Last Updated on Monday, 21 November 2011 21:17 Written by Admin Monday, 21 November 2011 21:05
Zogamah Tuili lianpen ahi “Rih” tuili kici pen a liatna akimkot tai (miles 3) bang zai-in lungtang lim tawh kibang a etlawh mahmah hi. Hih tuili pen nidang lai pekin Mizoram Muaklawi khua Sabengpa khat in na mu masa pen kici hi. Mikang kumpi hong khan ciangin hih tuili sungah na manpha tampitak om ding hi, ci-in um mawh uh ahimanin a kiu khat panin tua tuili hei khiat ding kipanin lei na to khia ngei uhi.
Tua bangin tui a heikhiat sawmna hangin thakhatin huihpi le guah kithuahin meilom kai-in vanging in khuahhun sia lua ahimanin mikang te’n a nasep uh khawlin hei zo nawn lo uhi. Mite’ gen ngei thu khatah, ni dangin hih Rih gamah Sabang ten’ Sai a kap uh ciangin hih tuili sung kidenna (lut)pahpah uh ahimanin kuamah in Sai man zo ngei mahmah lo uhi, kici hi. 1942 kumin Rih khawdar khua kisat pan hi, ci-in mual suang tungah kiciamteh hi.
Hih Rih a lam danna khat leuleu ah tuili tungah singteh kia a om leh vasa te’n lakhia pahpah kici hi. Tua banah hih Rih tuili pen kum khatin khatvei kilokin ninzel hi, kici-a, tua bangin akilok ciangin inn ah a kila Rih tuili tui thawl tawh a kikoihte zong nin pah lianlian , kici hi. Rih tuili sungah vasa pawl khat tenga tua pen Rih ak kici hi. Tuili tungah a vak ciangin a ngawng dawk sakzel, tumzelin om a, muhnop kisa mahmah hi. Tuhun lamlam ciangin gamsung bek hi nawn loin gamdang pan khualzin mite (Tourist) te in muhnopsa in limet mahmah uh hi.
Tuili tungah gunkuang gol khat tawh kivak thei a, mi khat ciang Ks. 500/- ngen uhi. Tuk hun, Phalpi hun, khuakhal hun cih om loin Rih tuili en mi tuamtuam pen ei Kawlgam lam pan sangin Mizo gam lam pan hong pai mi tamzaw den hi. Nisimin Mizo gam panin Rih tuili en ding bekbekin Motor 4 le 5 bang pai den uh hi. Tua ahih manin hih Rihli pen Zogam le galkhat lam i mipihte tawh kikal ah kipumkhatna lim hong lak hi.
By: Rev. Than Za Cin,(AGS, ZBCM)
No comments:
Post a Comment