LEN NUPA' TANGTHU

Gelh - Dr. Dongno

Len Nupa cih pen Zomite' Tangthu ah mual minthang khat a kigen hi-in Zogam Tedim gam huam Ailam kici mualpi dawn Kaptel khua khung tai thum agamlatna mualpi nih kituah hilhelna, mualkuam zaang nopci mahmah khat ahi hi.

Kaptel gam sung gammang tulak (Reserved forest) huam sungah omin, Tedim gam ciamtehna lim (Land Record) zumpi ah zong gamlim ki-en thei hi. Abeisa 20.03.1992 ni-in Sia Pau Za Khan panpihna tawh Len Nupa ah mualsuang khat thungetna tawh kiphut hi. Hih Len Nupa mual pen mual minthang khat ahih mah bangin, na lamdang thu tuamtuam apiangte athei nai lo, le a za nai lo tampi ki om lai hi. Len Nupa mual pen Tedim khuapi pan taisawm nih gamla ahih manin asawt lo-in hun nuam zangh dingin Len Nupa ah ih pai thei ta ding hi.

Len Nupa thu ciaptehna : 

Falam gam leh Mizo gam dong a minthang, Len Nupa thu ih theihloh ding pammaih lua sa ka hih manin, Jan 3,2010 ni-in Kaptel khua AG sia Rev. Song Sian Pau kiang ah “ Len Nupa tangthu laibu khat ong bawl in; azaknop huai thu lamdang tampite ciapteh huai hi. “ ci-in ka cial hi. Tua ni mahin Hausa pa Do Za Tuang kiang ah,”Len Nupa pai nading mawtaw lampi na zong un la, Len Nupa a kiimah sing phuk lo, lokho lo, gam hal lo in sa zong beng sak kei-in “ci-in ka ngaihsutna ka kikuppih hi. 2011 kumin Teltui Zingsol (Vol. 2 ) sung ah azaknop huai Len Nupa thute ong hawm khia pah uh aa, tu-in tua laibu siksan kawm in kong gelh khia sawn hi. Kaptel pan Len Nupa lampi zong tukum March 2012 sungin lampi bawl/ tawh kipan zo uh hi.

Etlawm mualkuam Len Nupa :  

Tua lai a apiang thu lamdangte hangin, ‘Si-khate khua ‘ hi ding hi, ci-in aki um, aki- lipkhap, Len Nupa pen Falam gam leh Mizogam dongin minthang hi. Falam gam ah khanglui mite-in ‘gamsa-te pianna mun leh a uk a ngakte omna mun ci-in um uh ahih manin gamsa ngen dingin ong pai thei zel uh hi. Mizo gam panin Len Nupa ahoihna en dingin akum akumin mi tampi ong pai uh hi. Ka neulai-in Len Nupa thu akigen ka za ngei aa, “ Tua lai va tung leng hoih lua ahih manin kiciah kik nuam lo phial hi ” ong ki cih ka mangngilh thei kei hi. Mangkangte-in zong abawltawm uh, fairyland, ci-in dawi gam dan tangthu tuamtuam nei uh hi. Ei Zomite-in amun, agam ngiat in, tuni-dongin ih muh theih, ‘ Si-khate khua ‘ kici, thu lamdang tuamtuam apianna, Len Nupa nei ihih manin ih, ih hampha hi.

Len Nupa pen acre10 val ding zai-in, tuipi mai pan pi 7,256 asanna ah om hi. Mual sang dawn ah om ahih manin, huih vot siangtho nung hiauhiau denin, len paak leh lopate huang ngeelngeel hi. January pan May kha sung tengin lenpak asan, adum, pak zihziah in etlawm lua hi. A kiim apam ah gam-maang tulakin umcih aa, van dum tawh ih etkhop ciangin etlawm mahmah hi. A laizang ah tui / lui neu khat kawi ngiuu-ngeuu in luang hi. Tungtun lianpi bangin mualbo om litlet kawikawi aa, tua mualbote ah lothang peek mihing khut tawh kisuan lo, agualgualin po hi. Kawltu zong po ngei aa, tuhun ciangin bei ta hi. Nahlun kici singkung namkhat zong po aa a gammangte/ mimangte bekin mu thei uh hi, ci-in kigen hi. Akiim apaam ah vasate khuang liingliingin ong lungnuam sak hi. Sun gamdaih hun ciangin gamsate’n tui ne uh aa, zan ciangin sapite pai uh hi. Mun khatah Innka dolpek/ dolcial kidawh bangin suang azaangtaam khat om aa “ Suang innka “ kici hi. Tua suang innkaa adung pi 10 sau in, a vai pi 15 zai hi. Len Nupa panin Aizawl khuapi leh India gam khua tampi zong kigal muh thei hi.

A kigen thu lamdangte : 

Taang lai-in tua Len nupa tui naak lam ah, mihing bangin a awk/ a Lua khat kiza thei zel ahih manin, ‘LuaZang ‘ kici masa hi. Len Nupa akipai ciangin aphual ah, “ Len Nupa“ ahih kei leh, ”Luazang kici-ngam lo aa ”Hausapi “ , ahk.” Ih pute Khua” kici hi. Suang Innka zong ‘ Hausapi Innka’ kici aa tua hi kei leh kigam -mang thei hi. Len Nupa pen ‘Si-khate Khawlmun ‘ zong ki ci hi. Khanglui mite in, misi ding a om ciang in a mang sung uh ah kilangh kholin a kha uh, “Len Nupa ah kikha tektek ung “ ci-in gen uh hi.

Nidang lai hun Khuado ciangin, misite kha in ong siim uh aa, zankim lai-in ong tungin zingsang phalvak kuanin Len Nupa lam ciah to uh hi ci-in, maangmute-in gen uh hi. Vankah mi pawl khatte’n hih mun ah, lungmuan tui, zuan loh tuidam luang in, misite kha Luazang atun ciangin gam ngakte’n tua tui na tulh ahih manin, a-inn lam uh phawk sak nawn lo hi, ci-in kiciamteh hi. Khatvei lai-in Kaptel khua pu Phawng Gin,kici logiak aa zan ciangin Len Nupa gei ah naupang khat in “ Kawltu ka nekna in ka hani sisan ” ci-in a lasak za hi. Sabengte khat veivei gammang thei uh aa, zan ciangin Len Nupa ah zan thapai khuang leh zam kitum za uh hi.

Khatvei leuleu sabeng pawl khat Len Nupa kim ah giahbuk sat in om uh hi. Khat awnghawh dingin pai aa ong ciah ciangin giahbuk kim teng kiimvel kawikawi hi. Asawt ciangin , ‘ Ong ciahin, hih lai ah ‘ , a cih uh ciangin ciah thei pan hi. A gennop loh hangin a mit humsakin akai kawikawi khat om hi ding hi. Khatvei leuleu Len Nupa ah mi nih sabeng in giak uh a, Mi pau za uh aa zong uh hi. Kuamah a muh loh uh ciangin abil uh lei ah phah in angaih uh ciangin za thei pan bek uh ahih manin, tua pen ‘lei pau’ kici hi.

Ni khat sabengte-in tui luanna akawi ngiungeu a kimat kik dekdekna sawn khia/ sulet-in a tui kigawm sak uh a, mun dang apai kal un angeina bangin na om/kizom kik zel hi. Susia zel uh aa kibawl kik zelzel hi. 1962 kumin Thuklai khua, Sia Mang Thawng, sangnaupangte tawh Len Nupa ah pai uh hi. Len Nupa gei ah ‘ buah, mengkeng ’ thau tawh akapkap uh hangin man lo uhhi. Tua zan a mang sung uah numei no khatin “ Ka akte uh nong kap sak uh ka pa heh mahmah ahi maw ! Man le uh cin ka pa’n ong dawm lo ding hi ven, ong kap sak nawn kei un “ ci-in gen hi.

BUANNEL pan LEN NUPA : 

PuThuam Thawngin Kaptel khua, kum 1867 kumin sat hi. Tual gal om lai hun ahih ciangin gal dal dingin Suangzang khua leh Tuitawh khuate na phut hi. Galvilnate kumsimin thumvei ta a-encik dingin pu Kai Tuah, Galthukan Mangpi in koih hi. Ni khat galvilin apai leh mual dawn zaang mun nopci khat mu aa, tua lai ah khua sat ding ngaihsun hi. Gam vel pha dingin vapai kik uh aa khua ong mui ciangin naupang lasa, mi pau leh khuang leh zam ging ngeiingaii a zak ciangin, khua sat ding khawl kik uh hi.Tua kuam zaang ah apai uh ciangin buan nel dikdek khuk ciangciang pha ahih manin, pu Kai Tuahin tua lai mun, ‘ Buannel ‘ ci-in min phuak hi.

Ni khat pu Kai Tuah agalvilna ah mihing khekhap athak mu aa, sulzuih pah hi. Pasal khat tui luanna gei ah mu-in, pummat hi. “ Nang ka gam ka khua Kaptel ong sim nuam aa ong ensim hi teh, kong man ding hi “ a cih ciangin, tua mipa-in, “ Kei Bocung mi ka hi aa, ko hih lai, Len Nupa ka ci uh hi. Gamsate pianna mun hi kaci uh aa, gamsate a uk leh hih leitang angak, Lalnu ( Chawng Tin Leri) kiang gamsa angen dingin ong pai ka hihi; pute aw, ong man kei tapeuh un “ ci-in thum hi. Pu Kai Tuah in “ Ih kimat, ih kithah hangin phattuamna om lo ahih ciangin lawmta, zawlta-in kiman ni “ ci-in akip sak nadingun akituahna uh mun min lawhna ki khek dingin kithukim uhhi. Falam, Mizote leh Hualngote’n tua lai mun, ‘ Len Nupa ‘ acih min pen ‘ Buannel’ akici min tawh kikhek uh aa, tua ni aa kipanin, Len Nupa kici hi. ‘ Mual Nupa’ cihna hi in alang tuak aa mual khat anu, khat apa ci-in kiciamteh hi.

Hualngote’n “Buannel Ramdai Cawngtin Leritual henna” kici laibu bawl uh aa la zong phuakin sasa uhhi. Ahih hangin,‘Buannel’ akhiatna leh apianna thu thei lo uh hi, ci- in Tui Trih khua kum za cinna jubilee magazine laibu sung ah ciamteh uh hi. Mizo gam ah zong kumpi sangte ah ‘ Buannel Ramdai “ cih thu ki sinsak hi. Falamte in zong ‘ Buannel Arsi ‘ ci-in magazine laibu tampi hawmkhia uhhi. Hih thu ih et ciangin pu Kai Tuah’ mi hehpih theihna le, amuhna saupi a madawk kholhna kilang hi. Galmat, samat kidem hun lai hi aa, thatin gal-ai leh gualtung tuangin minthang ding hi napi, mi-thah, galmat cihte mihing vai hi lo ci-in na mu khin hi. Tua bang amadawk ngaihsutna picing, mihing thuneihna, ‘ human right ‘ Zomite lak ah angaihsun masa pen leh azang masapen hi ci-in ki ciamteh hi.

