 1890 Kum tak ciangin, galsim zomkik uhi.
Galsim-a kuanna ding'n lampi nihna ah Lt. Colonel Skene in Tashon leh Falam gam simna dingin Zawlnu ah galvilna phualpi hongphut in, kibusa uhi. Hih Zalnu phualpi panin Mikangte leh Sukte in, kilemna bawl uh-a, Ku-ukna vaihawm uliante tawh kimuh dingthu Pu Do Thawng (Sukte Gam Ukpipa) zasak uhi. Sukte' gamsunga Thau teng leh lutna sum apiakna dingin Pu Do Thawng zasak uhi. Pu Do Thawng painuamlo ahihman-in, Mar 1, 1890 ni-in, Mualbem Khua simdingin Lt. Colonel Skene leh galkap tampi hongkuan uhi. Mualbek te'n kanh to-in, kulh bawl uh-a, kiging phitphet in om uhi. Ahih hangin, lamkal ah Pu Lim Tuang (Dakdung Hausapa) in, Mualbemte' kiginkholhzia Mikangte' tungah nakosim ahihman-in, upmawh banglo in galte hong kuanzia kilamdang hi. Thaupi tawh agamla pan kitatsatlo in kap ahihman-in, Inn 200 sungpan 37 bek kanglo in, adangte kangtum hi. Hih kikapna ah gamkekte nih nasia takin liam hi. Hih kidona ah Sukte' gampa'n galsiamte anuai-a teng ahihi.
1. Pu Hau Khaw Zam ( Makaipi, Sukte )
2. Pu Khan Teu ( Makaihuh, Khupmu )
3. Pu Lam Pau ( Upa, Khupmu )
4. Pu Kim Pau ( Upa, Sukte )
5. Pu Thuam Khaw Thang ( Upa, Sukte )
6. Pu Kim Tun ( Upa, Suksak )
7. Pu Tuang Suan ( Upa, Lamkai )
8. Pu Pau Khai ( Upa, Sukte )
9. Pu Khai Hau ( Upa, Sukte )
10. Pu Sum Pau ( Upa, Sukte )
11. Pu Tuang Khan ( Upa, Zahlangh )
12. Pu Nang Khual ( Upa, Vomlong )
13. Pu Pau Thawng ( Upa, Sukte )
14. Pu Pau Hau ( Upa, Sukte )
15. Pu Tuang Son ( Upa, Sukte )
16. Pu Tuang Lian ( Upa, ? )
17. Phut Tun ( Upa, Samte )
18. Pu Mum Vum ( Upa, Khupmu )
19. Pu Khai Kham ( Upa, Lamkai )
20. Pu Kai Tun ( Upa, Vomlong )
21. Pu Hin Thang ( Upa, Sukte )
22. Pu Tuang Ngin ( Upa, Naulak )
23. Pu Kuk Khual ( Upa, Suksak )
24. Pu Suan Khual ( Upa, Suksak )
25. Pu Soh Hang ( Upa, Suksak )
26. Pu Do Hang ( Upa, ? )
27. Pu Kam Lian ( Upa, ? )
28. Pu Pau Deng ( Upa, ? )
29. Pu Thuam Suan ( Upa, ? )
Note: Hih Tangthu pen Mualbem Khua Tangthu Bu sungpa'n, Pu Sian Khan Pau gelhna siksan in, Tangthu kan pawlkhat dotkak-a konggelhkhiat ahihi. Mangngilh lohna in mainawt zawhna hi. ( Understanding thu past, acting in the present, building in the future: Demont Tutu )
No comments:
Post a Comment