Pu Kai Tuahin hih a hoih, a-etlawm Len Nupa min ama ong phuah sak suak ahih ban ah Len Nupa min ih lawh simin, khat leh khat ki-it ding, ki lawmta ding aa, mihing hihna ih thupi sak ding ong vaikhak ahih lam ih phawk ciat ding hi. Len Nupa lampi : Kaptel panin Len Nupa pai nang lampi sawtpi pekin taangpi tha tawh bawl ngei uh aa, 2008 kumin UNICEF uliante zong pai khin uh hi. Tu kum March kha sungin tua lampi pi 4-6 azai, motor cycle nuamtak aa apai theihna dingin hausa pa Do Za Tuang’ makaihna tawh kipan leuleu aa hih lai aki at laitak in,Kaptel pan tai khat ciang to khin uh hi. ZRDC in zong huhna sum thein nga tawh panpih ding ci-in ki za aa ki thalawp mahmah hi. Mai lam ah kuamahciatin ih hih theih bangin, ih gam a hoih semsem nadingin ih hanciam ciat ding hi.

Len Nupa na pai nop leh : 

Tedim-Kaptel-LenTang mawtaw lamlianpi zong tu kum sung mahin azaizawin ki puahpha ding ahih manin, mun tuamtuam panin Len Nupa ah asawt lo-in, hunnuam ki zang thei ding hi ta hi. Kawl zaang aa atengte leh Tedim lampan a pai nuamte adingin, Tedim–Kaptel- Len Nupa lampi nuamtakin kitawn thei ding hi. Saklam panin, Laitui-Kaptel-Len Nupa hi ding aa, India gampanin, Mizogam leh Lamka panin zong kipai thei ding hi. Khanglam, Falam lam panin Munluah khua tawh taili bek kigamla hi. Nidang pek aa kipan Mizogam panin, Len Nupa’ hoihna le nopcitna en ding bekbek in agamlapi pan khe tawh kipai ziahziah hi. I Zogam ah hih bang gam minthang i neih khak lam thei loin, ei Zomite in i awlmawh mel kei le Pasian hong piak thupha a thusimlo hi ding i hih manin, dahhuai phial ding ahi hi. Tua ahih ciangin limtak aa ih puah, ih kepcing ding ih gamluah, ‘ Etlawm mualkuam LEN NUPA’ ahihi. Hun nuam zangh khawm dingin Len Nupa ah kimu ni.

Ih Zo gam sung ah Len Nupa bek hi lo-in, a-etnophuai mun thupi tuamtuam om lai hi. Lunglen Kawlpi, Inn Buk mual, Thah Puang Pawl leh a ki mu mengmeng lo ( a om takpi ahih leh) Thuam Tuilite zong hoihtakin ih puah pha ding hi. Zalui tung, Ngennung lam ah zong bak kua hawmpi khat om hi. Tua gei ah zong Meitei gal mangpa kikap lupna Suangsuang zong etnophuai hi. Hihte thu zong a theite-in ong gen le uh cin kiza nuam hi. Ih tangthu aa kigen Thawm tangvalte kidemna, mei apekna mun, Sialkong kan, zong limtakin ih ciapteh ding thupi hi. Tua ahih manin I Zogam ah Pasian khutma mun thupi/ mual minthangte kemcing in, i zun i puah siam ciat dingin Zomite i kihanthawn hi. Zogam le Zolei Topan thupha pia hen.

By: Dr. Dongno ( Australia)

(Theih ding Dr. Dongno (Australia) at-dan lian in kong suah sak ahihi.)

1800-1948 KIKAL ZOGAM TANGTHU-2

Pu Pum Za Mang Ukpi Sepna

Ukpipa Hau Cin Khup cidam nawnlo a hih manin ukpi za a tapa Pum Za Mang tungah apnuam a, Chin Hills District, Deputy Commissioner W.R. Head kiangah ngetna lai khia hi. 1926 kumi Pu Pum Za Mang kum 32 phak laitak 1926 a kipanin Ukpi sem hi. Pu Hau Cin Khup kumzawnin hun sawtpi lupna tung ngakin om a, September 10, 1934 zingsang nai 7:00 in Pu Hau Cin Khup (kum 60), Tonzang innpi ah si hi. A sih in sial 74, lawi 11, bawng 18, sakol 2, a vekpi in gan 105 kawsah nei hi.

Ukpi Pu Pum Za Mang in 1917 kumin Thangkhal haupa Pu Za Tual (Sukte) tanu Cing Khaw Lian tawh kiteng a, a kumkik ciangin ta nei manlo in sihsan hi. 1920 kumin Saklam a Kangkap Hausa Pu Mang Cin Lian tanu Ciin Khaw Man tawh kiteng a, ta 8; Khup Khen Kham, Sian Lian Pau, Khup Do Dal, Pau Kap Thang, Kham Za Dal, Niang Khaw Man, Ciin Khan Cing leh Cing Lun Niang te a nei hi. Pu Pum Za Mang zi pen kha 7 sung a en nuamte a dingin hun beisak uh hi. Tua ciangin Pi Ciin Khaw Man in la phuak a;

(a) Hong en ve vua, hong en ve vua,

Luntawi phual ngo hing e.

(b) Luntawi phual ngo hing aw e,

N nuai dot Lunmang hing e.

Ukpi te khual a zin uh ciangin sakol tung tuangin zin uh a, Pi Ciin Khaw Man pen sakol tung tuang theilo ahih manin tal in a zawng uh hi. Tonzang innpi a tunkik uh ciangin khua kim khuapam a hausate, upate leh mipi te in nasia takin dawn uh hi.

Pu Kam Hau in a tate siah a kaihsa na a hi; Thangkhal, Gamngai, Mawngken, leh Ngennung khua hausa te siahkaih teng Mikang kumpi in phiat sak a, tang seu khat leh saliang te zong Pu Pum Za Mang in siah a kai hi. Guite kual hausa te siahkaih teng zong phiat sak a, kum thum ciang sialpi khat ta Sial siah, sa liang siah leh tangsiah te zong a pia uh hi.

Khua dang a pemte in a inn te uh zuak theilo a, ukpipa Pu Pum Za Mang in a tang hi. 1937 kum a kipanin khual khua a pemte in a inn tangin Rs. 750 pu Pum Za Mang pia uh a, a zuak nuamte in zuak thei uh hi. Logam pen hausa te in a neilo te pia uh hi.

Siahkiamna leh Sila a beina

Sila beina ding leh Siahtung siahphei a kiamna ding pen Britist Yangon governor in 1929 kumin thu bawl khin zo hina pi in 1934 kumin Pu Hau Cin Khup a sih ciangin kizang thei pan hi.

December 10,1934 in Yangon governor in, khua hausa te in saliang leh tangseu a lak te uh a kimkhat khiam uh henla, Innpipa pu Pum Za Mang piakhin uh hen, cih order suah uh hi.

May 12, 1937 in Ukpipa Pu Pum Za Mang leh a lai at Pu Vungh Za Kham te Yangon ah pai uh a, Yangon governor pa kiangah a order suah vai a nget phat kik uh a, Governor in ka thusuah sa kidok kik thei nawnlo hi, ci a, ukpipa Pu Pum Za Mang kumsim Rs. 2000 piak dingin gen a, Rs. 2000 pia pah hi.

August 5, 1937 in Ysngon panin Tonzang innpi tung uh a, lamkal ah Sangai khat man uh hi. Rs. 2000 leh Sangai mat lungdamkohna Pawl lianpi khat bawl a, sial 75, bawng 50 leh kel 100 go uh hi.

1937 kumin Yangon Governor panin pu Pum Za Mang kiangah mipi te a dingin a lungdam huai mahmah thu tung hi. Tua pen siah nam 9 lak pan nam 7 bei a, an bung khat leh gamsa liang khat bek kikai sakna ding leh Sila bei ding a, sila te kitan thei ding hi. Sila a gol pen te Rs. 50, sila nautang te Rs.25, Sasan (Sabak) tawh to a kaite Rs.10 tawh kitan ding hi. Sialpi khat Rs.25 in seh sak a, taubel khap-9 khat pen Rs.25 in kitan sak hi.

Galpi nihna sung Zogam a thupiang te
Galpi khatna pen

Galpi khatna apian ma pek in Manipur, Lushai Hills leh Chin Hills ah British galkap te lut khin uh hi. July 28,1914 pan November 11, 1918 dong kum 4 val galpi khat na piang a, Chin Labour Coup mi 1033 te 1917 kumin Tedim panin dingkhia uh a, 1918 kumin hong tung kik uh hi. Kam Hau gam ukpi Pu Khaw Cin Zam, Pu Hau Cin Khup leh Pu Pum Za Mang hun sung tengin Zogam ah British te hong ukin om den uh hi. Tua hun sungin Chin Hills Division pen Sukte gam, Kam Hau gam, Sihzang gam leh Zahau gam in kikhen hi.

Leitung galpi nihna pen Sep 1, 1939 pan Sep 2, 1945 dong kum 6 sung sawt a, Chin Hills Division sungah zong Japan te 1941 kumin Yangon tung uh a, 1942 kum June kha in Kalaymyo tung uh hi.

Tua hun laitak in ukpipa Pu Pum Za Mang dam mello in Yangon ah zato kilak dingin a lai-at Pu Vungh Za Kham tawh Yangon ah October 20, 1941 in tung uh hi. October 25, 1941 in Yangon, Mingladon a Bo. Kham Khual te innah Zomi Civil leh galkapbu te thu kikum uh a, Japan te huh dingin thukim uh hi. Chin Hills Commissioner, Mikangte in Pu Pum Za Mang in Japan te a huh dingin muangmawh a hih manin inn lam ciah dingin vaikhakkhak a, 1941 kum December kha in ciahto uh hi.

December 7, 1941 in Japan te in USA te galvan koihna phualpi Hawaii gam a Pearl Harbour tuikulh sim gawp uh a, British leh China te in Kalamyo nusia in Chin Hills lamah hong kahto uh a, India gam lam zuanzuan ta uh hi. Tua ciangin British te a huh Chin Battalion te zong lungkia mahmah uh hi. March 8, 1942 in Japan te in Yangon la uh hi.

Ukpipa Pu Pum Za Mang in Catholic Siampi Tun Yin kamtai dingin sawl a, laipua sak hi.

(1) Japan te in na mat uh Myitkyina Battallion, Burma rifle sung a om Chin galkapte leh battallion khat peuhpeuh sung a na mat uh Chin te thunung thuma omlo in khah khia ding,

(2) Japan te in ka mite numei leh pasal thulian lua hang a hih kei leh mawk bawlsiat loh ding,

(3) Gal sung a misi te, vansiate leh innsia te a sum in compensate pia ding

(4) Japan te in British te khut sung pan India suahtakna a ngah pih khit ciang Chin Hills zong Independent pia ding, cih te a hi hi.

Japan te in Pu Pum Za Mang ngetna thukim uh a, a mimat teng khah pah uh hi. Chin Hills Dividion Tedim SDO N.W. Kelly O.B.E in Sukte leh Sihzang ukpi te kiangah Japan te a nang dingin Levy ngen hi. April 25-27, 1942 sung Tedim ah kikum uh a, Chin Levy phut pah uh hi. Chin Levy A leh B in kikhen a, Chin Levy A pen gamkuan a gal nawk ding pawl hi a, Chin Levy B pen a mau khua ciat ah amau thau tek tawh, khua khat leh khua khat kikal a hung ding te a hi uh hi. Pu Pum Za Mang in ama ukna gam sung a hausa te, upate leh makaite khempeuh Tedim ah sam a, Chin Levy zom tek dingin a thei sak hi.

Chin Hills leh Burma gamgi ah Chin Levy te leh Japan te nakpi takin kido uh a, Leisan mual kidona ah Japan te tampi that in 150 liam uh hi. Tonzang ah, Singgial mualdung tengah anne manlo liangin kido uh hi. Kalaymyo pan Japan te in vanleng tawh kap in leilam pan thaupi tawh kap uh a, March 13, 1944 in Tedim panin British galkapte kihemkhia uh a, Imphal lam zuan uh hi. Japan te in Tedim, Tonzang, Singgial, Pallian, Chindwin gunpi dung tawnin Tamu lam pan zong nawkto uh hi.

Mikang galkap 17th Division te in Cikha ah (tai 82 na) phualpi nei uh a, vanleng neute a tukna dingin vanleng tualpi khat bawl uh hi. Tuikhiang, Nakzang, Tonzang, Sialciam (Tonzang khuakhung), Tuiha (tai 144 na) te ah galkap tampi koih uh a, Tedim Lawibual pen Brigade headquarters dingin nei uh hi. Thangpi (Fortwhite) pen a ngeina mah in galkap phualpi dingin zang uh hi. Southeast Asia Commander General Lord Louis Mountbatten pen Imphal panin mawtaw tawh Tedim pai a, galvanleng nih in lampi tawntung ah cing hi. Tedim Brigade Headquarters ah zankhat tam a, Imphal ah ciah kik hi.

Japan te hong hat semsem uh a, Chin Hills pan Mikang galkapte kihemkhia uh a, British galkapte in November 9, 1943 in Falam nusia uh a, March 13, 1944 in Tedim nusia uh a, March 19, 1944 in Tedim la uh hi.

Zomi te in Mikang te muang mahmah uh a, Japan te in a zawh ding uh umvetlo uh hi. Tua laitak in Mikang te in India gamah galtai nuam te a dingin Tonzang tualpi dim takin mawtawpi koih uh a, kuamah tuanglo uh hi. Japan te in Thangpi lam nawklo in Bunglung (Yazagyo), Phaidim lam tawnin Ngeisok bawk mual outpost la uh a, Mikang galkap 5 man uh a, Khamzang khuataw ah that uh hi.

March 13, 1944 in Tonzang khua khung Sialciam ah Mikang te tawh kido uh hi. March 13, 1944 in Falam lam pan a pai Japan te in Tuikhiang leh Singgial ah Mangkangte na khaktan uh a, Tamu pan hong pai Japan te in Lennakot pan Bizang gun lei kanin Cikha na tung uh hi. Japan te in Tonzang a om pasal khempeuh Sing-at khuataw lui Likhan lui dong van puasak uh hi. Tonzang Buzung leh Sanginnpi sikkangte phelkhia sak a, Tuikhiang dong puasak uh hi.

Tonzang ah Japan te a om sungin Mikang te in galvanleng 2, venlengneu-6, vanlengpi 12 tawh nisim phial in bomb khiat khiat uh a, inn tampi kang a, a kanglo te zong belhtheih tuanlo a, Tonzang te gim mahmah uh hi. Tuitum, Mualkawi, Sianggial, Kansau leh Cikha te zong gim mahmah uh hi. Mikang te in Nakzang a nusiat uh ciangin Nakzang sikleipi leh Lungsan sikleipi te thaupi tawh kaptan uh a, gungal lam tawh thu kizakna om thei pak nawnlo hi.

Japan te in Imphal leh Naga khuapi Kohima la dingin nawt to suak uh a, Singapore, Malaysia, Philippines kim a tuipi tungah USA leh a pawlte in Japan te nakpi takin do uh a, Japan te in lel zel uh ahih manin Manipur lama Japan galkapte kiangah galvan leh ration supply zo nawnlo uh hi. Tua ahih manin Imphal leh Kohima la zolo in 1944 kum August kha in Chin Hills lamah Japan te nungkik uh hi.

Ukpipa Pu Pum Za Mang in Pu Kam Za Nang, Pu Kai Za Thang, Pu En Khaw Vung leh Pu Vungh Kam te gungal pai sak in Gamlai phualpi in nei sak hi. Tua te in Japan te omna teng hilh uh a,Mikangte in bomb khiat in Machine gun tawh Japan te kap uh a, Japan te thanem semsem uh hi.

Chin Defence Army

Japan te in khua hausa upate sam sak a, a pailo peuhpeuh ngawngtan a hi hi. Kum tampi hong uk Mikang te kong hawlkhiat sak uh a, suaktakna na ngah ta uh hi. Na khantohna dingun nakpi takin na hong sem ding hi ung, hong langpan peuhpeuh na ngawng uh hong kitan ding hi, Chin Defence Army (CDA) na phut un, ci hi.

1942 kum June kha in Japan Commissioner Lt. Gen. Inada leh Pu Pum Za Mang te in CDA kiphut a, Japanese M. Hachita pen District Administration Officer (DAO) dingin seh hi. Pu Pum Za Mang sanggampa Pu Lian Cin Thang, Pu Vum Khaw Hau, Pu Pau Za Kam, Pu Khai Mun Mang a kipan CDA makai sehpah uh hi.

1944 kum June 5-10 sung Japan Inada in hausate leh makaite sam khawm a, Inada (Za Biak) in Japan te langpang a, England kumpi tawh a kipawl mithum gungal ah mi thum om a, a thu a kikan san laitak a hi hi. Gungal khua te pen thau leh sakol khempeuh June 14, 1944 ma in Tedim.hong pua ding uh a, hong puaklo te ngawntan hi ding hi, cih thu gen hi.

Sukte Independent Army

Gungal a mithum a cih te pen Sukte gungal nisuahna lamah Pu Thawng Za Khup leh Pu Thuam Za Mang, Sukte gungal nitumna lamah Pu Hau Za Lian te a hi uh hi. June 14, 1944 in Heilei khua ah gungal a thau nei teng leh sakol nei teng tawh thu kikum uh a, thahlup ding ih ngak sangin Sakol leh thau puaklo in do zaw ni, ci in thukim uh hi. July 11, 1944 in Heilei khua ah kikum kik uh a, "Free Chin Movement" cih min phuak uh hi. September 1, 1944 in Takzang camp ah thu kikum kik uh a, Free Chin Movement pen Sukte Independent Army cih tawh laih uh hi.

September 1, 1944 in Mikang te in Chin Hills lam ah lut kik dingin Imphal panin Indian Army 5th Division tawh galtai Zomi 12 te lamhilh dingin zang in hong kilehkik uh hi.

September 14, 1944 in Tedim uk Japan Inada leh Japan galkapte 15 tawh CDA 30 tawh Mualbem ah pai uh a, S.I.A te in delh uh a, Mualbem khua umcih uh hi. Japan te tawh kikap uh a, khat kap lum in Japan Inada man uh a, September 15, 1944 in CDA 30 te zong man khin uh hi. Tua Japan bupa Za Biak pen Mualbem pan Heilei ah puak uh a, Heilei pan India gam Hoshiarpur a omb17th Brigade pa kiangah puak uh hi.

S.I.A te in Mualbem ukpipa Pu Thuam Za Mang innpi phualpi in nei uh a, Japan uk sung a om CDA te Mualbem ukpipa Pu Thuam Za Mang innpi a S.I.A te kiangah ki-ap khin ding thu zasak uh hi. Tua ciangin Limkhai, Vangteh, Suahlim, Lawibual, Saizang leh Khuano khua te pan CDA te Mualbem ah ki ap ziahziah uh a, S.I.A galkap hi pahpah uh hi.

S.I.A te khen-4 kisuah uh a, September 15 pan October 14, 1944 dong kha khat sung Japan te omna; Saizang, Lailo, Khumvum (Vangteh gam), Phun-om, Thangnuai, Dolluang, Khumlumual, Thang-ngal, Zawngkong, Phaiphek, Lamzang, Phaileng, Suahlim cih te sim kawikawi uh hi. A nunungpen ah Japan te phualpi a hi; Tungvum leh Sakhiang te October 14, 1944 sim uh a, zo mang uh hi.

November 27, 1944 in Tedim, Fortwhite ah British Lt.Col. Warrin, Major Franklin te in Western Chin Levy te leh S.I.A te sam uh a, tavuan apna kinei uh hi. Takzang camp pan June 22-Novrmber 27 kikal S.I.A galkapte leh September 15- November 27, 1944 dong a semte pahtawina certificate pia uh hi.

Japan te in Tonzang a lak uh ciangin Kam Hau gam tangin Japan te tawh kilemna thu a gen dingin Pu Hau Cin Khup leh Pi Vung Khaw Man te tapa 4 na Pu Lian Cin Thang zang uh hi. Japan te tawh thukimna bawl in Chin Defence Army phut uh a, Pu Lian Cin Thang makaipi khat in koih a, Mualbem ah om sak hi.

Japan te kiang pan British galkapte a nungkik lai un a tai manlo khat Seitual khua ah om hi. Japan te in Pu Lian Cin Thang, Pu Kham En, Pu Kam Za Vungh leh CDA galkapte delh sak a, kaplum uh hi. Japan te nungkik in Makangte a nai uh ciangin Pu Lian Cin Thang, Pu Kham En, Pu Kam Za Vungh te Champhai a Mangkang te kiangah kipia uh hi. Champhai pan Silchar ah, Guwahati ah, Imphal ah, Tedim ah, Falam ah, Kalewa ah, Monywa thong te ah kipuak in, khantawn thongkia dingin thu kikhen uh hi.

Tua hun sungin Falam khua ah ukpi teng kikhopna khat om a, Pu Pum Za Mang in Falam ukpi, Hakha ukpi te zawn a, Mangkang te kiangah Japan te thupiak hi. Thupiak bangin gamta kei le uh amau kithat ding hi, ci in genpih uh a, kum 20 thongkia dingin khiam suk sak uh hi. Pu Hau Cin Pau in Yangon ah appeal hih leuleu a, kum 15 khiam in kum 5 bek thongkia hi. Monywa thong sung panin Pu Lian Cin Thang in a sangkahpih Bogyoke Aung San laikhak a, Aung San in a lawmpa Thakin Thein Pe pai sak a, Monywa thong ukpa kimu a, thong panin suakta hi.

Japan gal a ven khit ciangin gal sung a kizang mawtaw a lian a neu tampi tak Nakzang camp, Tuikhiang camp, Cikha camp, Kansau khua leh mun tuamtuam ah kinusia zihziah hi. Tua camp te ah a ut ut pai in nektheih, dawn theih, zanpuan, siksia a kipan a deih deih uh la in, khawm in nawnkhia zishziah uh hi.

Khuabem te Lut Thual in mawtaw te na kaikhawm a, Imphal panin Meitei te mawtaw hawl thei leh a bawlthei pai uh a, Lut Thual tung pan lei uh a, Meitei te leh Lut Thual in hauh lawh uh hi.

Eimi te in mawtaw te akgil ding peuh in zang uh a, mawtaw peite lakhia in mualdawn ah puato in khuk suk a, muhnop sa mahmah in sun thapai in hun zang uh hi. Phutphut a ki ci motorcycle te a tuat uh leh a ging ciangin lau uh a, saupipi tai uh hi. Mawtaw hoihlai te cimphawnna in phel uh a, a vante kem uh hi. Mawtaw sikte tu le hei in sek uh hi.

British te in gambup ah Japan te zo uh a, British khut sungah om kik in Pu Pum Za Mang in ukpi mah sem kik hi. Bogyoke Aung San makai in Burma in Independent ngah ding cih thu kiza za ta hi. Tedim Subdivision Officer . West in Tonzang innpi ah meeting khat sam a, Burma pen council tawh ki uk ta ding a hih manin no gam no kaih sung panin council nasemte a dingin bangzah khiat zo ding na hi uh hiam, a cih leh hausa te in bangmah zah khiat zo kei nung, ci uh hi.

Kawlgam bupkikhop a om ma in British te in, no mual tungmite tei nai hetlo na hih manun Major Stevenson tawh vaikhawm khawm in hong uk le ung, na ut hiam, a cih leh Pu Pum Za Mang in, hong kikum phot nung, ci hi. Mual tung mite kamkupna ah Pu Pum Za Mang in tua thu gen in kikum uh a, Kawlte khutnuai ah om sangin ut zaw mah hang, ci in thukim uh hi.

England Prime Minister Clement Atlee in Burma tawh kiton in mual tung mite zong Independent piak dingin gen hi. Tua thu pen October 17, 1946 in City Hall ah Yangon Governor R.D Smith in a pulak ngiat a hi hi.

Tua ciangin Bogyoke Aung San in mual tung mi a hi; Chin, Shan, Kachin leh Karen te kiangah Burma Independent ngahna dingun hong huh un. Banghangin England kumpi hong khemna um na hi uh hiam? Eite in vaihawm khawm in,ngun-kuang kham-kuang sawk khawm leng nekledawn a kibangin nekhawm dawn khawm ding hihang, ci in ukpi te leh hausa te a zawhna dingin kei zong mualtung mi Chin ka hihi, ci lai hi.

Tua ciangin February 12, 1947 in Panglong conference sam a, Burma Prime Minister ding pen kikhek kual ding hihang, ci in thukimna bawl uh a, Panglong Agreement, ki ci hi.

July 19, 1947 in Bogyoke Aung San leh Cabinet Minister 6 tawh kikap lum hi. Panglong Agreement bawl makaipipa kikap lum mah leh mual tung mi ukpi te in thukikupna nei nawn tuanlo in Kawlte pummuan uh a, Bogyoke Aung San tangin U Nu, England ah pai a, mual tung mite zong Burma gam sungah om ding ut mahmah uh hi, thukim uh hi, Panglong Agreement ka bawl uh hi, ci in Enland Prime Minister Clement Atlee lak a, tua zah a ut tak na hi uh tak in ci in October 17, 1947 in U Nu-Atlee Treaty agreement bawl pih hi. January 4, 1948 in British te kiang panin Burma in Independent ngah a, Zomi te Kawl te khut sungah ih lut ni a hi hi.

British te in Burma a nusiat ding uh ciangin a vui a tang a kipan galvan khempeuh Col. Lian Cin Zam khut ah ap uh a, Col. Dal Za Kam in Col. Lian Cin Zam a huh hi. Tua hun lai in 1st Chin Battalion, 2nd Chin Battalion, 3rd Chin Battalion, 4th Chin Battalion cih om hi.

Panglong Conference ni February 12, 1947 pen Union Day in, ki ciamteh hi. Chin Hills Division pen Chin Hills Special Division in laih uh hi. 1974 kum in Chin Affairs Council in Chin Hills Special Division pen Chin State in laih uh hi.

Burma in Independent a ngah kumin Kam Hau gam Ukpi nunung pen Pu Pum Za Mang in November 10, 1948 zankim laitak in Tedim Innpi ah a zin leh a natna kitheilo in si hi. Pu Pum Za Mang a sih ciangin A pa Hau Cin Khup kiangah vui dingin ama Jeep tawh Tonzang ah kipua to hi. A tate in Sial, lawi, bawng, leh sakol a kigawm in gan 45 kawsah sat uh hi. April 15, 1949 nitak nai 10:00 in vui uh hi. November10, 1950 kumin a zi le a tate in Pu Pum Za Mual a bawl uh hi.

Thu lakna te;

• Mualbem khua tangthu

•’Kam Hau gam ukpite tangthu

• Sukte ukpite tangthu

• Heilei Mualsuang (Pu Kam Cin Pau, 2005)

Crd:

INNPITE’ TANGTHU

Thu masa:

Innpite ih cih pen Guite, Sukte leh Manlunte hi pen hi. Laphuak siam a minthang Gualnamte Phungmaang’ hunin zong Tawmbingte tawm vei na mang uh hi.. Tawmbingte’ sangin Thawmte sawt na maang zaw uh hi. Sawt a maang pen cileng Guite mah ahi hi. Sukte pen Khantuam’ khang pan a hong kipan ahi hi. A hih hangin Innpite’ lakah sukte mah galhat penin vaihawm zong na zo pen uh hi. Tawl khat khit ciangin Guite’ uk sung a om khate in Guite beh hong ki cih tawm uh om a, Sukte’ uk sung a omte Sukte beh a ki cih hun uh hong om mawk hi. Ahi zongin India leh Myanmar in Maangkaangte’ khut sung panin (Independent) suahtakna hong lak uh ciangin, Guite beh taktak lote in Guite beh hong kici nuam nawnlo uh a, Sukte beh taktak lote in zong Sukte beh hong kici nuam nawnlo uh hi. Tua banah Sukte kici min hong deih loh manun, Tedim khua min tamin leh Maangkangte’ hong cihna uh tawh kizui-in, Tedim, Chin hong kici hi. Lusheite bang in zong a paipai min hong kipuaksakna PAIHTE ci-in hong lo uh hi.

THAWMTE MANGSUUM’ TANGTHU
1. Saizang khua-ah Maangsuum a tunna thu:

Mangsuum a kici Thawmte beh hi a Kulsuang’ tapa ahi hi. Ama khan’ hun sawt tuak mahmah a hih manin Thawmte beh tangthu bang ih sim ciangin dawi leh kau thu peuh tawh na pan bialbual hi. Maangssum leh Haangssum (buansiing) na kizawl uh hi. Haangsuum ih cih pen tua hun laitak a Phaipi hausa-pa ahi hi. Kulsuang’ khang a kipanin zong Maangsuumte in sila leh inn teng tampi na neikhin zo uh hi. Ni khat Mim-ek khua pan chianlai khua-ah pem dingin a silate tawh hong kithawi uh hi. A pai khiat ding ciangin Maangsuum in a silate vongsum lianpi khat pua sak a, Munpi laizang hong tun ciangin hi bangin ai a san hi. “Ka tuu ka ta tawh nuamtakin hih munpi laizangah ka ten zawh ding leh, ka sumpi aw munpi laizangah na khawl in,” ci-in a sumpi a khuk hi. Maangsuum’ deihna munah a sumpi na tu lo ahih manin a silate in a pu Maangsuum’ theih ma-in a vongsum ken pan na pua to-in munpi laizangah a na koih sim uh hi. Tua banga a koih khit uh ciangin, a pu Maangsuum a ensak uh hi. Tua ciangin Chianlai khuate in vongsum omna munah Maangsuum’ inn ding a lamsak pah uh hi. Tua munpi lai zang pen gamsai pha mahmah ahih manin a khua min dingin “SAIZAANG’ phuak uh hi. Tawmbingte Tuahkam kicipa’ inn mun tektekah Maangsuum in a inn ding hong lam hi. Saizang khua-ah, Kulsuang leh a tapa Maangsuum in vaikhawmin hong pang uh a, gam zapi kekin Hausa lianpi-in hong pang uh hi. A hih hangin a khua nung ciangin Maangsuum khang mangin innman hi kici hi.

Thawmte Maangsuum in sanggam pasal Sawmsiing leh sanggam numei Manciang a nei hi. Sialthah khua-ah Kulsuang leh a tate a ten lai-in Maangsuum in Guite Vummaang’ tanu Komkim zi-in a nei hi. Kaptel gam sung Guava kici khua-ah Kulsuang leh a tate vaihawmin a pang uh hi. Tua hun laitakin Chianlai khua-ah Songputte leh Taangpuate in vaihawmin a om uh hi. Chiamlai khua a vaihawmte in vaihawm siam kisa zolo leh gal leh sa-ah cingtaak kisa zolo uh ahih manin, vaihawm dingin Kulsuang leh a tate a cial uh hi. Apa’ hangin Maangsuum pil leh hauh thhuahin minthang mahmah hi. Mi cimawh leh haksatna thuakte in Maangsuumte va belbel uh a, tua thamlo-in a khua sung vaihawmte a muang zolo mipawl khatte hong tai-in Maangsuumte hong belbel uh ahih manin, a sawtlo-in a tenna SAIZAANG pen inn 700 hong pha ziau hi.

Maangsuum in tapasal 7 leh ta numei 1 nei a, ih ngeina om bangin a tapa upen in apa Kulsung tamin Suanglet ahi hi. Ata nautum pen in akhua min uh Saizang khua tamin Zaangluah ahi hi. Maangsuum pen hau semsemin a min hong thang semsem hi.

2. Maangsuum’ zi Komkim gitlohna:

Khangluite in numei gilo in phung sung bangkua sung khen hi a cih mah bangin Maangsuumte unau vakhutui bang a, a om khawm hilhel Komkim’ bawlin hong kikhen uh hi. Komkim’ bawlin Maangsuum’ hauhsak laitakin a inn sungah nakpi-in buaina hong om hi. Komkim ki phasakin a naupa Sawmsiing a dingin thuak hakin hong haksa mahmah hi. A tawpna ciangin Sawmsiing in a-u Komkim thuak zolo-in kawl zang lamah pemin Tuangdote va bel hi.

Maangsuumte unau kingai mahmah uh hih manin, Maangsuum in kawl gam a om anaupa sam kik a, amah zong a zi tawh hong ciah to pah vingvengin Zaangtalui galah hong teng uh hi. Utan’ Nautan’ tang dingin Maangsuum in a naupa ton sak a sawm hi. Ton nading gan zong khih khinin guaton zong a phut khin uh hi. Maangsuum in,a tanute’ kiangah “Inn a tontul va la un,” ci-in a sawl hi. A tanute zong paipah uh a, Komkim’ kiangah, “Pi aw tul hong pia in dawigawh ki go nuam hi,” ci-in a ngen uh hi. Komkim in tul pia nuamlo-in, “Kawltu, kawlta’ kha sam nuam na hih uh leh pai mengmeng un,” ci-in khut guak bek tawh a paisak hi. Maangsuum zong heh mahmah ahih manin a zi tawh nakpi-in kitawng uh a, Sawmsiin in tua thu a theih ciangin hehin, “Ka tangval lai a kipanin hong simmawh hong zawngsak tu ni ciang dong nang hi teh,” ci-in kitomin guaton phukin a song uh a tuptan sak hi. A zing ciangin gal khuangtan bawl dingin hong kithawi uh hi. Gal khuang tan ih cih pen ton leh aih ah a tungnung penpen ahi hi. Hi ci bang numei in phung sung bangkua sung phalkham thei mawk hi.

Komkim in a nung lam a vehciangin, a pasal lamte gensia a, a nung lamte in na pasal lamte in bangbang gen uh ahia, ci-in dong leh, “Bangdang gen khol ding uh ahia kido kisim ding khawngmah gen belin nei peuh vem,” ci-in a zuaupi gen thei hi. Ama lamah a ciah kik ciangin zong a nung lamte gensia-in a numglam guite-te leh ama lam Thawmte kitawng sak thei zelzel hi. Tapasal 7 nei ahih manin kimuang kisuang lua-in a pheng paupau hun tam mahmah hi. Khatvei hoh mangsia khat man a, a mangin nukik hi. Tu zan ka mangin nukik veng in, tapasal 7 lah nei khin ing sialkop zong go khin ing, nukik nawnin lah ki um khol ke’ng, ci-in pau lanlan hi.

3. Dawi mo neihna leh sialhauhna:

Maangsuum’ ta tum pen Zaangluah in a sial uh nisimin cing den hi. Ni khat a sial cinna gam lakah nungak mel hoih mahmah khat na om a, tua nu tawh a sun thapai-in kithuah thei zel uh hi. Tua nungaknu’ min in Kolnuthep kici hi. Tua banga a ki thuahthuah uh ciangin tua nungaknu in ngai mahmah a, kiteng ni ci-in kun thei zel hi. Tua banga a kutkut ciangin a Zaangluah in zong ka nu leh ka pa ong dong phot ni, ci-in dawng hi. Tua ciangin Zaangluah in a nu leh apa’ kiangah, “Nu aw, ka sialcinna-ah nungak hoih mahmah khat in hong ngai-in kiteng ni hong ci zel ahih manin bang cih ding ka hiam?” ci-in a nu leh a pa a dot ciangin a nu leh apa in zong, “Tua bang hong ngai om ahih leh hong ciahpih mai ve,” ci-in vaikhak uh hi. (Bang hang hiam cih leh tua nungaknu pen mun dang pan hong pai midang hi dingin ummawh lel uh hi.) Zaangluah in zong ngai pian simsim ahih manin a zi dingin a inn lam vuah ciahpih pah vingveng hi. (Bang hang hiam cih leh tua nungaknu a mel hoih mahmah hi.) Mangsuumte in tua bang mo hong neih vua kipanin, nisimin a sial uh khatta, khatta, ki behlap den hi. A sawt ciangin sial hong hau mahmah uh a, Mangsuumte’ Innnuai-ah ta zolo liang zah khopin hong tam hi. A sial hong khah khiat ciangin a pai masate lawmmual a khen khitin sial mei kinam ngelhngelh a pai a nunung pente in inn nuai sial kong kan lai hi, kici liang hi. A inn nuai sial buancim lah inn phaitam lam pan kipan inn kong mai dongin ki hot damdam tangial hi. A sial takkul lian pen bang hoh a kihawm sungah bak teng liangin ki gen hi.

Sial hong tam luat mahmah ciangin Zangluah in sialcing zo nawnlo ahih manin a inntengte cingsak hi. Ni khat Thangman kici Zote in a sialcingte khat na thahsak uh hi. Maangsuum zong heh mahmahin phula a, a kidona vuah Maangsuum’ mite 7 khawngtak si ahih manin Komkim in zong hih tawh kisai-in la tampi na phuak hi kici hi.

Maangsuum leh Komkim in a mo uh mihing takpi mah sa niloh kha uh hi. Tua bang a hong om tohtoh ciangin khat veivei guah peuh zu-in sakhi tuaitung peuh a kai ciangin a mo un, “Ka pa te’n a puan uh pho hi tah maw,” peuh ci-in, gamlak panin saza ham peuh za leh, “Ka pate galbeng ciah hin teh maw, ka uite uh ham ngaingai tah,” peuh ci thei lawmlawm hi. Tua teng banah a sial uh ani ani-in hong khan toh ciangin ih mo hoh mi tuampian khat peuh hi ding ahiam aw, ci-in hong lung himawh san uh hi. Ni khat Komkim in a mo nu’ dan a theih nop manin a huan khangah anteh lo ki neihin pai hi. A mo nu’ kiangah, “ Hih ka anteh lawh hong sang dih aw,” ci-in sam a, a mo nu zong a anteh lawh sang dingin innkaa panin bungbu siuseu a awnsuk leh, a muhnop mu theilo ahih manin, “Hong ban zo kei deuh cin gawl kalkakin hong sang o,,” ci-in gawl kal kak a,a sansuk leh, Komkim in a nuai lam pan, a mo nu’ su na ettoh sak a, a su pen mihing’ a’ na bang lo takpi-in na kiphei khit mawk ahih manin lamdang sa mahmah hi. Tua ciangin, “Aw, mi gengen dawi nungak khat mo a,a nei ih hi ta ve maw,” ci-in phawk pan uh hi.

Tua ciangin a teekte in, “ Ih om khopkhop nop hangin omkhawm thei nawn lo ding ih manin, bangbang hi leh innlam mah va zuankik mai lecin hoih ding hi,” ci-in kuppih uh a, ni khat ni ciangin a mo uh a inn lama kha nuam uh ahih manin kikhenna sa go-in kikhenna khat bawl sawm uh hi. (Bang hang hiam cih leh a mo-un ta nei theilo ahih manin a ta neihloh paulamin a khensawm uh ahi hi) Tua banga amak sawmna thu uh Kolnuthep in a theih ciangin, “Nute pate aw, ta ka neihloh hangin hong sit nahih uh leh hong sit hong nial peuhmah kei un, inn nuai a gulpi a om hangin lung kimawh kei un, bangmah ih tuah khak loh nading a hong cing khongkem hi zaw hi, ka lawmpa’ ute in zong zi a neih nai loh hangin zi a neih nop hunhun vuah midangte’ zi sangin a hoih zaw a pha zaw nei ding uh hi. Tu a ih neihsa ih lamhsa teng a kiam kei nak leh pha zo hi lel lo ahiam,” ci-in a nuleh apa’ kiangah a mak loh theihtheih nadingin gen hi. a hi zongin Komkim lungkim thei tuanlo hi.

Tua ciangin Kolnuthep in taangngan huan dingin bel hong suang a, tui sosak hi. A an huan kawmkawmin a muk phum thuauthuau-in a phuisam kawmin taangbem a khe tawh a sui hi. lungkim lo ahih manin a bel suan lai suan khia-in a sutpi zui-in tuizo a sung suk hi. Tua a tui so buak in inn nuai a amaute asiam gulpi vom na buak kha citciat hi. Tua ciangin gulpi vom zong sa sa lua-in kitom gawp a, inn nuai a gante lau-in hong phia ngeingai uh hi. Maangsuumte nupa in lamdang sa-in ih inn nuai a gante bang a ci ahia ci a,a va et suk uh leh, gulpi sam nei khat a kitom auau a mu uh hi. Tua gulpi sam nei kitomin a gawl phupai-in huankhang lamah tai suk hi. Tua kikalin Kolnuthep in sialkong hongin sial hong pusuah ding ngakin sialkongah na ding hi. Sialte a banbanin hong tai khia ngeingai uh hi. Tua ciangin Maangsuum in sialte amai-ah pangin hawlkik a, a ginalo a zawngkhal teng bek hawlkhia zo hi. A hoih leh a cidam teng pai khia mang gai uh a, tua teng khempeuh gam sungah zangsial suak mang khin kici hi. Zangsialte pen tu dongin Maangsuum’ sial hi kici hi. Maangsuum zong a cihmawh manin vanlam nga-in tuiphihin phuisam a,:

“Kong kep kong khoi ka sialte aw, hong kem hong cing zolo ka hih leh thaltang khatin na si ta un, Saizaangta’ peuhmah nasik na totin si kei hen,”

ci-in kam a vaikhak hi. Tua ahih manin tu dongin khangluite in Saizaang’ ta peuhmah Zangsial’ sik a si omlo hi, na ci uh hi.

Tua bangin a sialte uh a paikhat ngeingai laitakin a sialtal gol pen ki sungah bak kailiang a kici tungah, amo uh Kolnuthep tuangin lawmmual lam zuanin pai zuahzuah uh hi. Maangsuum in zong a silate’ kiangah, “Ih mo nun koi lam zuanpeuh mah hiam thei nuam hang in, a vazui sim un,” ci-in a nungah a zuisimsak hi. A silate khat in a zuihzuih leh lawmmual khen khit deuh Thuammual a tun ding ciangin thakhatin meii-neel hong kaai-in, a mo uh Kolnuthep pen meeipi’n tuamin Thuamvum mual dawn lam manawhin meii lakah mang hi. Tua ahih manin a mo uh Kolnuthep pen Thuam nungak hi ding hi, ci-in ki ummawh hi.

4. Maangsuum leh a tapasal sagihte sihna thu:

Komkim’ bawlin Maangsuum’ neihsa teng ani ani-in, damdamin hong kiam hiaihiai hi. Maangsuum in tapasal sagih nei-in a zi gilo asak mahmah hangin ma ngam tuanlo hi. Kum khat sa bet hunin sabeng dingin a inntengte Letkhup leh Sanciang tawh gam sungah hong kuan uh hi. Gawtmual hong tun ciangun a inn teengte’ kiangah, “Hih ak kiaklo hong hal sin vua ka vang a phat lai leh meikuang in kei hong pelh ding ai ve,” ci-in amah theitung khatah a tuang hi. Tua ciangin a inn teengte in zong apu’ sawlna om bangin ak kiaklo hal uh a, thakhatin huih nungin pingpei hong kipei-in mei in Maangsuum’ omna lam manawhin meikuang in Maangsuum pei nelh ahih manin thei tung pan a kia hi. Mei in nakpi-in hul ahih manin gim mahmah hi. (Pingpei in Maangsuum a pei nelh a kipan tu dongin Suumpei kici suak hi.) Tua ciangin inn lamah Mangsuum hong pua uh a, gim semsem in lamet omnawn pha lo hi. Tua ciangin a tapa Suanglet in, “Pa aw, nuntak ngap nawn hetlo nahih leh na than dopih dingin gam halte gel na han nuai-ah na sithu dawh nadingin hong koih sak nung,” ci-in a gen hi. Maangsuum in, “Bawite aw, tua bang hilo hi, hih ih silate’ hongbawl hilo a, kei man tua bangin hong hih un ci a ka sawl hi zaw hi, keima khialhna leh keima kamsiatna hang hi zaw hi, tua ahih manin that peuhmah kei un,” ci-in a sih kuanin vaikhak hi. A hi zongin apa hong sihtak ciangin a silate, apa’ sithu dawhna dingin koih sawm uh a, tua thu a sila geel in a theih ciangin, a nihun phaitam lamah tai-in Letkhup apuan nung lampan man kha uhhi. Sanciang ahih leh gawl kanin tai-in suakta hi. Tua ciangin Letkhup pen hannuai-ah apa’ sithu dawhna dingin a that takpi uh hi.

Maangsuum hong sih tak ciangin a tate in, apa uh si pusuah nadingin gamsa deih sese uh hi. Sabeng dingin a silate Vialnang leh a tapasal sagih teng gam hong kuan uh a, sunthapai sa a bet uh hangin khat zong manlo uh ahih manin gim mahmah uh hi. Nitak ciangin ciah dingin inn lam hong zuan uh a, Pakzaang gam a,Ngatan lui a kici na khang sawnsawn in,a cih nading theilo-in aki lehleh uh leh, lui leh lui kikalah singluang kikham phei khat mu uh a, tua tung tawnin a galkah zo uh hi. Inn a tun ciangin Vialnang in apute’ kiangah, “Guai, lamdang sa taktak ing, zan nitak a ih singluang kan in mit nei ve aw a mitphia laplap veh,” a cih leh apute in “Na zuau pipi gen kei in singluang mitnei za ngei kha’ng,” ci-in kinial uh a, Vialnang in zong, “Na up kei vua leh va en kik mah ve ni e, mitnei takpi mah hi.” ci-in nial teitei ahih manin a en kik dingin hong kuan kik uh hi. Lui hong tun ciangun singluang na omlai takpi a, a vekun singluang tung tawnin hong pai-in a nawl a tun ciangin Vialnang in, “Na up kei vua leh en vo hiah, mitnei kisa phia kakkak mah ei,” ci-in a mit a teipi tawh a suk leh tua a singluang kan uh pen singluang hilo-in gulpi khat lei a kidawh a nahih manin gulpi in nasa-in a ki hei leh, Maangsuum tapasal sagih teng tui-ah kia-in a si uhhi. Vialnang zong suakta hi napi khuai in deh gawp sawnsawn ahih manin amah zong inn atun ciangin a sawtlo-in a si hi. Aki upmawh nadanin, Maangsuumte’ inn nuai a Kolnuthep in a hawlkhiat gulpi pen tua lai-ah lei a kidawh hi dingin ki ummawh hi. A taktakin Kolnuthep amak uh ciangin heh a, aman a tum nading vua a bawl ahi hi. Khangluite in ihsiam ihsa in hong paai, a cih mah bangun a siam in a ne mang ahi hi. Tua ahih manin tu hun ciangin ei Christiante in dawi siam ut kei hang, Pasian’ hong siam bek ut hang kici hi. Dawi in hong siam a ih hauh sangin, bangmah neilo a om ki ut zaw hi. Dawi in hong siam ciangin a tawpna-ah hong ne tum mang veve hi, ci-in tu hunin dawisiam pheisam siam cihte kuamah ki ut nawn hetlo hi.

Maangsuum a sihkhit lian tak ciangin a tapasal sagih teng zong hong simang mawk hi. Komkim pen nidang a kimuang kisuanga a pheng paupau lai bang nawn hetlo-in ngak ding nei nawnlo ahih manin, a nung lamah a nukik hong kul ta hi. Ni khat ni ciangin a inn lam manawh dingin hong kithawi a, maulawng khat la-in tua maulawng a taang teng suletin a dim phitphetin a khibah manpha teng maulawng sungah a guang sim hi. Tua ciangin a phaitam lamah sengsia khatin vok an khol a, tua vok an lakah a dakbu hoih teng koihin vok an tawh vuknelh hi. ( Bang hang hiam cih leh khanglui lai van manpha ih cih te in khibah leh zam bu, dakbu hi lel hi. Khanglui lai-in khibah khat pen sial khatta bang na man hi.)

Ni khat ni ciangin anung lam zuan dingin hong kithawi a, a pai khiat ding ciangin, “Tute aw, kei mi mai en ding hi ta ka hih manin, ka tun na peuhah mi’ mai ka muh tuam khak thak leh, phaitama vok an ding a ka khol bal hawng, kawlkai hawngte beek hong puasak un,” ci-in a ngen hi. A tute in, “Pi aw, na deh nak leh pua in tua vok an lawmlawm,” ci-in apuasak uh hi. Kong a tun ciangin ki lehkik a, “Tute aw lamkalah kituakin lam peuh sikkhial kha leng ka lei nan nading omlo ding ahih manin, ka lupna gei a ka koih ka teipi hong tawi beek dih ning,” ci-in a teipi dingin a maulawng a la hi. Tua ahih manin Komkim in a khipi hoih, a dakbu hoih, a zambu hoih teng tawh a nung lam a va tun ciangin a nunglamte zong a lung uh nuamlo-in, “Um khang in, innpite’ van manpha teng hong pua mang na hih manin hong thei uh leh hoih lo ding hi.,”ci-in a zanzanin va pai-in Maangsuum’ gamluahte va thatin a innpi va haltum uh hi. A khua nung lamah a kikan kan ciangin Maangsuumte’ inn halte pen Komkim’ sanggamte ki ummawh hi. Bang hang hiam cih leh a zam adak a khipi gui teng innpi tawh kang mang hi, a ki cih ding a deih na uh ahi hi. A hi zongin Komkim a sihciangin innbuk nuai-ah kelpi khat bek kengin kivui hi, kici hi.

Tua ahih manin khangluite in a kimuang a kisuang lua a om ciangin, “Tu nei ta nei ta hang ci-in kiphasak kha kei un, Komkim zong taasal sagih nei-in nukik kici ahi,” ci-in tudongin khangluite in paunakin na zang uh hi.

Thukhupna:

Hih Saizang Thawmte Maangsuum’ tangthu leh a tapasal dawi zineihna thu pen, Khangluite in tangthu man taktak hi, ci-in na gen uh hi. Hihtangthu ih sim ciangin numei gilo in phung sung, buangkua sung, phalkham thei, siasak thei ahihna leh kiphatsak luat a hoihlohna tampi hong lak hi. Tua ahih manin numei ih cih in phung sung, bangkua sung, a nuam kimlai siasakin a kilem kimlai balkhamin, a kisia sak thei numeite ih hihna thei-in ih va lutna beh sung, phung sung, bangkua sung ahoih sak, a kilem sak Zomi numei ih suah theih nadingin Pasian in Zomi vontawi lianu va bang pil a hambang a huaisiam a nunnem dingin thupha hong piak sak ta hen.

Crd:

Photos- Sai Zang Khua Zo innpi

CIIMNUAI VONTAWI ZOMI KIPAT KHIATNA LEH HUN LUI.

Hih a tung a thulu pen Dr. Hau Za Cin.Tapei.ii article pan hi in Zomite pian khiat na hong at na sungah Zomi tawh kisai hong at na mun teng puah se lo-in a ma at bangin a nuai a bang in ka-at kik hi.

1. Zomi kipat khiatna Adam pan khang tampi a phak zawh ciangin Sengam ah Zomi Ukpi Ji Fa, Zhou Wu Wang(Wu= Zomite Ukpipa a cihna, Wang= Ukpipa= Kumpi= King cihna hi) in vaihawm hi. Zhou innkuan ukpi sep sung(Zhou Dynasty)kum zagiat Shoji (1027-221 BC). Hih innkuan pan Zomi a piang hi. Zomi na hih uh leh”Zhou” suan na hi ding uhhi. Zhou Ming (Chinese)cih ciangin”Zomite cih na hi.(Ming=mi) ci’n Dr.Tommy Tsai Po-Yu(National Taiwan University, Tapei) in hong hilh hi. Zhou Ming cih pen lai i neih ciangin Zomi ci’n ih at ziau hi ding hi.

2. Sengam om lai thu BC 1757 pawl in Xia Ukpipa in a mite itna leh hehpihna tawh uklo-in git loh na leh kiphat sak na tawh uk ahih man in,Zomite in ol takin a ukna BC 1027 in sut khia hi.BC 1046 hun tak ciangin Zomi Ukpipa Ji Fa in a uk ciangin khua kim ah hausa upa koih kim ahih man in kua mah in Ukpi zaa sut zo paklo hi.Zomite uk sungin khangto mahmah uha,a ki-uk zia,zum nasep zia,khat leh khat ki zah tak zia,lokawh singpuak leh sumbawl paibawlna te ah khangto mahmah uhhi.Hih hun pen Sengam khantoh mahmah hun hi.

Sente miciim Con Fu Cius in siangthona, hauhna, dikna leh pilna,khat leh khat kithupi simna, nupa kikal, lawm leh gual kikal,ulian uneu kikal ah kizahtak zia,innkuan sung nuntak zia,beh leh phung ki-it zia dingte kimakaihna,inn luahna,sa hawm ziate kician tak in hilh hi.Tua a hilh ziate Zomite in I ngeina(Zomi culture or tradition) ih cihte ahihi.Zhou Wu Wang hong khan a kipan in kipum khatna hong khang aa,a mah pen VANTUNG TAPA(Son of Heaven) kici liang hi.Vantung pan hong kum suk kumpipa hidingin um mawh uhhi.Hun hong pai to zel in Ji Fa innkuan sungah vaihawm ding khang kita sam a,Ping Wang Ukpipa (BC 770-720) hun pan in Zomi vaihawm na pen a min bek hi ta aa,Ji Fa innkuan zahtakna om nonlo-in vaihawm upate in kumpi bangin vaihawm gawp uh ahih man in BC 221 ciangin Hui Wang khut sung pan in Qin Shi Huang in Zomi vaihawm na suh sak hi.

3. Tua bang a,Zomite ukpi sepna a ki suh sak ciangin ukpi thak te in”Great Wall”lam ding hong kipan a,mihing nasem dingin zang uhhi. Hih nasep gimhuai leh ukpi hihna a khah suah uh nuamsa lo-in Sengam nusia in leitaw lam zuan in suahtak nadingin paikhia uhhi.BC 4 hun ciangin Szechwan kimah teengin Pagyi khua sat uh a,AD 6 ciangin Chindwin gundungah teeng in Dahpa leh Penglam te hun lai AD 108 kimin Pugam leh Pupa khua na sat uhhi.AD 600 ciangin Ji Fa a suan sung pan Thetmite Zomi suak hi.

4. Chindwin pan tuni ciang AD 800 hun in Khampat khua sat in hun sawtpi teeng uhhi.Khampat khua pen Zang leh Kham kipeh na ahih man in”Khampat”a kici ahihi.Mualtung gam gen na”Kham” cih kammal pen Zomite bek in nei hi.AD 1300 in Ciimnuai satto in 1350 ciangin Zomi nungak mel hoih Leng Tong Hoih pen Ava mang zi in na om hi.1450 AD in Thang Ho, Lian Do, Gal Ngam, Hang Sai, Cing Khup, Ngam Bawm te Ciimnuai leh Geeltui ah teeng uhhi. (Ciimnuai a sa ki bak Geeltui ah ki thuk ci’n upate’n kammal na nei uhhi).Kabaw luidung pan kham kahtoh,Khampat,Ciimnuai leh Geeltui hun pen Tedim khuasat(1570AD)Kam Hau hong khan’(1840 AD) Mangkangte hong pai(1886 AD).Pasian thu hong tun (1899 AD) lai-ih neih(1900) tan zong eimau beh hausa,khuasat leh ukpi te makai-in kizangin ki uk ciat a,Zomi namni(February 20,1948) ciangin tua ki ukna bei-in Zomite a suakta minam ih hi ta hi.Kabaw valley pan a paitohna uah Tuingo leh Thangmual te kantan to in Ciimnuai ah Khul ah tuak uhhi.Tua lai pan suakta taktak kisak na neita uh ahih man in a mau leh amau ukpi ding kiseh tawm in “Khul” a piang na ki ci uhhi. (NB. Hih Article thupulakna in Mangkang te hong tun cil a koi pan a piang cih na suut na uah Meii tung pan tuak suk cih a na suut uh tawh hong ki zawitawn mahmah hi).

CIIMNUAI KHUA TANGTHU

Ciim Nuai Khua sat na.

Chin gazetteer volume I sungah Mangkang te kham tung a tuntun na uhah ih pian khiat na tang thu na dong uh in Sihzang te in hi bang in na sut uh hi.Um gah khat vantung pan in kia suk in ,tua um gah ki tam in Adam leh Eve hong pai khia in a mau te’ Eden huan pen Ciimnuai khua cin na suut uhhi.(Chin Adam leh Eve a cih pen Zomi pasal masa leh numei masa a cih na hi.)(Chin gazetteer vol.I 127). Guite in hi bangin na suut leuleu uh hi. Meitung pan in pasal khat leh numei khat kia suk in a tuk na mun pen Ciimnuai hi cin na suut uh hi.(Chin gazetteer vol.I 140).

Ciimnuai ih cih pen a khiat na a tuamtuam in ki ngaih sun thei hi.Ciim cih pen Zomite in tei-in pil cih na hi in tua khiat na tawh CiimNuai cih min in khiat na hong nei het lo hi.Khanglui pute pate pawl khat in Ciim cih pen ken baal a cih na hi a ci om ahih man in Ciimnuai cih pen Kenbaal po na nuai cih na hi a ki ci pen ki tuak pen kha ding hi.Hih Ciimnuai khua pen mual ki khup sin suangken dang nuai zang mun a hih man in Ciim cih pen Kenbaal cih na hi leh ki lawm ki tuak pen hi.

Kawl zang pan in 1295 kum ciangin Shan te in kulhpi a lam uh ciangin tang tha tam lua a hih man in Khamtung ah ki tai to hi. Pu Song Thu makai-in Tuingo dung zuito uh a, khamtung ki kah hi. Taaksat a cih na mun ah tawl khat teng uh hi.Pu Song Thu in pasal nih tui nek ding zongin sawl a tung thei mahmah lo uh hi.Pu Song Thu in lam dang sa in a mahmah a kan ding in a pai leh a mi sawl te gulpi in na vat tan hi.Tua gulpi Pu Song Thu in a tem tawh ban tan a gulpi mei-in Pu Song Thu mit lang khat vat kha a, ki tam in a mit langkhat taw hi.Taaksat pan in Thuam vum lam kah to uh a,nitum na lam ah tuak suk uh in,Ciimnuai khua sat uh hi.

Pu Song Thu in Ciimnuai ah hausa sem hi. Pu Song Thu in a zi tawh ta nei pak lo uh a hih man in,a cii man ding dah mahmah hi.Pu Song Thu in a zi kiangah “ En lah ta neilo mawk ih hih man ih cii man ding ut lo hi hang,tua hi in mi dang tawh ta nei leng nang hong sim mawh kha ding a hih man na nau nu tawh om khom leng nang hong sim mawh lo ding hi” ci’n a gen ciangin a zi zong lung kim hi.A zi nau nu min pen Nem Nep kici hi.Nem Nep pen a tha cing a mel hoih mahmah khat hi cin kigen hi.

A zi thu kim na tawh Pu Song Thu, Pi Nem Nep tawh hong om khawm uh a,nau hong pai ciangin mang man zelzel hi.Zan khat a mangin a huan khang a hual singpi heng sung ni vang zang in a tan hi.Tua ni zang pen tang pha mahmah a sakhi tuihup bangin hual heng sung a sun hi.Tua mang a mat ciangin lamdang sa in Pu Song Thu kiangah gen hi.Pu Song Thu in tua thu a zak ciangin thu lam dang khat hong kihilh hi ding hi,ci-in tua hual heng sung a et leh,aktui cia a pha suang vom kilkel khat a mu hi.Hih nitui ai in hong siam ding hi ih bia ding hi ci hi.Tua nitui ai a kep ni a ki pan a dau pai lam Pu Song Thu in thei hi.Nitui ai pian na kipat na leh biak kipat na hi kici hi.Zan khat Pi Nem Nep in mang khat man leuleu hi.A mang sungah zingsang tung a nisuak pan-in a tangpha mahmah ni vang in taang bem tung a kikoih nitui ai pen sal leuleu hi.Tawm vei ciangin tua nitui ai pen naungek in piang a nakpi takin a kap hi.Tua naungek ladingin a thawh leh a takin tho a hih man in khanglo hi.Hih a mang lamdang pen zingsang ciangin Pu Song Thu kiang ah a gen hi.Pu Song Thu in”Ni-in hong siam(huh) taktak hi”ci’n a ngaih sun hi.Pi Nem Nep in zan khat mang man leuleu hi.A mahmah huan sung pan in um gui-in a po hi.Tua umgui zam in inn tung teng a khuh hi.Um gah hoih mahmah khat gah a a nun kawi,sathau biing tawh ki bang hi.Tua um gah ni vang tang pha mahmah,meii kawm pan a nitang tawh kibang khat in nakpi’n tei tawh sut bangin a sun kham hi.Tua um gah a ki tap ciangin naungek khat pusuak a,a kap hi.Khat vei leuleu Pi Nem Nep in mang man a,a mang sungah ni sun lai tak a ihmu in a ki ngaih sun hi. Zan a aksi ek kia tawh ki bang ni pan in a tang pha mahmah khat kia in a ma tungah tu hi.Tua a taang in a khak ciangin a si ding zah in lau in a awng khia hi.Tua awtna in amah phongin a khang lo hi.

Pi Nem Nep nau hong suak in pasal khat hong hihi.Pu Song Thu zong nuam mahmah a,pasian te in cii mang lo ding hong siam hi,khan sau hen la,nu vaak pa vaak in piang hen ci-in thupha pia hi.Pu Song Thu in nau min phuak dingin a upate a khawm hi.Hih nau a pian ma in a nu Nem Nep in mang lam dang a man hi ci-in a mang teng a banban in a upate kiang ah a gen hi.Upate in zong lam dang sa in “ Hih naungek in Ni tawh kizop na thu a nei hi,”a ci uh hi.Nivang Nigui in hih nau ngek uk hi ci-in Nigui pan a piang,GUITE phuak ni a ci uh hi. Pi Nem Nep in tapa Guite a neih khit a sawt sim ciangin a zi pi in tapa khat hong nei hi.A zi pi in ta hong neih ciangin a min Thado phuak uh hi.Tua a hih man in Thado te in a piang masa ih u hi ci’n sa a gawh uh ciangin a cingsa(sa-cing)a piak ngiatngiat uh tu ni dongin ngeina in nei lai uh hi.

CIIMNUAI PAN BEH LEH PHUNG PIANG

Ciimnuai khua ah mi hong tam in lo khawh na ding mun a kicin nawn loh ciangin gam thak zongin khua ki sat ciat hi.Tua khua sat te in hausa sem ciat pah uh hi. Ciimnuai khua ah ih ten lai-in nam min kilawh na khat bek hi leh kilawm hi. Pu Song Thu tapa Guite leh Thado pen behmin hipah in amau suan leh khak sung panin beh tampi piangkhia in tu in beh 200 val pha ta hi. Ciimnuai ciangciang pen ZOMI a kilo hi cih kingaih sun thei hi. Ciimnuai khua pan ih ki khen thang ciangin ih tun na mun peuh min pua in khua min leh phung min piang pahpah hi. Tua phung min pen mi/te kici pah a, minam min hi lo hi.

(1) Khuanote pian khiatna. Ciimnuai pan Geeltui; Dimpi a tengte lak pan in pawl khat in Sasih khua sat uh hi. Inn 7 bek pha a khang theilo uh ahih man in Khuano kici a, tua mun pan a khang khia mi te Khuanomi ki ci hi. Khuano min pua te tu hun a ten na khua te:- Zung; Phunom; Thangnuai; Suangpi; Tuisau; Laibung; Tuivial; Pimpih; Ngalzang; Tampi; Cingpikot; Muallum; Vando; Dimzang; Pyidawta; Nawikai; Dolluang; Mualnuam; Budiman; Lalta; Khuakem; Tuilang; Lunmual; Phaileng khua te ah teng uh hi.

(2) Vangteh te(Guite) pian khiatna. Pu Song Thu ta upa pen min hi-in a sawt na ciangin beh min hong suak hi. Guite pian khiat na pen Chin gazetteer vol-I sungah hi bang in na gen hi. Meiitung pan in Pasal khat le Numei khat kia sut in Ciihaiciinu hi ci’n na gelh hi. Guite ten na khua te:- Vangteh; Pakzang; Tuizang; Thangsan; Haiciin. Tuimui; Tuimang; Darkhai, Pangmual; Tongciin; Selbung; Sekpi; Vaivet; Suang bem; Lamzang ;Tonzang; Gawng; Tuithang; Kaptel; Mualbem; Tuipi; Pangzang; Lamka; Tonglon; Hansip khua te ah teng uh hi.

(3). Sihzangte pian khiat na. Ciimnuai khua pan in a lal khia pawl khat sihkhuk(ci khuk) omna zangah teeng uh a; tua pan a khang khia te Sihzang kici hi. Sihzang te tenna khuate:-Thuklai; Khuasak; Buanman ;Lophei; Bung; Zongal; Voklak; Pumva; Theizang; Dolluang; Suangdawh; Takkhawl khua te ah teeng uh hi.

(4) Saizangte pian khiat na. Pu Song Thu Ciimnuai khua pan in Cianlai khua satin ,tua mun pen gamsai vive po na zang khat a hihi. Tua khua pen a sawt ciangin Saizang ci uh hi. Saizang pan in a lal khia mite Saizangmi kici uh hi. Saizang mite ten na khua te:-Saizang; Tualzang; Teeklui ;Lailo; Thangzang; Vongmual; Aipha; Mualpi; Tuitawh; Thalmual; Phaiza; Zampi ;Taalek; Kaptel; Hiangawn; Tuitang khua te ah teng uhhi.

(5) Zote pian khiatna. Ciimnuai khua pan in Pu Hang Hil makai in Tung Nung; LianZaw; Tai Thul; Tung Dim; Neu Zaw te tawh Baalzang khua sat uh hi. Baalzang khua pen mual dawn a vot na tam lak hi a, tua mun te pen zo kici hi. Tua mun a teng te zo lak a teng te ki ci a ,a sawt ciangin Zote cih minam min hong suak hi. Zote pen minam tuam hilo in Sukte; Zo; Kam Hau mi cih te a taktak in minam khat hi (Chin gazetteer vol-I:140). Kam Hau mi ih cih pen Mangkang te hong ciapteh na ah Kam Hau uk sung mi khempeuh huam a genna na hihi. Tedim, Tonzang gam sung a teeng khempeuh a cih nop na zong ahihi. Zote tenna khua te: Phaitu; Haimual; Tualmu; Khuadai; Bumzang; Salzang; Takzang; Phuntong, Sialthaw; Lam Thang; Buangzawl; Mimbil; Khamzang; Gamngai; Lungtak; Anlun; Geelmual; Khianglam; Taalzang; Phaidim; Thauthe; Maulawn; Mangtuh; Lomzang; Seksih; Haipi: Buangmual; Khuaivum; Sialmei; Bizang; VangLai; Thenzang; Sialthawzang; Tuigial; Tuilam khua te ah teng uh hi.

(6). Tedimte pian khiat na. Tedim mi a tuam in om lo hi.Tedim khua pen Pu Gui Mang in a sat ciangin a gam et lai ua,Vansang Dim bual a te diamdiam pen Paite pau in Tedimdim a cih uh tua tung tawn in a piang khia khua min a hihi. Hun hong sawt toto a,Pu Kam Hau in Tedim hong luah ciangin,tua lai tak a, teng masa 7te:- Saizangmi; Teizangmi; Dimmi; Guite; Zote; Thado-Kuki; Vaiphei(Hualngo) te teng khawm uh a,tua te sung pan in a tam zaw in a theih pau nam khat na zang uhhi.Hih minam te sung ah sahawm zuhawm tat zia nam 3 Teizang tat; Dim tat; Zotat bulpi nam thum kizang hi. Tua hi-in ih pian khiat na ki bang hi mah ta leh khua tuamtuam ah ih ten ciangin ih aw kaih zia kilam dangin kammal pawl khat zong hong kilam dang hi. Cope Topa in Zolai hong bawl sak ciang in tua hun lai takin Tedim khua a ki zang pau pen Zomi khem peuh in tel a hih man in Kam Hau dialect hong cih sak hi.KamHau ih cih pen Teizang mi hi a,Tongzang ah Kam Hau Ukpi gamh a luah Pu Hau Cin Khup a khan lai in Teizang pau mang ngilh kha leng ci-in Mualbem khua ah kum khat khat veita Teizang pau va sin hi kici hi.Tedim mi leh Tedim pau ih cih pen a tuam in omlo hi.A taktak in Tedim pau ih cih pen nidang Ciinuai pan a ih kam zat teng mah a ki keng suak hi lel hi.

(7) Teizangte pian na; Ciimnuai khua ah a ki teen lai in pawl khat khang lam ah lal suk;paisuk uh a tua te Sukte na ci uh hi(Chin gazetteer Vol-I:118).Tua a suk pai te lui nih ki tuahna (Ngatan lui leh Sialtang lui ki tuah na) ah khua na sat uh in Luika khua na ci uh hi.Tual biak na pen khua laizang paangpi sing nuai suang tumpi gei khat ah bawl uh hi.Nitak khua phat kha tan ciangin naupang te tua singpi gei ah kimawl zel uh a,naupang mang thei pahpah hi.Limtak in a et uh ciangin,tua suangpi nuai ah kua hawm khat om a,tua sung pan in gulpi khat in naupangte la thei zel na hihi.Khua mi te’n thang a siah uh leh tua gulpi awk a,a kaih uh leh gulpi sau lua in kai khia zolo uh hi.Tua gulpi pau in,”ka om na thuk mahmah a, ka mei-in gun ban hi,van suang zawl ah ki vial hi;,hong kai zo kei nuteh” a cih ciangin tua gulpi at tan uh a,khua zang in a sa hawm uh hi. Mei gong nupi khat a sa pia lo uh in,a lutang pia uh a,tua nitak in mei gong nu in BualTung khua pan zin nih a nei hi.Nupi nu in a gul lutang huan a,buh tei-in a tawh leh,gul lutang hong pau in”Ka mit nong sun kha deh”ci hi.Nupi nu zong lau in vok kuangah bua hi.Zan kim tak ciangin ak lam dang khat hong khuang a,”Zinte kha vevua”ci’n khuang hi.Innteek nu lung hi mawh in a khua pih te kiangah a gen hangin thudon lo uh hi.Innteek nu in ak khuang a zak kik tak ciangin a uital leh a zinte nih tawh pai khia uhhi.Khua nawl a tun phet in huihpi nung a,a khua cim in khua zangin si mang uh hi.A zin te gel a khua uah ciah suak uh a,nupi nu Baang zang ah teeng hi.Nupi nu a gai sa in a pasal in sih san a,a uital tawh luika khua pan Baangzang khua hong teen ciang nau hong suakin,a min Sukzo phuak hi.Naupang hong khan ciangin MualBem khua Teipi phung zang khat ah hong teeng hi. Tua Teipi zang pau lap in a suan a khak te TeiZang mi ki ci uh hi. Teizang mi te teen na khua te: Mualbem; Zangzawl; Dakdung; Buan; Heilei; Suangphei; Sim Suangzang; Langzang; Pangsak; Zangtui; Mualnuam; Gawsing; Tuipi; Pangzang; Keeltal; Luangel; Saipimual; Lingthuk; Vaikhuamun; Sialtui;Fartlang khua te ah teeng uh hi.

(. Dimte pian na. Ciimnuai khua pan in pawl khat in Geeltui khua hong sat a,Lian Do le Thang Ho te unau hong nuam sa uh hi.Geeltui pan in pawl khat in Dimpi khua hong sat hi.Dimpi pan Dimlo ah pawl khat hong pemta in,Dimpi,Dimlo pan in a khang khia teng Dimte kici hi.Dim mite ten na khuate:- Dimpi; Dimlo; Sezang; Laitui; Tuicinlui; Tungzang; Suanghoih; Mal Suangzang; Tedim; Tonzang; Pyidawtha; Kalaymyo; khua te ah teng uh hi.

(9) Losaute pianna. Nidang in Ciimnuai pan in Lamzang lam lo kho te in a lo khawh te uh a dung sau zilzial in lokho uh hi.Tua bang a lokho a kiveng kha teng hih lo dung sau te a kicih na pan a sawt ciangin Losau mi tang uh hi. Losau mite ten na khuate, Lamzang, Gawng mual, Tonzang, Kansau, Vaivet, Tauleng, Suangsang, Lailo, Tuithang khua te a teng ahi uhhi.

Source : ZOMI KHANG TANG THU (ZOMI CHRONICLES).

Crd: